౧. జగతిదాయకత్థేరఅపదానం

౧. ‘‘ధమ్మదస్సిస్స మునినో, బోధియా పాదపుత్తమే;

పసన్నచిత్తో సుమనో, జగతిం కారయిం అహం.

౨. ‘‘దరితో పబ్బతతో వా, రుక్ఖతో పతితో అహం;

చుతో పతిట్ఠం విన్దామి, జగతియా ఇదం ఫలం.

౩. ‘‘న మే చోరా విహేసన్తి, నాతిమఞ్ఞన్తి ఖత్తియా [పసహన్తి, నాతిమఞ్ఞతి ఖత్తియో (సీ. పీ.)];

సబ్బామిత్తేతిక్కమామి, జగతియా ఇదం ఫలం.

౪. ‘‘యం యం యోనుపపజ్జామి, దేవత్తం అథ మానుసం;

సబ్బత్థ పూజితో హోమి, జగతియా ఇదం ఫలం.

౫. ‘‘అట్ఠారసే కప్పసతే, జగతిం కారయిం అహం;

దుగ్గతిం నాభిజానామి, జగతిదానస్సిదం ఫలం.

౬. ‘‘కిలేసా ఝాపితా మయ్హం, భవా సబ్బే సమూహతా;

నాగోవ బన్ధనం ఛేత్వా, విహరామి అనాసవో.

౭. ‘‘స్వాగతం వత మే ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౮. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా జగతిదాయకో థేరో ఇమా గాథాయో

అభాసిత్థాతి.

జగతిదాయకత్థేరస్సాపదానం పఠమం.