౧౧. నిబ్బిదాబహులసుత్తం

౧౪౬. సావత్థినిదానం. ‘‘సద్ధాపబ్బజితస్స, భిక్ఖవే, కులపుత్తస్స అయమనుధమ్మో హోతి – యం రూపే నిబ్బిదాబహులో [నిబ్బిదాబహులం (స్యా. కం. పీ. క.)] విహరేయ్య. వేదనాయ…పే… సఞ్ఞాయ… సఙ్ఖారేసు… విఞ్ఞాణే నిబ్బిదాబహులో విహరేయ్య. యో రూపే నిబ్బిదాబహులో విహరన్తో, వేదనాయ… సఞ్ఞాయ… సఙ్ఖారేసు… విఞ్ఞాణే నిబ్బిదాబహులో విహరన్తో రూపం పరిజానాతి, వేదనం… సఞ్ఞం… సఙ్ఖారే… విఞ్ఞాణం పరిజానాతి; సో రూపం పరిజానం వేదనం పరిజానం సఞ్ఞం పరిజానం సఙ్ఖారే పరిజానం విఞ్ఞాణం పరిజానం పరిముచ్చతి రూపమ్హా, పరిముచ్చతి వేదనాయ, పరిముచ్చతి సఞ్ఞాయ, పరిముచ్చతి సఙ్ఖారేహి, పరిముచ్చతి విఞ్ఞాణమ్హా, పరిముచ్చతి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి; ‘పరిముచ్చతి దుక్ఖస్మా’తి వదామీ’’తి. ఏకాదసమం.