౧. సకింసమ్మజ్జకత్థేరఅపదానం

౧. ‘‘విపస్సినో భగవతో, పాటలిం బోధిముత్తమం;

దిస్వావ తం పాదపగ్గం, తత్థ చిత్తం పసాదయిం.

౨. ‘‘సమ్మజ్జనిం గహేత్వాన, బోధిం సమ్మజ్జి తావదే;

సమ్మజ్జిత్వాన తం బోధిం, అవన్దిం పాటలిం అహం.

౩. ‘‘తత్థ చిత్తం పసాదేత్వా, సిరే కత్వాన అఞ్జలిం;

నమస్సమానో తం బోధిం, గఞ్ఛిం పటికుటిం అహం.

౪. ‘‘తాదిమగ్గేన గచ్ఛామి, సరన్తో బోధిముత్తమం;

అజగరో మం పీళేసి, ఘోరరూపో మహబ్బలో.

౫. ‘‘ఆసన్నే మే కతం కమ్మం, ఫలేన తోసయీ మమం;

కళేవరం మే గిలతి, దేవలోకే రమామహం.

౬. ‘‘అనావిలం మమ చిత్తం, విసుద్ధం పణ్డరం సదా;

సోకసల్లం న జానామి, చిత్తసన్తాపనం మమ.

౭. ‘‘కుట్ఠం గణ్డో కిలాసో చ, అపమారో వితచ్ఛికా;

దద్దు కణ్డు చ మే నత్థి, ఫలం సమ్మజ్జనాయిదం [సమ్మజ్జనే ఇదం (సీ.)].

౮. ‘‘సోకో చ పరిదేవో చ, హదయే మే న విజ్జతి;

అభన్తం ఉజుకం చిత్తం, ఫలం సమ్మజ్జనాయిదం.

౯. ‘‘సమాధీసు న మజ్జామి [సమాధీసు న సజ్జామి (సీ.), సమాధిం పున పజ్జామి (స్యా)], విసదం హోతి మానసం;

యం యం సమాధిమిచ్ఛామి, సో సో సమ్పజ్జతే మమం.

౧౦. ‘‘రజనీయే న రజ్జామి, అథో దుస్సనియేసు [దోసనియేసు (సీ. స్యా. క.)] చ;

మోహనీయే న ముయ్హామి, ఫలం సమ్మజ్జనాయిదం.

౧౧. ‘‘ఏకనవుతితో [ఏకనవుతే ఇతో (సీ. స్యా.)] కప్పే, యం కమ్మమకరిం తదా;

దుగ్గతిం నాభిజానామి, ఫలం సమ్మజ్జనాయిదం.

౧౨. ‘‘కిలేసా ఝాపితా మయ్హం, భవా సబ్బే సమూహతా;

నాగోవ బన్ధనం ఛేత్వా, విహరామి అనాసవో.

౧౩. ‘‘స్వాగతం వత మే ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౧౪. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా సకింసమ్మజ్జకో థేరో ఇమా గాథాయో

అభాసిత్థాతి.

సకింసమ్మజ్జకత్థేరస్సాపదానం పఠమం.