౧. అపణ్ణకవగ్గో

౧. అపణ్ణకజాతకం

౧. అపణ్ణకం ఠానమేకే, దుతియం ఆహు తక్కికా;

ఏతదఞ్ఞాయ మేధావీ, తం గణ్హే యదపణ్ణకన్తి [తం గణ్హేయ్య అపణ్ణకం (క.)].

అపణ్ణకజాతకం పఠమం.

౨. వణ్ణుపథజాతకం

౨. అకిలాసునో వణ్ణుపథే [వణ్ణపథే (క.)] ఖణన్తా, ఉదఙ్గణే తత్థ పపం అవిన్దుం;

ఏవం మునీ వీరియ [ముని విరియ (పీ.), ముని వీరియ (స్యా. క.)] బలూపపన్నో, అకిలాసు విన్దే హదయస్స సన్తిన్తి.

వణ్ణుపథజాతకం దుతియం.

౩. సేరివవాణిజజాతకం

౩. ఇధ చే నం [ఇధ చే హి నం (సీ. పీ.)] విరాధేసి, సద్ధమ్మస్స నియామతం [నియామకం (స్యా. క.)];

చిరం త్వం అనుతప్పేసి [అనుతపేస్ససి (సీ. పీ.), అనుతప్పిస్ససి (?)], సేరివాయంవ వాణిజోతి.

సేరివవాణిజజాతకం తతియం.

౪. చూళసేట్ఠిజాతకం

౪. అప్పకేనపి మేధావీ, పాభతేన విచక్ఖణో;

సముట్ఠాపేతి అత్తానం, అణుం అగ్గింవ సన్ధమన్తి.

చూళ [చుల్ల (సీ.), చుల్లక (స్యా. పీ.)] సేట్ఠిజాతకం చతుత్థం.

౫. తణ్డులనాళిజాతకం

౫. [కిమగ్ఘతీ తణ్డులనాళికా చ, బారాణసీ అన్తరబాహిరాని; అస్సపఞ్చసతే తాని, ఏకా తణ్డులనాళికాతి; (స్యా.)] కిమగ్ఘతి తణ్డులనాళికాయ, అస్సాన మూలాయ వదేహి రాజ [నాళికా చ (సీ.), నాళికాయ (క. సీ. అట్ఠ.)];

బారాణసిం సన్తరబాహిరతో [బాహిరన్తం (సీ.)], అయమగ్ఘతి తణ్డులనాళికాతి [కిమగ్ఘతీ వణ్డులనాళికా చ, బారాణసీ అన్తరబాహిరాని; అస్సపఞ్చసతే తాని, ఏకా తణ్డులనాళికాతి; (స్యా.)].

తణ్డులనాళిజాతకం పఞ్చమం.

౬. దేవధమ్మజాతకం

౬. హిరిఓత్తప్పసమ్పన్నా, సుక్కధమ్మసమాహితా;

సన్తో సప్పురిసా లోకే, దేవధమ్మాతి వుచ్చరేతి.

దేవధమ్మజాతకం ఛట్ఠం.

౭. కట్ఠహారిజాతకం

౭. పుత్తో త్యాహం మహారాజ, త్వం మం పోస జనాధిప;

అఞ్ఞేపి దేవో పోసేతి, కిఞ్చ [కిఞ్చి (క.)] దేవో సకం పజన్తి.

కట్ఠహారి [కట్ఠవాహన (క.)] జాతకం సత్తమం.

౮. గామణిజాతకం

౮. అపి అతరమానానం, ఫలాసావ సమిజ్ఝతి;

విపక్కబ్రహ్మచరియోస్మి, ఏవం జానాహి గామణీతి.

గామణిజాతకం అట్ఠమం.

౯. మఘదేవజాతకం

౯. ఉత్తమఙ్గరుహా మయ్హం, ఇమే జాతా వయోహరా;

పాతుభూతా దేవదూతా, పబ్బజ్జాసమయో మమాతి.

మఘదేవ [మఖాదేవ (సీ. పీ.), దేవదూత (క.)] జాతకం నవమం.

౧౦. సుఖవిహారిజాతకం

౧౦. యఞ్చ అఞ్ఞే న రక్ఖన్తి, యో చ అఞ్ఞే న రక్ఖతి;

స వే రాజ సుఖం సేతి, కామేసు అనపేక్ఖవాతి.

సుఖవిహారిజాతకం దసమం.

అపణ్ణకవగ్గో పఠమో.

తస్సుద్దానం –

వరాపణ్ణక వణ్ణుపథ సేరివరో, సువిచక్ఖణ తణ్డులనాళికస్సా;

హిరి పుత్తవరుత్తగామణినా, యో చ న రక్ఖతి తేన దసాతి.