౮. హరీతకదాయకత్థేరఅపదానం

౬౦. ‘‘హరీతకం ఆమలకం, అమ్బజమ్బువిభీతకం;

కోలం భల్లాతకం బిల్లం, సయమేవ హరామహం.

౬౧. ‘‘దిస్వాన పబ్భారగతం, ఝాయిం ఝానరతం మునిం;

ఆబాధేన ఆపీళేన్తం, అదుతీయం మహామునిం.

౬౨. ‘‘హరీతకం గహేత్వాన, సయమ్భుస్స అదాసహం;

ఖాదమత్తమ్హి భేసజ్జే, బ్యాధి పస్సమ్భి [పస్సద్ధి (క.)] తావదే.

౬౩. ‘‘పహీనదరథో బుద్ధో, అనుమోదమకాసి మే;

‘భేసజ్జదానేనిమినా, బ్యాధివూపసమేన చ.

౬౪. ‘‘‘దేవభూతో మనుస్సో వా, జాతో వా అఞ్ఞజాతియా;

సబ్బత్థ సుఖితో హోతు, మా చ తే బ్యాధిమాగమా’.

౬౫. ‘‘ఇదం వత్వాన సమ్బుద్ధో, సయమ్భూ అపరాజితో;

నభం అబ్భుగ్గమీ ధీరో, హంసరాజావ అమ్బరే.

౬౬. ‘‘యతో హరీతకం దిన్నం, సయమ్భుస్స మహేసినో;

ఇమం జాతిం ఉపాదాయ, బ్యాధి మే నుపపజ్జథ.

౬౭. ‘‘అయం పచ్ఛిమకో మయ్హం, చరిమో వత్తతే భవో;

తిస్సో విజ్జా సచ్ఛికతా, కతం బుద్ధస్స సాసనం.

౬౮. ‘‘చతున్నవుతితో కప్పే, భేసజ్జమదదిం తదా;

దుగ్గతిం నాభిజానామి, భేసజ్జస్స ఇదం ఫలం.

౬౯. ‘‘కిలేసా ఝాపితా మయ్హం…పే… విహరామి అనాసవో.

౭౦. ‘‘స్వాగతం వత మే ఆసి…పే… కతం బుద్ధస్స సాసనం.

౭౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా హరీతకదాయకో థేరో ఇమా గాథాయో

అభాసిత్థాతి.

హరీతకదాయకత్థేరస్సాపదానం అట్ఠమం.