౨. సమాధిమూలకఠితిసుత్తం

౬౬౩. సావత్థినిదానం. ‘‘చత్తారోమే, భిక్ఖవే, ఝాయీ. కతమే చత్తారో? ఇధ, భిక్ఖవే, ఏకచ్చో ఝాయీ సమాధిస్మిం సమాధికుసలో హోతి, న సమాధిస్మిం ఠితికుసలో. ఇధ పన, భిక్ఖవే, ఏకచ్చో ఝాయీ సమాధిస్మిం ఠితికుసలో హోతి, న సమాధిస్మిం సమాధికుసలో. ఇధ పన, భిక్ఖవే, ఏకచ్చో ఝాయీ నేవ సమాధిస్మిం సమాధికుసలో హోతి, న చ సమాధిస్మిం ఠితికుసలో. ఇధ పన, భిక్ఖవే, ఏకచ్చో ఝాయీ సమాధిస్మిం సమాధికుసలో చ హోతి, సమాధిస్మిం ఠితికుసలో చ. తత్ర, భిక్ఖవే, య్వాయం ఝాయీ సమాధిస్మిం సమాధికుసలో చ హోతి సమాధిస్మిం ఠితికుసలో చ అయం ఇమేసం చతున్నం ఝాయీనం అగ్గో చ సేట్ఠో చ మోక్ఖో చ ఉత్తమో చ పవరో చ. సేయ్యథాపి, భిక్ఖవే, గవా ఖీరం, ఖీరమ్హా దధి, దధిమ్హా నవనీతం, నవనీతమ్హా సప్పి, సప్పిమ్హా సప్పిమణ్డో తత్ర అగ్గమక్ఖాయతి; ఏవమేవ ఖో, భిక్ఖవే, య్వాయం ఝాయీ సమాధిస్మిం సమాధికుసలో చ హోతి సమాధిస్మిం ఠితికుసలో చ అయం ఇమేసం చతున్నం ఝాయీనం అగ్గో చ సేట్ఠో చ మోక్ఖో చ ఉత్తమో చ పవరో చా’’తి. దుతియం.