౫. విఞ్ఞాణఅఞ్ఞాణసుత్తం

౬౧౧. సావత్థినిదానం. ఏకమన్తం నిసిన్నో ఖో వచ్ఛగోత్తో పరిబ్బాజకో భగవన్తం ఏతదవోచ – ‘‘కో ను ఖో, భో గోతమ, హేతు, కో పచ్చయో, యానిమాని అనేకవిహితాని దిట్ఠిగతాని లోకే ఉప్పజ్జన్తి – సస్సతో లోకోతి వా, అసస్సతో లోకోతి వా …పే… నేవ హోతి న న హోతి తథాగతో పరం మరణాతి వా’’తి? ‘‘విఞ్ఞాణే ఖో, వచ్ఛ, అఞ్ఞాణా, విఞ్ఞాణసముదయే అఞ్ఞాణా, విఞ్ఞాణనిరోధే అఞ్ఞాణా, విఞ్ఞాణనిరోధగామినియా పటిపదాయ అఞ్ఞాణా; ఏవమిమాని అనేకవిహితాని దిట్ఠిగతాని లోకే ఉప్పజ్జన్తి – సస్సతో లోకోతి వా, అసస్సతో లోకోతి వా…పే… నేవ హోతి న న హోతి తథాగతో పరం మరణాతి వాతి. అయం ఖో, వచ్ఛ, హేతు, అయం పచ్చయో, యానిమాని అనేకవిహితాని దిట్ఠిగతాని లోకే ఉప్పజ్జన్తి – సస్సతో లోకోతి వా, అసస్సతో లోకోతి వా…పే… నేవ హోతి న న హోతి తథాగతో పరం మరణాతి వా’’తి. పఞ్చమం.