౯. సబ్బఫలదాయకత్థేరఅపదానం

౫౧. ‘‘వరుణో నామ నామేన, బ్రాహ్మణో మన్తపారగూ;

ఛడ్డేత్వా దసపుత్తాని, వనమజ్ఝోగహిం తదా.

౫౨. ‘‘అస్సమం సుకతం కత్వా, సువిభత్తం మనోరమం;

పణ్ణసాలం కరిత్వాన, వసామి విపినే అహం.

౫౩. ‘‘పదుముత్తరో లోకవిదూ, ఆహుతీనం పటిగ్గహో;

మముద్ధరితుకామో సో, ఆగచ్ఛి మమ అస్సమం.

౫౪. ‘‘యావతా వనసణ్డమ్హి, ఓభాసో విపులో అహు;

బుద్ధస్స ఆనుభావేన, పజ్జలీ విపినం తదా.

౫౫. ‘‘దిస్వాన తం పాటిహీరం, బుద్ధసేట్ఠస్స తాదినో;

పత్తపుటం గహేత్వాన, ఫలేన పూజయిం అహం.

౫౬. ‘‘ఉపగన్త్వాన సమ్బుద్ధం, సహఖారిమదాసహం;

అనుకమ్పాయ మే బుద్ధో, ఇదం వచనమబ్రవి.

౫౭. ‘ఖారిభారం గహేత్వాన, పచ్ఛతో ఏహి మే తువం;

పరిభుత్తే చ సఙ్ఘమ్హి, పుఞ్ఞం తవ భవిస్సతి’.

౫౮. ‘‘పుటకన్తం గహేత్వాన, భిక్ఖుసఙ్ఘస్సదాసహం;

తత్థ చిత్తం పసాదేత్వా, తుసితం ఉపపజ్జహం.

౫౯. ‘‘తత్థ దిబ్బేహి నచ్చేహి, గీతేహి వాదితేహి చ;

పుఞ్ఞకమ్మేన సంయుత్తం, అనుభోమి సదా సుఖం.

౬౦. ‘‘యం యం యోనుపపజ్జామి, దేవత్తం అథ మానుసం;

భోగే మే ఊనతా నత్థి, ఫలదానస్సిదం ఫలం.

౬౧. ‘‘యావతా చతురో దీపా, ససముద్దా సపబ్బతా;

ఫలం బుద్ధస్స దత్వాన, ఇస్సరం కారయామహం.

౬౨. ‘‘యావతా మే పక్ఖిగణా, ఆకాసే ఉప్పతన్తి చే;

తేపి మం వసమన్వేన్తి, ఫలదానస్సిదం ఫలం.

౬౩. ‘‘యావతా వనసణ్డమ్హి, యక్ఖా భూతా చ రక్ఖసా;

కుమ్భణ్డా గరుళా చాపి, పారిచరియం ఉపేన్తి మే.

౬౪. ‘‘కుమ్భా సోణా మధుకారా, డంసా చ మకసా ఉభో;

తేపి మం వసమన్వేన్తి, ఫలదానస్సిదం ఫలం.

౬౫. ‘‘సుపణ్ణా నామ సకుణా, పక్ఖిజాతా మహబ్బలా;

తేపి మం సరణం యన్తి, ఫలదానస్సిదం ఫలం.

౬౬. ‘‘యేపి దీఘాయుకా నాగా, ఇద్ధిమన్తో మహాయసా;

తేపి మం వసమన్వేన్తి, ఫలదానస్సిదం ఫలం.

౬౭. ‘‘సీహా బ్యగ్ఘా చ దీపీ చ, అచ్ఛకోకతరచ్ఛకా;

తేపి మం వసమన్వేన్తి, ఫలదానస్సిదం ఫలం.

౬౮. ‘‘ఓసధీతిణవాసీ చ, యే చ ఆకాసవాసినో;

సబ్బే మం సరణం యన్తి, ఫలదానస్సిదం ఫలం.

౬౯. ‘‘సుదుద్దసం సునిపుణం, గమ్భీరం సుప్పకాసితం;

ఫస్సయిత్వా [ఫుసయిత్వా (క.)] విహరామి, ఫలదానస్సిదం ఫలం.

౭౦. ‘‘విమోక్ఖే అట్ఠ ఫుసిత్వా, విహరామి అనాసవో;

ఆతాపీ నిపకో చాహం, ఫలదానస్సిదం ఫలం.

౭౧. ‘‘యే ఫలట్ఠా బుద్ధపుత్తా, ఖీణదోసా మహాయసా;

అహమఞ్ఞతరో తేసం, ఫలదానస్సిదం ఫలం.

౭౨. ‘‘అభిఞ్ఞాపారమిం గన్త్వా, సుక్కమూలేన చోదితో;

సబ్బాసవే పరిఞ్ఞాయ, విహరామి అనాసవో.

౭౩. ‘‘తేవిజ్జా ఇద్ధిపత్తా చ, బుద్ధపుత్తా మహాయసా;

దిబ్బసోతసమాపన్నా, తేసం అఞ్ఞతరో అహం.

౭౪. ‘‘సతసహస్సితో కప్పే, యం ఫలం అదదిం తదా;

దుగ్గతిం నాభిజానామి, ఫలదానస్సిదం ఫలం.

౭౫. ‘‘కిలేసా ఝాపితా మయ్హం…పే… విహరామి అనాసవో.

౭౬. ‘‘స్వాగతం వత మే ఆసి…పే… కతం బుద్ధస్స సాసనం.

౭౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సబ్బఫలదాయకో థేరో ఇమా గాథాయో

అభాసిత్థాతి.

సబ్బఫలదాయకత్థేరస్సాపదానం నవమం.