౮. పాదపీఠియత్థేరఅపదానం

౫౦. ‘‘సుమేధో నామ సమ్బుద్ధో, అగ్గో కారుణికో ముని;

తారయిత్వా బహూ సత్తే, నిబ్బుతో సో మహాయసో.

౫౧. ‘‘సీహాసనస్స సామన్తా, సుమేధస్స మహేసినో;

పసన్నచిత్తో సుమనో, పాదపీఠమకారయిం.

౫౨. ‘‘కత్వాన కుసలం కమ్మం, సుఖపాకం సుఖుద్రయం;

పుఞ్ఞకమ్మేన సంయుత్తో, తావతింసమగచ్ఛహం.

౫౩. ‘‘తత్థ మే వసమానస్స, పుఞ్ఞకమ్మసమఙ్గినో;

పదాని ఉద్ధరన్తస్స, సోణ్ణపీఠా భవన్తి మే.

౫౪. ‘‘లాభా తేసం సులద్ధం వో, యే లభన్తి ఉపస్సుతిం;

నిబ్బుతే కారం కత్వాన, లభన్తి విపులం సుఖం.

౫౫. ‘‘మయాపి సుకతం కమ్మం, వాణిజ్జం సుప్పయోజితం;

పాదపీఠం కరిత్వాన, సోణ్ణపీఠం లభామహం.

౫౬. ‘‘యం యం దిసం పక్కమామి, కేనచి కిచ్చయేనహం [పచ్చయేనహం (సీ. పీ.)];

సోణ్ణపీఠే అక్కమామి [సోణ్ణపీఠేన కమామి (క.)], పుఞ్ఞకమ్మస్సిదం ఫలం.

౫౭. ‘‘తింసకప్పసహస్సమ్హి, యం కమ్మమకరిం తదా;

దుగ్గతిం నాభిజానామి, పాదపీఠస్సిదం ఫలం.

౫౮. ‘‘కిలేసా ఝాపితా మయ్హం…పే… విహరామి అనాసవో.

౫౯. ‘‘స్వాగతం వత మే ఆసి…పే… కతం బుద్ధస్స సాసనం.

౬౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పాదపీఠియో థేరో ఇమా గాథాయో

అభాసిత్థాతి.

పాదపీఠియత్థేరస్సాపదానం అట్ఠమం.