౩. మూలగన్ధదాతాసుత్తం

౪౪౦. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా మూలగన్ధే అధివత్థానం దేవానం సహబ్యతం ఉపపజ్జతీ’’తి? ‘‘ఇధ, భిక్ఖు, ఏకచ్చో కాయేన సుచరితం చరతి, వాచాయ సుచరితం చరతి, మనసా సుచరితం చరతి. తస్స సుతం హోతి – ‘మూలగన్ధే అధివత్థా దేవా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా మూలగన్ధే అధివత్థానం దేవానం సహబ్యతం ఉపపజ్జేయ్య’న్తి. సో దాతా హోతి మూలగన్ధానం. సో కాయస్స భేదా పరం మరణా మూలగన్ధే అధివత్థానం దేవానం సహబ్యతం ఉపపజ్జతి. అయం ఖో, భిక్ఖు, హేతు…పే… యేన మిధేకచ్చో కాయస్స భేదా పరం మరణా మూలగన్ధే అధివత్థానం దేవానం సహబ్యతం ఉపపజ్జతీ’’తి. తతియం.