౧౦. సిఙ్గాలవగ్గో
౨౪౧. సబ్బదాఠిజాతకం (౨-౧౦-౧)
౧౮౨. సిఙ్గాలో మానథద్ధో చ, పరివారేన అత్థికో;
పాపుణి మహతిం భూమిం, రాజాసి సబ్బదాఠినం.
౧౮౩. ఏవమేవ మనుస్సేసు, యో హోతి పరివారవా;
సో హి తత్థ మహా హోతి, సిఙ్గాలో వియ దాఠినన్తి.
సబ్బదాఠిజాతకం పఠమం.
౨౪౨. సునఖజాతకం (౨-౧౦-౨)
౧౮౪. బాలో వతాయం సునఖో, యో వరత్తం [యో చ యోత్తం (క.)] న ఖాదతి;
బన్ధనా చ పముఞ్చేయ్య, అసితో చ ఘరం వజే.
౧౮౫. అట్ఠితం మే మనస్మిం మే, అథో మే హదయే కతం;
కాలఞ్చ పటికఙ్ఖామి, యావ పస్సుపతూ జనో [పసుపతుజ్జనో (స్యా. క.)].
సునఖజాతకం దుతియం.
౨౪౩. గుత్తిలజాతకం (౨-౧౦-౩)
౧౮౬. సత్తతన్తిం సుమధురం, రామణేయ్యం అవాచయిం;
సో మం రఙ్గమ్హి అవ్హేతి, సరణం మే హోహి కోసియ.
౧౮౭. అహం తం సరణం సమ్మ [అహం తే సరణం హోమి (వి. వ. ౩౨౮)], అహమాచరియపూజకో;
న తం జయిస్సతి సిస్సో, సిస్సమాచరియ జేస్ససీతి.
గుత్తిలజాతకం తతియం.
౨౪౪. విగతిచ్ఛజాతకం (౨-౧౦-౪)
౧౮౮. యం పస్సతి న తం ఇచ్ఛతి, యఞ్చ న పస్సతి తం కిరిచ్ఛతి;
మఞ్ఞామి చిరం చరిస్సతి, న హి తం లచ్ఛతి యం స ఇచ్ఛతి.
౧౮౯. యం లభతి న తేన తుస్సతి, యఞ్చ పత్థేతి లద్ధం హీళేతి;
ఇచ్ఛా హి అనన్తగోచరా, విగతిచ్ఛాన [వీతిచ్ఛానం (సీ. పీ.)] నమో కరోమసేతి.
విగతిచ్ఛ [వీతిచ్ఛ (సీ. పీ.)] జాతకం చతుత్థం.
౨౪౫. మూలపరియాయజాతకం (౨-౧౦-౫)
౧౯౦. కాలో ఘసతి భూతాని, సబ్బానేవ సహత్తనా;
యో చ కాలఘసో భూతో, స భూతపచనిం పచి.
౧౯౧. బహూని నరసీసాని, లోమసాని బ్రహాని చ;
గీవాసు పటిముక్కాని, కోచిదేవేత్థ కణ్ణవాతి.
మూలపరియాయజాతకం పఞ్చమం.
౨౪౬. బాలోవాదజాతకం (౨-౧౦-౬)
౧౯౨. హన్త్వా ఛేత్వా [ఝత్వా (సీ. పీ.), ఘత్వా (స్యా.)] వధిత్వా చ, దేతి దానం అసఞ్ఞతో;
ఏదిసం భత్తం భుఞ్జమానో, స పాపముపలిమ్పతి [స పాపేన ఉపలిప్పతి (సీ. పీ.)].
౧౯౩. పుత్తదారమ్పి చే హన్త్వా, దేతి దానం అసఞ్ఞతో;
భుఞ్జమానోపి సప్పఞ్ఞో, న పాపముపలిమ్పతీతి.
బాలోవాదజాతకం ఛట్ఠం.
౨౪౭. పాదఞ్జలీజాతకం (౨-౧౦-౭)
౧౯౪. అద్ధా పాదఞ్జలీ సబ్బే, పఞ్ఞాయ అతిరోచతి;
తథా హి ఓట్ఠం భఞ్జతి, ఉత్తరిం నూన పస్సతి.
౧౯౫. నాయం ధమ్మం అధమ్మం వా, అత్థానత్థఞ్చ బుజ్ఝతి;
అఞ్ఞత్ర ఓట్ఠనిబ్భోగా, నాయం జానాతి కిఞ్చనన్తి.
పాదఞ్జలీజాతకం సత్తమం.
౨౪౮. కింసుకోపమజాతకం (౨-౧౦-౮)
౧౯౬. సబ్బేహి కింసుకో దిట్ఠో, కింన్వేత్థ విచికిచ్ఛథ;
న హి సబ్బేసు ఠానేసు, సారథీ పరిపుచ్ఛితో.
౧౯౭. ఏవం సబ్బేహి ఞాణేహి, యేసం ధమ్మా అజానితా;
తే వే ధమ్మేసు కఙ్ఖన్తి, కింసుకస్మింవ భాతరోతి.
కింసుకోపమజాతకం అట్ఠమం.
౨౪౯. సాలకజాతకం (౨-౧౦-౯)
౧౯౮. ఏకపుత్తకో భవిస్ససి, త్వఞ్చ నో హేస్ససి ఇస్సరో కులే;
ఓరోహ దుమస్మా సాలక, ఏహి దాని ఘరకం వజేమసే.
౧౯౯. నను మం సుహదయోతి [నను మం హదయేతి (సీ. పీ.)] మఞ్ఞసి, యఞ్చ మం హనసి వేళుయట్ఠియా;
పక్కమ్బవనే రమామసే, గచ్ఛ త్వం ఘరకం యథాసుఖన్తి.
సాలకజాతకం నవమం.
౨౫౦. కపిజాతకం (౨-౧౦-౧౦)
౨౦౦. అయం ఇసీ ఉపసమసంయమే రతో, స తిట్ఠతి [సన్తిట్ఠతి (సీ. పీ.)] సిసిరభయేన అట్టితో;
హన్ద అయం పవిసతుమం అగారకం, వినేతు సీతం దరథఞ్చ కేవలం.
౨౦౧. నాయం ఇసీ ఉపసమసంయమే రతో, కపీ అయం దుమవరసాఖగోచరో;
సో దూసకో రోసకో చాపి జమ్మో, సచేవజేమమ్పి [సచే + ఆవజే + ఇమమ్పి] దూసేయ్యగారన్తి [దూసయే ఘరన్తి (సీ. స్యా. పీ.)].
కపిజాతకం దసమం.
సిఙ్గాలవగ్గో దసమో.
తస్సుద్దానం –
అథ రాజా సిఙ్గాలవరో సునఖో, తథా కోసియ ఇచ్ఛతి కాలఘసో;
అథ దానవరోట్ఠపి సారథినా, పునమ్బవనఞ్చ సిసిరకపి దసాతి.
అథ వగ్గుద్దానం –
దళ్హఞ్చ వగ్గం అపరేన సన్థవం, కల్యాణవగ్గాసదిసో చ రూహకం;
నతందళ్హ బీరణథమ్భకం పున, కాసావుపాహన సిఙ్గాలకేన దసాతి.
దుకనిపాతం నిట్ఠితం.