౧౩. సద్ధమ్మప్పతిరూపకసుత్తం

౧౫౬. ఏవం మే సుతం – ఏకం సమయం భగవా సావత్థియం విహరతి జేతవనే అనాథపిణ్డికస్స ఆరామే. అథ ఖో ఆయస్మా మహాకస్సపో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో ఆయస్మా మహాకస్సపో భగవన్తం ఏతదవోచ – ‘‘కో ను ఖో, భన్తే, హేతు కో పచ్చయో, యేన పుబ్బే అప్పతరాని చేవ సిక్ఖాపదాని అహేసుం బహుతరా చ భిక్ఖూ అఞ్ఞాయ సణ్ఠహింసు? కో పన, భన్తే, హేతు కో పచ్చయో, యేనేతరహి బహుతరాని చేవ సిక్ఖాపదాని అప్పతరా చ భిక్ఖూ అఞ్ఞాయ సణ్ఠహన్తీ’’తి? ‘‘ఏవఞ్చేతం, కస్సప, హోతి సత్తేసు హాయమానేసు సద్ధమ్మే అన్తరధాయమానే, బహుతరాని చేవ సిక్ఖాపదాని హోన్తి అప్పతరా చ భిక్ఖూ అఞ్ఞాయ సణ్ఠహన్తి. న తావ, కస్సప, సద్ధమ్మస్స అన్తరధానం హోతి యావ న సద్ధమ్మప్పతిరూపకం లోకే ఉప్పజ్జతి. యతో చ ఖో, కస్సప, సద్ధమ్మప్పతిరూపకం లోకే ఉప్పజ్జతి, అథ సద్ధమ్మస్స అన్తరధానం హోతి’’.

‘‘సేయ్యథాపి, కస్సప, న తావ జాతరూపస్స అన్తరధానం హోతి యావ న జాతరూపప్పతిరూపకం లోకే ఉప్పజ్జతి. యతో చ ఖో, కస్సప, జాతరూపప్పతిరూపకం లోకే ఉప్పజ్జతి, అథ జాతరూపస్స అన్తరధానం హోతి. ఏవమేవ ఖో, కస్సప, న తావ సద్ధమ్మస్స అన్తరధానం హోతి యావ న సద్ధమ్మప్పతిరూపకం లోకే ఉప్పజ్జతి. యతో చ ఖో, కస్సప, సద్ధమ్మప్పతిరూపకం లోకే ఉప్పజ్జతి, అథ సద్ధమ్మస్స అన్తరధానం హోతి.

‘‘న ఖో, కస్సప, పథవీధాతు సద్ధమ్మం అన్తరధాపేతి, న ఆపోధాతు సద్ధమ్మం అన్తరధాపేతి, న తేజోధాతు సద్ధమ్మం అన్తరధాపేతి, న వాయోధాతు సద్ధమ్మం అన్తరధాపేతి; అథ ఖో ఇధేవ తే ఉప్పజ్జన్తి మోఘపురిసా యే ఇమం సద్ధమ్మం అన్తరధాపేన్తి. సేయ్యథాపి, కస్సప, నావా ఆదికేనేవ ఓపిలవతి; న ఖో, కస్సప, ఏవం సద్ధమ్మస్స అన్తరధానం హోతి.

‘‘పఞ్చ ఖోమే, కస్సప, ఓక్కమనియా ధమ్మా సద్ధమ్మస్స సమ్మోసాయ అన్తరధానాయ సంవత్తన్తి. కతమే పఞ్చ? ఇధ, కస్సప, భిక్ఖూ భిక్ఖునియో ఉపాసకా ఉపాసికాయో సత్థరి అగారవా విహరన్తి అప్పతిస్సా, ధమ్మే అగారవా విహరన్తి అప్పతిస్సా, సఙ్ఘే అగారవా విహరన్తి అప్పతిస్సా, సిక్ఖాయ అగారవా విహరన్తి అప్పతిస్సా, సమాధిస్మిం అగారవా విహరన్తి అప్పతిస్సా – ఇమే ఖో, కస్సప, పఞ్చ ఓక్కమనియా ధమ్మా సద్ధమ్మస్స సమ్మోసాయ అన్తరధానాయ సంవత్తన్తి.

‘‘పఞ్చ ఖోమే, కస్సప, ధమ్మా సద్ధమ్మస్స ఠితియా అసమ్మోసాయ అనన్తరధానాయ సంవత్తన్తి. కతమే పఞ్చ? ఇధ, కస్సప, భిక్ఖూ భిక్ఖునియో ఉపాసకా ఉపాసికాయో సత్థరి సగారవా విహరన్తి సప్పతిస్సా, ధమ్మే సగారవా విహరన్తి సప్పతిస్సా, సఙ్ఘే సగారవా విహరన్తి సప్పతిస్సా, సిక్ఖాయ సగారవా విహరన్తి సప్పతిస్సా, సమాధిస్మిం సగారవా విహరన్తి సప్పతిస్సా – ఇమే ఖో, కస్సప, పఞ్చ ధమ్మా సద్ధమ్మస్స ఠితియా అసమ్మోసాయ అనన్తరధానాయ సంవత్తన్తీ’’తి. తేరసమం.

కస్సపసంయుత్తం సమత్తం.