౩. భద్దత్థేరగాథా

౪౭౩. ‘‘ఏకపుత్తో అహం ఆసిం, పియో మాతు పియో పితు;

బహూహి వతచరియాహి, లద్ధో ఆయాచనాహి చ.

౪౭౪. ‘‘తే చ మం అనుకమ్పాయ, అత్థకామా హితేసినో;

ఉభో పితా చ మాతా చ, బుద్ధస్స ఉపనామయుం’’.

౪౭౫. ‘‘కిచ్ఛా లద్ధో అయం పుత్తో, సుఖుమాలో సుఖేధితో;

ఇమం దదామ తే నాథ, జినస్స పరిచారకం’’.

౪౭౬. ‘‘సత్థా చ మం పటిగ్గయ్హ, ఆనన్దం ఏతదబ్రవి;

‘పబ్బాజేహి ఇమం ఖిప్పం, హేస్సత్యాజానియో అయం.

౪౭౭. ‘‘పబ్బాజేత్వాన మం సత్థా, విహారం పావిసీ జినో;

అనోగ్గతస్మిం సూరియస్మిం, తతో చిత్తం విముచ్చి మే.

౪౭౮. ‘‘తతో సత్థా నిరాకత్వా, పటిసల్లానవుట్ఠితో;

‘ఏహి భద్దా’తి మం ఆహ, సా మే ఆసూపసమ్పదా.

౪౭౯. ‘‘జాతియా సత్తవస్సేన, లద్ధా మే ఉపసమ్పదా;

తిస్సో విజ్జా అనుప్పత్తా, అహో ధమ్మసుధమ్మతా’’తి.

… భద్దో థేరో….