౧. సుద్ధికసుత్తం

౪౩౮. ఏకం సమయం భగవా సావత్థియం విహరతి జేతవనే అనాథపిణ్డికస్స ఆరామే …పే… భగవా ఏతదవోచ – ‘‘గన్ధబ్బకాయికే వో, భిక్ఖవే, దేవే దేసేస్సామి. తం సుణాథ. కతమా చ, భిక్ఖవే, గన్ధబ్బకాయికా దేవా? సన్తి, భిక్ఖవే, మూలగన్ధే అధివత్థా దేవా. సన్తి, భిక్ఖవే, సారగన్ధే అధివత్థా దేవా. సన్తి, భిక్ఖవే, ఫేగ్గుగన్ధే అధివత్థా దేవా. సన్తి, భిక్ఖవే, తచగన్ధే అధివత్థా దేవా. సన్తి, భిక్ఖవే, పపటికగన్ధే అధివత్థా దేవా. సన్తి, భిక్ఖవే, పత్తగన్ధే అధివత్థా దేవా. సన్తి, భిక్ఖవే, పుప్ఫగన్ధే అధివత్థా దేవా. సన్తి, భిక్ఖవే, ఫలగన్ధే అధివత్థా దేవా. సన్తి, భిక్ఖవే, రసగన్ధే అధివత్థా దేవా. సన్తి, భిక్ఖవే, గన్ధగన్ధే అధివత్థా దేవా. ఇమే వుచ్చన్తి, భిక్ఖవే, గన్ధబ్బకాయికా దేవా’’తి. పఠమం.