౬. అజ్జునపుప్ఫియత్థేరఅపదానం

౨౮. ‘‘చన్దభాగానదీతీరే, అహోసిం కిన్నరో తదా;

అద్దసం విరజం బుద్ధం, సయమ్భుం అపరాజితం.

౨౯. ‘‘పసన్నచిత్తో సుమనో, వేదజాతో కతఞ్జలీ;

గహేత్వా అజ్జునం పుప్ఫం, సయమ్భుం అభిపూజయిం.

౩౦. ‘‘తేన కమ్మేన సుకతేన, చేతనాపణిధీహి చ;

జహిత్వా కిన్నరం దేహం, తావతింసమగచ్ఛహం.

౩౧. ‘‘ఛత్తింసక్ఖత్తుం దేవిన్దో, దేవరజ్జమకారయిం;

దసక్ఖత్తుం చక్కవత్తీ, మహారజ్జమకారయిం.

౩౨. ‘‘పదేసరజ్జం విపులం, గణనాతో అసఙ్ఖియం;

సుఖేత్తే వప్పితం బీజం, సయమ్భుమ్హి అహో మమ [అహోసి మే (స్యా.)].

౩౩. ‘‘కుసలం విజ్జతే మయ్హం, పబ్బజిం అనగారియం;

పూజారహో అహం అజ్జ, సక్యపుత్తస్స సాసనే.

౩౪. ‘‘కిలేసా ఝాపితా మయ్హం…పే… విహరామి అనాసవో.

౩౫. ‘‘స్వాగతం వత మే ఆసి…పే… కతం బుద్ధస్స సాసనం.

౩౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అజ్జునపుప్ఫియో థేరో ఇమా గాథాయో

అభాసిత్థాతి.

అజ్జునపుప్ఫియత్థేరస్సాపదానం ఛట్ఠం.