౧౧. వలాహకసంయుత్తం

౧. సుద్ధికసుత్తం

౫౫౦. సావత్థినిదానం. ‘‘వలాహకకాయికే వో, భిక్ఖవే, దేవే దేసేస్సామి. తం సుణాథ. కతమే చ, భిక్ఖవే, వలాహకకాయికా దేవా? సన్తి, భిక్ఖవే, సీతవలాహకా దేవా; సన్తి ఉణ్హవలాహకా దేవా; సన్తి అబ్భవలాహకా దేవా; సన్తి వాతవలాహకా దేవా; సన్తి వస్సవలాహకా దేవా – ఇమే వుచ్చన్తి, భిక్ఖవే, ‘వలాహకకాయికా దేవా’’’తి. పఠమం.

౨. సుచరితసుత్తం

౫౫౧. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా వలాహకకాయికానం దేవానం సహబ్యతం ఉపపజ్జతీ’’తి? ‘‘ఇధ, భిక్ఖు, ఏకచ్చో కాయేన సుచరితం చరతి, వాచాయ సుచరితం చరతి, మనసా సుచరితం చరతి. తస్స సుతం హోతి – ‘వలాహకకాయికా దేవా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా వలాహకకాయికానం దేవానం సహబ్యతం ఉపపజ్జేయ్య’న్తి. సో కాయస్స భేదా పరం మరణా వలాహకకాయికానం దేవానం సహబ్యతం ఉపపజ్జతి. అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా వలాహకకాయికానం దేవానం సహబ్యతం ఉపపజ్జతీ’’తి. దుతియం.

౩-౧౨. సీతవలాహకదానూపకారసుత్తదసకం

౫౫౨-౫౬౧. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా సీతవలాహకానం దేవానం సహబ్యతం ఉపపజ్జతీ’’తి? ‘‘ఇధ భిక్ఖు, ఏకచ్చో కాయేన సుచరితం చరతి, వాచాయ సుచరితం చరతి, మనసా సుచరితం చరతి. తస్స సుతం హోతి – ‘సీతవలాహకా దేవా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా సీతవలాహకానం దేవానం సహబ్యతం ఉపపజ్జేయ్య’న్తి. సో అన్నం దేతి…పే… పదీపేయ్యం దేతి. సో కాయస్స భేదా పరం మరణా సీతవలాహకానం దేవానం సహబ్యతం ఉపపజ్జతి. అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా సీతవలాహకానం దేవానం సహబ్యతం ఉపపజ్జతీ’’తి. ద్వాదసమం.

౧౩-౫౨. ఉణ్హవలాహకదానూపకారసుత్తచాలీసకం

౫౬౨-౬౦౧. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా ఉణ్హవలాహకానం దేవానం…పే… అబ్భవలాహకానం దేవానం…పే… వాతవలాహకానం దేవానం…పే… వస్సవలాహకానం దేవానం సహబ్యతం ఉపపజ్జతీ’’తి? ‘‘ఇధ, భిక్ఖు, ఏకచ్చో కాయేన సుచరితం చరతి, వాచాయ సుచరితం చరతి, మనసా సుచరితం చరతి. తస్స సుతం హోతి – ‘వస్సవలాహకా దేవా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా వస్సవలాహకానం దేవానం సహబ్యతం ఉపపజ్జేయ్య’న్తి. సో అన్నం దేతి…పే… పదీపేయ్యం దేతి. సో కాయస్స భేదా పరం మరణా వస్సవలాహకానం దేవానం సహబ్యతం ఉపపజ్జతి. అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా వస్సవలాహకానం దేవానం సహబ్యతం ఉపపజ్జతీ’’తి. ద్వేపఞ్ఞాసమం.

౫౩. సీతవలాహకసుత్తం

౬౦౨. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేనేకదా సీతం హోతీ’’తి? ‘‘సన్తి, భిక్ఖు, సీతవలాహకా నామ దేవా. తేసం యదా ఏవం హోతి – ‘యంనూన మయం సకాయ రతియా వసేయ్యామా’తి [రమేయ్యామాతి (సీ. స్యా. కం. పీ.) ఏవముపరిపి], తేసం తం చేతోపణిధిమన్వాయ సీతం హోతి. అయం ఖో, భిక్ఖు, హేతు, అయం పచ్చయో, యేనేకదా సీతం హోతీ’’తి. తేపఞ్ఞాసమం.

౫౪. ఉణ్హవలాహకసుత్తం

౬౦౩. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేనేకదా ఉణ్హం హోతీ’’తి? ‘‘సన్తి, భిక్ఖు, ఉణ్హవలాహకా నామ దేవా. తేసం యదా ఏవం హోతి – ‘యంనూన మయం సకాయ రతియా వసేయ్యామా’తి, తేసం తం చేతోపణిధిమన్వాయ ఉణ్హం హోతి. అయం ఖో, భిక్ఖు, హేతు, అయం పచ్చయో, యేనేకదా ఉణ్హం హోతీ’’తి. చతుపఞ్ఞాసమం.

౫౫. అబ్భవలాహకసుత్తం

౬౦౪. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేనేకదా అబ్భం హోతీ’’తి? ‘‘సన్తి, భిక్ఖు, అబ్భవలాహకా నామ దేవా. తేసం యదా ఏవం హోతి – ‘యంనూన మయం సకాయ రతియా వసేయ్యామా’తి, తేసం తం చేతోపణిధిమన్వాయ అబ్భం హోతి. అయం ఖో, భిక్ఖు, హేతు, అయం పచ్చయో, యేనేకదా అబ్భం హోతీ’’తి. పఞ్చపఞ్ఞాసమం.

౫౬. వాతవలాహకసుత్తం

౬౦౫. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేనేకదా వాతో హోతీ’’తి? ‘‘సన్తి, భిక్ఖు, వాతవలాహకా నామ దేవా. తేసం యదా ఏవం హోతి – ‘యంనూన మయం సకాయ రతియా వసేయ్యామా’తి, తేసం తం చేతోపణిధిమన్వాయ వాతో హోతి. అయం ఖో, భిక్ఖు, హేతు, అయం పచ్చయో, యేనేకదా వాతో హోతీ’’తి. ఛప్పఞ్ఞాసమం.

౫౭. వస్సవలాహకసుత్తం

౬౦౬. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేనేకదా దేవో వస్సతీ’’తి? ‘‘సన్తి, భిక్ఖు, వస్సవలాహకా నామ దేవా. తేసం యదా ఏవం హోతి – ‘యంనూన మయం సకాయ రతియా వసేయ్యామా’తి, తేసం తం చేతోపణిధిమన్వాయ దేవో వస్సతి. అయం ఖో, భిక్ఖు, హేతు, అయం పచ్చయో, యేనేకదా దేవో వస్సతీ’’తి. సత్తపఞ్ఞాసమం.

సత్తపఞ్ఞాససుత్తన్తం నిట్ఠితం.

వలాహకసంయుత్తం సమత్తం.