౧-౧౧. మారాదిసుత్తఏకాదసకం

౧౮౨. సావత్థినిదానం. ఏకమన్తం నిసిన్నో ఖో ఆయస్మా రాధో భగవన్తం ఏతదవోచ – ‘‘సాధు మే, భన్తే, భగవా సంఖిత్తేన ధమ్మం దేసేతు, యమహం భగవతో ధమ్మం సుత్వా ఏకో వూపకట్ఠో అప్పమత్తో ఆతాపీ పహితత్తో విహరేయ్య’’న్తి.

‘‘యో ఖో, రాధ, మారో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో [సీహళపోత్థకే పన ‘‘తత్ర తే ఛన్దో పహాతబ్బోతి ఏకం సుత్తం, తత్ర తే రాగో పహాతబ్బోతి ఏకం సుత్తం, తత్ర తే ఛన్దరాగో పహాతబ్బోతి ఏకం సుత్త’’న్తి ఏవం విసుం విసుం తీణి సుత్తాని విభజిత్వా దస్సితాని. ఏవముపరిసుత్తేసుపి]. కో చ, రాధ, మారో? రూపం ఖో, రాధ, మారో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో [సీహళపోత్థకే పన ‘‘తత్ర తే ఛన్దో పహాతబ్బోతి ఏకం సుత్తం, తత్ర తే రాగో పహాతబ్బోతి ఏకం సుత్తం, తత్ర తే ఛన్దరాగో పహాతబ్బోతి ఏకం సుత్త’’న్తి ఏవం విసుం విసుం తీణి సుత్తాని విభజిత్వా దస్సితాని. ఏవముపరిసుత్తేసుపి]. వేదనా మారో; తత్ర తే ఛన్దో పహాతబ్బో…పే… సఞ్ఞా మారో; తత్ర తే ఛన్దో పహాతబ్బో…పే… సఙ్ఖారా మారో; తత్ర తే ఛన్దో పహాతబ్బో…పే… విఞ్ఞాణం మారో; తత్ర తే ఛన్దో పహాతబ్బో…పే… యో ఖో, రాధ, మారో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో’’తి.

౧౮౩. యో ఖో, రాధ, మారధమ్మో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో…పే….

౧౮౪. యం ఖో, రాధ, అనిచ్చం…పే….

౧౮౫. యో ఖో, రాధ, అనిచ్చధమ్మో…పే….

౧౮౬. యం ఖో, రాధ, దుక్ఖం…పే….

౧౮౭. యో ఖో, రాధ, దుక్ఖధమ్మో…పే….

౧౮౮. యో ఖో, రాధ, అనత్తా…పే….

౧౮౯. యో ఖో, రాధ, అనత్తధమ్మో…పే….

౧౯౦. యో ఖో, రాధ, ఖయధమ్మో…పే….

౧౯౧. యో ఖో, రాధ, వయధమ్మో…పే….

౧౯౨. యో ఖో, రాధ, సముదయధమ్మో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో…పే….