౫. మఙ్గలసుత్తం

౧. ఏవం మే సుతం – ఏకం సమయం భగవా సావత్థియం విహరతి జేతవనే అనాథపిణ్డికస్స ఆరామే. అథ ఖో అఞ్ఞతరా దేవతా అభిక్కన్తాయ రత్తియా అభిక్కన్తవణ్ణా కేవలకప్పం జేతవనం ఓభాసేత్వా యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం అట్ఠాసి. ఏకమన్తం ఠితా ఖో సా దేవతా భగవన్తం గాథాయ అజ్ఝభాసి –

౨. ‘‘బహూ దేవా మనుస్సా చ, మఙ్గలాని అచిన్తయుం;

ఆకఙ్ఖమానా సోత్థానం, బ్రూహి మఙ్గలముత్తమం’’.

౩. ‘‘అసేవనా చ బాలానం, పణ్డితానఞ్చ సేవనా;

పూజా చ పూజనేయ్యానం [పూజనీయానం (సీ. స్యా. కం. పీ.)], ఏతం మఙ్గలముత్తమం.

౪. ‘‘పతిరూపదేసవాసో చ, పుబ్బే చ కతపుఞ్ఞతా;

అత్తసమ్మాపణిధి [అత్థసమ్మాపణీధీ (కత్థచి)] చ, ఏతం మఙ్గలముత్తమం.

౫. ‘‘బాహుసచ్చఞ్చ సిప్పఞ్చ, వినయో చ సుసిక్ఖితో;

సుభాసితా చ యా వాచా, ఏతం మఙ్గలముత్తమం.

౬. ‘‘మాతాపితు ఉపట్ఠానం, పుత్తదారస్స సఙ్గహో;

అనాకులా చ కమ్మన్తా, ఏతం మఙ్గలముత్తమం.

౭. ‘‘దానఞ్చ ధమ్మచరియా చ, ఞాతకానఞ్చ సఙ్గహో;

అనవజ్జాని కమ్మాని, ఏతం మఙ్గలముత్తమం.

౮. ‘‘ఆరతీ విరతీ పాపా, మజ్జపానా చ సంయమో;

అప్పమాదో చ ధమ్మేసు, ఏతం మఙ్గలముత్తమం.

౯. ‘‘గారవో చ నివాతో చ, సన్తుట్ఠి చ కతఞ్ఞుతా;

కాలేన ధమ్మస్సవనం [ధమ్మస్సావణం (క. సీ.), ధమ్మసవనం (క. సీ.)], ఏతం మఙ్గలముత్తమం.

౧౦. ‘‘ఖన్తీ చ సోవచస్సతా, సమణానఞ్చ దస్సనం;

కాలేన ధమ్మసాకచ్ఛా, ఏతం మఙ్గలముత్తమం.

౧౧. ‘‘తపో చ బ్రహ్మచరియఞ్చ, అరియసచ్చాన దస్సనం;

నిబ్బానసచ్ఛికిరియా చ, ఏతం మఙ్గలముత్తమం.

౧౨. ‘‘ఫుట్ఠస్స లోకధమ్మేహి, చిత్తం యస్స న కమ్పతి;

అసోకం విరజం ఖేమం, ఏతం మఙ్గలముత్తమం.

౧౩. ‘‘ఏతాదిసాని కత్వాన, సబ్బత్థమపరాజితా;

సబ్బత్థ సోత్థిం గచ్ఛన్తి, తం తేసం మఙ్గలముత్తమ’’న్తి.

మఙ్గలసుత్తం నిట్ఠితం.