౪౮౪. సాలికేదారజాతకం (౧)

౧. సమ్పన్నం సాలికేదారం, సువా భుఞ్జన్తి కోసియ;

పటివేదేమి తే బ్రహ్మే, న నే [తే (సీ. స్యా.), నం (సీ. స్యా. పీ. అట్ఠ.), తం (క. అట్ఠ.)] వారేతుముస్సహే.

౨. ఏకో చ తత్థ సకుణో, యో నేసం [తేసం (సీ. అట్ఠ.)] సబ్బసున్దరో;

భుత్వా సాలిం యథాకామం, తుణ్డేనాదాయ గచ్ఛతి.

౩. ఓడ్డేన్తు [ఉజ్ఝున్తు (స్యా. క.) అఙ్గుత్తరనికాయే పస్సితబ్బం] వాళపాసాని, యథా వజ్ఝేథ సో దిజో;

జీవఞ్చ నం గహేత్వాన, ఆనయేహి [ఆనయేథ (సీ. పీ.)] మమన్తికే.

౪. ఏతే భుత్వా పివిత్వా చ [భుత్వా చ పిత్వా చ (పీ.)], పక్కమన్తి విహఙ్గమా;

ఏకో బద్ధోస్మి పాసేన, కిం పాపం పకతం మయా.

౫. ఉదరం నూన అఞ్ఞేసం, సువ అచ్చోదరం తవ;

భుత్వా సాలిం యథాకామం, తుణ్డేనాదాయ గచ్ఛసి.

౬. కోట్ఠం ను తత్థ పూరేసి, సువ వేరం ను తే మయా;

పుట్ఠో మే సమ్మ అక్ఖాహి, కుహిం సాలిం నిదాహసి [నిధీయసి (పీ.)].

౭. న మే వేరం తయా సద్ధిం, కోట్ఠో మయ్హం న విజ్జతి;

ఇణం ముఞ్చామిణం దమ్మి, సమ్పత్తో కోటసిమ్బలిం;

నిధిమ్పి తత్థ నిదహామి, ఏవం జానాహి కోసియ.

౮. కీదిసం తే ఇణదానం, ఇణమోక్ఖో చ కీదిసో;

నిధినిధానమక్ఖాహి, అథ పాసా పమోక్ఖసి.

౯. అజాతపక్ఖా తరుణా, పుత్తకా మయ్హ కోసియ;

తే మం భతా భరిస్సన్తి, తస్మా తేసం ఇణం దదే.

౧౦. మాతా పితా చ మే వుద్ధా, జిణ్ణకా గతయోబ్బనా;

తేసం తుణ్డేన హాతూన, ముఞ్చే పుబ్బకతం [పుబ్బే కతం (సీ.)] ఇణం.

౧౧. అఞ్ఞేపి తత్థ సకుణా, ఖీణపక్ఖా సుదుబ్బలా;

తేసం పుఞ్ఞత్థికో దమ్మి, తం నిధిం ఆహు పణ్డితా.

౧౨. ఈదిసం [ఏదిసం (సీ. పీ.)] మే ఇణదానం, ఇణమోక్ఖో చ ఈదిసో;

నిధినిధానమక్ఖామి [నిధిం నిధానం అక్ఖాతం (సీ. పీ.)], ఏవం జానాహి కోసియ.

౧౩. భద్దకో వతయం పక్ఖీ, దిజో పరమధమ్మికో;

ఏకచ్చేసు మనుస్సేసు, అయం ధమ్మో న విజ్జతి.

౧౪. భుఞ్జ సాలిం యథాకామం, సహ సబ్బేహి ఞాతిభి;

పునాపి సువ పస్సేము, పియం మే తవ దస్సనం.

౧౫. భుత్తఞ్చ పీతఞ్చ తవస్సమమ్హి [తవస్సబ్యమ్హి (క.)], రత్తిఞ్చ [రతీ చ (సీ. పీ.)] నో కోసియ తే సకాసే;

నిక్ఖిత్తదణ్డేసు దదాహి దానం, జిణ్ణే చ మాతాపితరో భరస్సు.

౧౬. లక్ఖీ వత మే ఉదపాది అజ్జ, యో అద్దసాసిం పవరం [యోహం అదస్సం పరమం (స్యా. క.)] దిజానం;

సువస్స సుత్వాన సుభాసితాని, కాహామి పుఞ్ఞాని అనప్పకాని.

౧౭. సో కోసియో అత్తమనో ఉదగ్గో, అన్నఞ్చ పానఞ్చభిసఙ్ఖరిత్వా [అన్నఞ్చ పానం అభిసంహరిత్వా (క.)];

అన్నేన పానేన పసన్నచిత్తో, సన్తప్పయి సమణబ్రాహ్మణే చాతి.

సాలికేదారజాతకం [కేదారజాతకం (క.)] పఠమం.