౮. ఉత్తియత్థేరఅపదానం

౧౬౯. ‘‘చన్దభాగానదీతీరే, సుసుమారో అహం తదా;

సగోచరప్పసుతోహం [సభోజనపసుతాహం (స్యా. క.)], నదీతిత్థం అగచ్ఛహం.

౧౭౦. ‘‘సిద్ధత్థో తమ్హి సమయే, సయమ్భూ అగ్గపుగ్గలో;

నదిం తరితుకామో సో, నదీతిత్థం ఉపాగమి.

౧౭౧. ‘‘ఉపాగతే చ [ఉపాగతమ్హి (స్యా. క.)] సమ్బుద్ధే, అహమ్పి తత్థుపాగమిం;

ఉపగన్త్వాన సమ్బుద్ధం, ఇమం వాచం ఉదీరయిం.

౧౭౨. ‘‘‘అభిరూహ మహావీర, తారేస్సామి అహం తువం;

పేత్తికం విసయం మయ్హం, అనుకమ్ప మహాముని’.

౧౭౩. ‘‘మమ ఉగ్గజ్జనం సుత్వా, అభిరూహి మహాముని;

హట్ఠో హట్ఠేన చిత్తేన, తారేసిం లోకనాయకం.

౧౭౪. ‘‘నదియా పారిమే తీరే, సిద్ధత్థో లోకనాయకో;

అస్సాసేసి మమం తత్థ, అమతం పాపుణిస్ససి.

౧౭౫. ‘‘తమ్హా కాయా చవిత్వాన, దేవలోకం ఆగచ్ఛహం;

దిబ్బసుఖం అనుభవిం, అచ్ఛరాహి పురక్ఖతో.

౧౭౬. ‘‘సత్తక్ఖత్తుఞ్చ దేవిన్దో, దేవరజ్జమకాసహం;

తీణిక్ఖత్తుం చక్కవత్తీ, మహియా ఇస్సరో అహుం.

౧౭౭. ‘‘వివేకమనుయుత్తోహం, నిపకో చ సుసంవుతో;

ధారేమి అన్తిమం దేహం, సమ్మాసమ్బుద్ధసాసనే.

౧౭౮. ‘‘చతున్నవుతితో కప్పే, తారేసిం యం నరాసభం;

దుగ్గతిం నాభిజానామి, తరణాయ ఇదం ఫలం.

౧౭౯. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా ఉత్తియో [ఉత్తిరియో (సీ.)] థేరో ఇమా గాథాయో అభాసిత్థాతి.

ఉత్తియత్థేరస్సాపదానం అట్ఠమం.