౪. ఓక్కన్తసంయుత్తం

౧. చక్ఖుసుత్తం

౩౦౨. సావత్థినిదానం. ‘‘చక్ఖుం, భిక్ఖవే, అనిచ్చం విపరిణామి అఞ్ఞథాభావి; సోతం అనిచ్చం విపరిణామి అఞ్ఞథాభావి; ఘానం అనిచ్చం విపరిణామి అఞ్ఞథాభావి; జివ్హా అనిచ్చా విపరిణామీ అఞ్ఞథాభావీ [విపరిణామినీ అఞ్ఞథాభావినీ (?)]; కాయో అనిచ్చో విపరిణామీ అఞ్ఞథాభావీ; మనో అనిచ్చో విపరిణామీ అఞ్ఞథాభావీ. యో, భిక్ఖవే, ఇమే ధమ్మే ఏవం సద్దహతి అధిముచ్చతి – అయం వుచ్చతి సద్ధానుసారీ, ఓక్కన్తో సమ్మత్తనియామం, సప్పురిసభూమిం ఓక్కన్తో, వీతివత్తో పుథుజ్జనభూమిం; అభబ్బో తం కమ్మం కాతుం, యం కమ్మం కత్వా నిరయం వా తిరచ్ఛానయోనిం వా పేత్తివిసయం వా ఉపపజ్జేయ్య; అభబ్బో చ [అభబ్బోవ (సీ. స్యా. కం.)] తావ కాలం కాతుం యావ న సోతాపత్తిఫలం సచ్ఛికరోతి’’.

‘‘యస్స ఖో, భిక్ఖవే, ఇమే ధమ్మా ఏవం పఞ్ఞాయ మత్తసో నిజ్ఝానం ఖమన్తి, అయం వుచ్చతి – ‘ధమ్మానుసారీ, ఓక్కన్తో సమ్మత్తనియామం, సప్పురిసభూమిం ఓక్కన్తో, వీతివత్తో పుథుజ్జనభూమిం; అభబ్బో తం కమ్మం కాతుం, యం కమ్మం కత్వా నిరయం వా తిరచ్ఛానయోనిం వా పేత్తివిసయం వా ఉపపజ్జేయ్య; అభబ్బో చ తావ కాలం కాతుం యావ న సోతాపత్తిఫలం సచ్ఛికరోతి’. యో, భిక్ఖవే, ఇమే ధమ్మే ఏవం పజానాతి ఏవం పస్సతి, అయం వుచ్చతి – ‘సోతాపన్నో అవినిపాతధమ్మో నియతో సమ్బోధిపరాయనో’’’తి. పఠమం.

౨. రూపసుత్తం

౩౦౩. సావత్థినిదానం. ‘‘రూపా, భిక్ఖవే, అనిచ్చా విపరిణామినో అఞ్ఞథాభావినో; సద్దా అనిచ్చా విపరిణామినో అఞ్ఞథాభావినో; గన్ధా అనిచ్చా విపరిణామినో అఞ్ఞథాభావినో; రసా అనిచ్చా విపరిణామినో అఞ్ఞథాభావినో; ఫోట్ఠబ్బా అనిచ్చా విపరిణామినో అఞ్ఞథాభావినో; ధమ్మా అనిచ్చా విపరిణామినో అఞ్ఞథాభావినో. యో, భిక్ఖవే, ఇమే ధమ్మే ఏవం సద్దహతి అధిముచ్చతి, అయం వుచ్చతి సద్ధానుసారీ, ఓక్కన్తో సమ్మత్తనియామం, సప్పురిసభూమిం ఓక్కన్తో, వీతివత్తో పుథుజ్జనభూమిం; అభబ్బో తం కమ్మం కాతుం, యం కమ్మం కత్వా నిరయం వా తిరచ్ఛానయోనిం వా పేత్తివిసయం వా ఉపపజ్జేయ్య; అభబ్బో చ తావ కాలం కాతుం యావ న సోతాపత్తిఫలం సచ్ఛికరోతి’’.

‘‘యస్స ఖో, భిక్ఖవే, ఇమే ధమ్మా ఏవం పఞ్ఞాయ మత్తసో నిజ్ఝానం ఖమన్తి, అయం వుచ్చతి – ‘ధమ్మానుసారీ, ఓక్కన్తో సమ్మత్తనియామం, సప్పురిసభూమిం ఓక్కన్తో, వీతివత్తో పుథుజ్జనభూమిం; అభబ్బో తం కమ్మం కాతుం, యం కమ్మం కత్వా నిరయం వా తిరచ్ఛానయోనిం వా పేత్తివిసయం వా ఉపపజ్జేయ్య; అభబ్బో చ తావ కాలం కాతుం యావ న సోతాపత్తిఫలం సచ్ఛికరోతి’. యో, భిక్ఖవే, ఇమే ధమ్మే ఏవం పజానాతి ఏవం పస్సతి, అయం వుచ్చతి – ‘సోతాపన్నో అవినిపాతధమ్మో నియతో సమ్బోధిపరాయనో’’’తి. దుతియం.

౩. విఞ్ఞాణసుత్తం

౩౦౪. సావత్థినిదానం. ‘‘చక్ఖువిఞ్ఞాణం, భిక్ఖవే, అనిచ్చం విపరిణామి అఞ్ఞథాభావి; సోతవిఞ్ఞాణం… ఘానవిఞ్ఞాణం… జివ్హావిఞ్ఞాణం… కాయవిఞ్ఞాణం… మనోవిఞ్ఞాణం అనిచ్చం విపరిణామి అఞ్ఞథాభావి. యో భిక్ఖవే…పే… సమ్బోధిపరాయనో’’తి. తతియం.

౪. సమ్ఫస్ససుత్తం

౩౦౫. సావత్థినిదానం. ‘‘చక్ఖుసమ్ఫస్సో, భిక్ఖవే, అనిచ్చో విపరిణామీ అఞ్ఞథాభావీ; సోతసమ్ఫస్సో… ఘానసమ్ఫస్సో… జివ్హాసమ్ఫస్సో… కాయసమ్ఫస్సో… మనోసమ్ఫస్సో అనిచ్చో విపరిణామీ అఞ్ఞథాభావీ. యో, భిక్ఖవే, ఇమే ధమ్మే ఏవం సద్దహతి అధిముచ్చతి, అయం వుచ్చతి ‘సద్ధానుసారీ…పే… సమ్బోధిపరాయనో’’’తి. చతుత్థం.

౫. సమ్ఫస్సజాసుత్తం

౩౦౬. సావత్థినిదానం. ‘‘చక్ఖుసమ్ఫస్సజా, భిక్ఖవే, వేదనా అనిచ్చా విపరిణామీ అఞ్ఞథాభావీ; సోతసమ్ఫస్సజా వేదనా…పే… ఘానసమ్ఫస్సజా వేదనా…పే… జివ్హాసమ్ఫస్సజా వేదనా…పే… కాయసమ్ఫస్సజా వేదనా…పే… మనోసమ్ఫస్సజా వేదనా అనిచ్చా విపరిణామీ అఞ్ఞథాభావీ. యో, భిక్ఖవే, ఇమే ధమ్మే ఏవం సద్దహతి అధిముచ్చతి, అయం వుచ్చతి ‘సద్ధానుసారీ…పే… సమ్బోధిపరాయనో’’’తి. పఞ్చమం.

౬. రూపసఞ్ఞాసుత్తం

౩౦౭. సావత్థినిదానం. ‘‘రూపసఞ్ఞా, భిక్ఖవే, అనిచ్చా విపరిణామీ అఞ్ఞథాభావీ; సద్దసఞ్ఞా… గన్ధసఞ్ఞా… రససఞ్ఞా… ఫోట్ఠబ్బసఞ్ఞా… ధమ్మసఞ్ఞా అనిచ్చా విపరిణామీ అఞ్ఞథాభావీ. యో, భిక్ఖవే, ఇమే ధమ్మే ఏవం సద్దహతి అధిముచ్చతి, అయం వుచ్చతి ‘సద్ధానుసారీ…పే… సమ్బోధిపరాయనో’’’తి. ఛట్ఠం.

౭. రూపసఞ్చేతనాసుత్తం

౩౦౮. సావత్థినిదానం. ‘‘రూపసఞ్చేతనా, భిక్ఖవే, అనిచ్చా విపరిణామీ అఞ్ఞథాభావీ; సద్దసఞ్చేతనా… గన్ధసఞ్చేతనా… రససఞ్చేతనా… ఫోట్ఠబ్బసఞ్చేతనా… ధమ్మసఞ్చేతనా అనిచ్చా విపరిణామీ అఞ్ఞథాభావీ. యో, భిక్ఖవే, ఇమే ధమ్మే ఏవం సద్దహతి అధిముచ్చతి, అయం వుచ్చతి ‘సద్ధానుసారీ…పే… సమ్బోధిపరాయనో’’’తి. సత్తమం.

౮. రూపతణ్హాసుత్తం

౩౦౯. సావత్థినిదానం. ‘‘రూపతణ్హా, భిక్ఖవే, అనిచ్చా విపరిణామీ అఞ్ఞథాభావీ; సద్దతణ్హా… గన్ధతణ్హా… రసతణ్హా… ఫోట్ఠబ్బతణ్హా… ధమ్మతణ్హా అనిచ్చా విపరిణామీ అఞ్ఞథాభావీ. యో, భిక్ఖవే, ఇమే ధమ్మే ఏవం సద్దహతి అధిముచ్చతి, అయం వుచ్చతి ‘సద్ధానుసారీ…పే… సమ్బోధిపరాయనో’’’తి. అట్ఠమం.

౯. పథవీధాతుసుత్తం

౩౧౦. సావత్థినిదానం. ‘‘పథవీధాతు, భిక్ఖవే, అనిచ్చా విపరిణామీ అఞ్ఞథాభావీ; ఆపోధాతు… తేజోధాతు… వాయోధాతు… ఆకాసధాతు… విఞ్ఞాణధాతు అనిచ్చా విపరిణామీ అఞ్ఞథాభావీ. యో, భిక్ఖవే, ఇమే ధమ్మే ఏవం సద్దహతి అధిముచ్చతి, అయం వుచ్చతి ‘సద్ధానుసారీ…పే… సమ్బోధిపరాయనో’’’తి. నవమం.

౧౦. ఖన్ధసుత్తం

౩౧౧. సావత్థినిదానం. ‘‘రూపం, భిక్ఖవే, అనిచ్చం విపరిణామి అఞ్ఞథాభావి; వేదనా అనిచ్చా విపరిణామీ అఞ్ఞథాభావీ; సఞ్ఞా… సఙ్ఖారా అనిచ్చా విపరిణామినో అఞ్ఞథాభావినో; విఞ్ఞాణం అనిచ్చం విపరిణామి అఞ్ఞథాభావి. యో, భిక్ఖవే, ఇమే ధమ్మే ఏవం సద్దహతి అధిముచ్చతి, అయం వుచ్చతి సద్ధానుసారీ, ఓక్కన్తో సమ్మత్తనియామం, సప్పురిసభూమిం ఓక్కన్తో, వీతివత్తో పుథుజ్జనభూమిం; అభబ్బో తం కమ్మం కాతుం, యం కమ్మం కత్వా నిరయం వా తిరచ్ఛానయోనిం వా పేత్తివిసయం వా ఉపపజ్జేయ్య; అభబ్బో చ తావ కాలం కాతుం యావ న సోతాపత్తిఫలం సచ్ఛికరోతి’’.

‘‘యస్స ఖో, భిక్ఖవే, ఇమే ధమ్మా ఏవం పఞ్ఞాయ మత్తసో నిజ్ఝానం ఖమన్తి, అయం వుచ్చతి – ‘ధమ్మానుసారీ, ఓక్కన్తో సమ్మత్తనియామం, సప్పురిసభూమిం ఓక్కన్తో, వీతివత్తో పుథుజ్జనభూమిం; అభబ్బో తం కమ్మం కాతుం, యం కమ్మం కత్వా నిరయం వా తిరచ్ఛానయోనిం వా పేత్తివిసయం వా ఉపపజ్జేయ్య; అభబ్బో చ తావ కాలం కాతుం యావ న సోతాపత్తిఫలం సచ్ఛికరోతి’. యో, భిక్ఖవే, ఇమే ధమ్మే ఏవం పజానాతి ఏవం పస్సతి, అయం వుచ్చతి – ‘సోతాపన్నో అవినిపాతధమ్మో నియతో సమ్బోధిపరాయనో’’’తి. దసమం.

ఓక్కన్తసంయుత్తం [ఓక్కన్తికసంయుత్తం (పీ. క.)] సమత్తం.