౯. సయంపటిభానియత్థేరఅపదానం

౪౫. ‘‘కకుధం విలసన్తంవ, దేవదేవం నరాసభం;

రథియం పటిపజ్జన్తం, కో దిస్వా న పసీదతి.

౪౬. ‘‘తమన్ధకారం నాసేత్వా, సన్తారేత్వా బహుం జనం;

ఞాణాలోకేన జోతన్తం, కో దిస్వా న పసీదతి.

౪౭. ‘‘వసీసతసహస్సేహి, నీయన్తం లోకనాయకం;

ఉద్ధరన్తం బహూ సత్తే, కో దిస్వా న పసీదతి.

౪౮. ‘‘ఆహనన్తం [ఆహనిత్వా (స్యా. క.)] ధమ్మభేరిం, మద్దన్తం తిత్థియే గణే;

సీహనాదం వినదన్తం, కో దిస్వా న పసీదతి.

౪౯. ‘‘యావతా బ్రహ్మలోకతో, ఆగన్త్వాన సబ్రహ్మకా;

పుచ్ఛన్తి నిపుణే పఞ్హే, కో దిస్వా న పసీదతి.

౫౦. ‘‘యస్సఞ్జలిం కరిత్వాన, ఆయాచన్తి సదేవకా;

తేన పుఞ్ఞం అనుభోన్తి, కో దిస్వా న పసీదతి.

౫౧. ‘‘సబ్బే జనా సమాగన్త్వా, సమ్పవారేన్తి చక్ఖుమం;

న వికమ్పతి అజ్ఝిట్ఠో, కో దిస్వా న పసీదతి.

౫౨. ‘‘నగరం పవిసతో యస్స, రవన్తి భేరియో బహూ;

వినదన్తి గజా మత్తా, కో దిస్వా న పసీదతి.

౫౩. ‘‘వీథియా [రథియా (సీ.)] గచ్ఛతో యస్స, సబ్బాభా జోతతే సదా;

అబ్భున్నతా సమా హోన్తి, కో దిస్వా న పసీదతి.

౫౪. ‘‘బ్యాహరన్తస్స బుద్ధస్స, చక్కవాళమ్పి సుయ్యతి;

సబ్బే సత్తే విఞ్ఞాపేతి, కో దిస్వా న పసీదతి.

౫౫. ‘‘సతసహస్సితో కప్పే, యం బుద్ధమభికిత్తయిం;

దుగ్గతిం నాభిజానామి, కిత్తనాయ ఇదం ఫలం.

౫౬. ‘‘కిలేసా ఝాపితా మయ్హం…పే… విహరామి అనాసవో.

౫౭. ‘‘స్వాగతం వత మే ఆసి…పే… కతం బుద్ధస్స సాసనం.

౫౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సయంపటిభానియో థేరో ఇమా గాథాయో

అభాసిత్థాతి.

సయంపటిభానియత్థేరస్సాపదానం నవమం.