౩. పాటిహీరసఞ్ఞకత్థేరఅపదానం

౨౬. ‘‘పదుముత్తరో నామ జినో, ఆహుతీనం పటిగ్గహో;

వసీసతసహస్సేహి, నగరం పావిసీ తదా.

౨౭. ‘‘నగరం పవిసన్తస్స, ఉపసన్తస్స తాదినో;

రతనాని పజ్జోతింసు [పనాదింసు (పీ.)], నిగ్ఘోసో ఆసి తావదే.

౨౮. ‘‘బుద్ధస్స ఆనుభావేన, భేరీ వజ్జుమఘట్టితా;

సయం వీణా పవజ్జన్తి, బుద్ధస్స పవిసతో పురం.

౨౯. ‘‘బుద్ధసేట్ఠం నమస్సామి [న పస్సామి (సీ.)], పదుముత్తరమహామునిం;

పాటిహీరఞ్చ పస్సిత్వా, తత్థ చిత్తం పసాదయిం.

౩౦. ‘‘అహో బుద్ధో అహో ధమ్మో, అహో నో సత్థుసమ్పదా;

అచేతనాపి తురియా, సయమేవ పవజ్జరే.

౩౧. ‘‘సతసహస్సితో కప్పే, యం సఞ్ఞమలభిం తదా;

దుగ్గతిం నాభిజానామి, బుద్ధసఞ్ఞాయిదం ఫలం.

౩౨. ‘‘కిలేసా ఝాపితా మయ్హం…పే… విహరామి అనాసవో.

౩౩. ‘‘స్వాగతం వత మే ఆసి…పే… కతం బుద్ధస్స సాసనం.

౩౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పాటిహీరసఞ్ఞకో థేరో ఇమా గాథాయో

అభాసిత్థాతి.

పాటిహీరసఞ్ఞకత్థేరస్సాపదానం తతియం.