౭. లబుజఫలదాయకత్థేరఅపదానం

౩౨. ‘‘నగరే బన్ధుమతియా, ఆరామికో అహం తదా;

అద్దసం విరజం బుద్ధం, గచ్ఛన్తం అనిలఞ్జసే.

౩౩. ‘‘లబుజం ఫలమాదాయ, బుద్ధసేట్ఠస్సదాసహం;

ఆకాసేవ ఠితో సన్తో, పటిగ్గణ్హి మహాయసో.

౩౪. ‘‘విత్తిసఞ్జననో మయ్హం, దిట్ఠధమ్మసుఖావహో;

ఫలం బుద్ధస్స దత్వాన, విప్పసన్నేన చేతసా.

౩౫. ‘‘అధిగఞ్ఛిం తదా పీతిం, విపులం సుఖముత్తమం;

ఉప్పజ్జతేవ [ఉప్పజ్జతే మే (స్యా.)] రతనం, నిబ్బత్తస్స తహిం తహిం.

౩౬. ‘‘ఏకనవుతితో కప్పే, యం ఫలం అదదిం తదా;

దుగ్గతిం నాభిజానామి, ఫలదానస్సిదం ఫలం.

౩౭. ‘‘కిలేసా ఝాపితా మయ్హం…పే… విహరామి అనాసవో.

౩౮. ‘‘స్వాగతం వత మే ఆసి…పే… కతం బుద్ధస్స సాసనం.

౩౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా లబుజఫలదాయకో థేరో ఇమా

గాథాయో అభాసిత్థాతి.

లబుజఫలదాయకత్థేరస్సాపదానం సత్తమం.