౮. నిధికణ్డసుత్తం

౧. నిధిం నిధేతి పురిసో, గమ్భీరే ఓదకన్తికే;

అత్థే కిచ్చే సముప్పన్నే, అత్థాయ మే భవిస్సతి.

౨. రాజతో వా దురుత్తస్స, చోరతో పీళితస్స వా;

ఇణస్స వా పమోక్ఖాయ, దుబ్భిక్ఖే ఆపదాసు వా;

ఏతదత్థాయ లోకస్మిం, నిధి నామ నిధీయతి.

౩. తావస్సునిహితో [తావ సునిహితో (సీ.)] సన్తో, గమ్భీరే ఓదకన్తికే;

న సబ్బో సబ్బదా ఏవ, తస్స తం ఉపకప్పతి.

౪. నిధి వా ఠానా చవతి, సఞ్ఞా వాస్స విముయ్హతి;

నాగా వా అపనామేన్తి, యక్ఖా వాపి హరన్తి నం.

౫. అప్పియా వాపి దాయాదా, ఉద్ధరన్తి అపస్సతో;

యదా పుఞ్ఞక్ఖయో హోతి, సబ్బమేతం వినస్సతి.

౬. యస్స దానేన సీలేన, సంయమేన దమేన చ;

నిధీ సునిహితో హోతి, ఇత్థియా పురిసస్స వా.

౭. చేతియమ్హి చ సఙ్ఘే వా, పుగ్గలే అతిథీసు వా;

మాతరి పితరి చాపి [వాపి (స్యా. కం.)], అథో జేట్ఠమ్హి భాతరి.

౮. ఏసో నిధి సునిహితో, అజేయ్యో అనుగామికో;

పహాయ గమనీయేసు, ఏతం ఆదాయ గచ్ఛతి.

౯. అసాధారణమఞ్ఞేసం, అచోరాహరణో నిధి;

కయిరాథ ధీరో పుఞ్ఞాని, యో నిధి అనుగామికో.

౧౦. ఏస దేవమనుస్సానం, సబ్బకామదదో నిధి;

యం యదేవాభిపత్థేన్తి, సబ్బమేతేన లబ్భతి.

౧౧. సువణ్ణతా సుసరతా, సుసణ్ఠానా సురూపతా [సుసణ్ఠానసురూపతా (సీ.), సుసణ్ఠానం సురూపతా (స్యా. కం.)];

ఆధిపచ్చపరివారో, సబ్బమేతేన లబ్భతి.

౧౨. పదేసరజ్జం ఇస్సరియం, చక్కవత్తిసుఖం పియం;

దేవరజ్జమ్పి దిబ్బేసు, సబ్బమేతేన లబ్భతి.

౧౩. మానుస్సికా చ సమ్పత్తి, దేవలోకే చ యా రతి;

యా చ నిబ్బానసమ్పత్తి, సబ్బమేతేన లబ్భతి.

౧౪. మిత్తసమ్పదమాగమ్మ, యోనిసోవ [యోనిసో వే (సీ.), యోనిసో చే (స్యా.), యోనిసో చ (?)] పయుఞ్జతో;

విజ్జా విముత్తి వసీభావో, సబ్బమేతేన లబ్భతి.

౧౫. పటిసమ్భిదా విమోక్ఖా చ, యా చ సావకపారమీ;

పచ్చేకబోధి బుద్ధభూమి, సబ్బమేతేన లబ్భతి.

౧౬. ఏవం మహత్థికా ఏసా, యదిదం పుఞ్ఞసమ్పదా;

తస్మా ధీరా పసంసన్తి, పణ్డితా కతపుఞ్ఞతన్తి.

నిధికణ్డసుత్తం నిట్ఠితం.