౪. పవారణాక్ఖన్ధకం

అఫాసుకవిహారకథా

౨౦౯. పవారణాక్ఖన్ధకే – నేవ ఆలపేయ్యామ న సల్లపేయ్యామాతి ఏత్థ ఆలాపో నామ పఠమవచనం; సల్లాపో పచ్ఛిమవచనం. హత్థవిలఙ్ఘకేనాతి హత్థుక్ఖేపకేన. పసుసంవాసన్తి పసూనం వియ సంవాసం. పసవోపి హి అత్తనో ఉప్పన్నం సుఖదుక్ఖం అఞ్ఞమఞ్ఞస్స న ఆరోచేన్తి, పటిసన్థారం న కరోన్తి, తథా ఏతేపి న అకంసు; తస్మా నేసం సంవాసో ‘‘పసుసంవాసో’’తి వుచ్చతి. ఏస నయో సబ్బత్థ. న భిక్ఖవే మూగబ్బతం తిత్థియసమాదానన్తి ‘‘ఇమం తేమాసం న కథేతబ్బ’’న్తి ఏవరూపం వతసమాదానం న కాతబ్బం; అధమ్మకతికా హేసా. అఞ్ఞమఞ్ఞానులోమతాతి అఞ్ఞమఞ్ఞం వత్తుం అనులోమభావో. ‘‘వదన్తు మం ఆయస్మన్తో’’తి హి వదన్తం సక్కా హోతి కిఞ్చి వత్తుం; న ఇతరం. ఆపత్తివుట్ఠానతా వినయపురేక్ఖారతాతి ఆపత్తీహి వుట్ఠానభావో వినయం పురతో కత్వా చరణభావో. ‘‘వదన్తు మం ఆయస్మన్తో’’తి హి ఏవం వదన్తో ఆపత్తీహి వుట్ఠహిస్సతి, వినయఞ్చ పురక్ఖత్వా విహరిస్సతీతి వుచ్చతి.

౨౧౦. సుణాతు మే భన్తే సఙ్ఘో అజ్జ పవారణా, యది సఙ్ఘస్స పత్తకల్లం, సఙ్ఘో పవారేయ్యాతి అయం సబ్బసఙ్గాహికా నామ ఞత్తి; ఏవఞ్హి వుత్తే తేవాచికం ద్వేవాచికం ఏకవాచికఞ్చ పవారేతుం వట్టతి. సమానవస్సికం న వట్టతి. ‘‘తేవాచికం పవారేయ్యా’’తి వుత్తే పన తేవాచికమేవ వట్టతి, అఞ్ఞం న వట్టతి. ‘‘ద్వేవాచికం పవారేయ్యా’’తి వుత్తే ద్వేవాచికఞ్చ తేవాచికఞ్చ వట్టతి, ఏకవాచికఞ్చ సమానవస్సికఞ్చ న వట్టతి. ‘‘ఏకవాచికం పవారేయ్యా’’తి వుత్తే పన ఏకవాచిక-ద్వేవాచిక-తేవాచికాని వట్టన్తి, సమానవస్సికమేవ న వట్టతి. ‘‘సమానవస్సిక’’న్తి వుత్తే సబ్బం వట్టతి.

౨౧౧. అచ్ఛన్తీతి నిసిన్నావ హోన్తి, న ఉట్ఠహన్తి. తదమన్తరాతి తదన్తరా; తావతకం కాలన్తి అత్థో.

పవారణాభేదకథా

౨౧౨. చాతుద్దసికా చ పన్నరసికా చాతి ఏత్థ చాతుద్దసికాయ ‘‘అజ్జ పవారణా చాతుద్దసీ’’తి ఏవం పుబ్బకిచ్చం కాతబ్బం, పన్నరసికాయ ‘‘అజ్జ పవారణా పన్నరసీ’’తి.

పవారణకమ్మేసు సచే ఏకస్మిం విహారే పఞ్చసు భిక్ఖూసు వసన్తేసు ఏకస్స పవారణం ఆహరిత్వా చత్తారో గణఞత్తిం ఠపేత్వా పవారేన్తి, చతూసు తీసు వా వసన్తేసు ఏకస్స పవారణం ఆహరిత్వా తయో వా ద్వే వా సఙ్ఘఞత్తిం ఠపేత్వా పవారేన్తి, సబ్బమేతం అధమ్మేనవగ్గం పవారణకమ్మం.

సచే పన సబ్బేపి పఞ్చ జనా ఏకతో సన్నిపతిత్వా గణఞత్తిం ఠపేత్వా పవారేన్తి, చత్తారో తయో వా ద్వే వా వసన్తా ఏకతో సన్నిపతిత్వా సఙ్ఘఞత్తిం ఠపేత్వా పవారేన్తి, సబ్బమేతం అధమ్మేనసమగ్గం పవారణకమ్మం.

సచే పఞ్చసు జనేసు ఏకస్స పవారణం ఆహరిత్వా చత్తారో సఙ్ఘఞత్తిం ఠపేత్వా పవారేన్తి, చతూసు తీసు వా ఏకస్స పవారణం ఆహరిత్వా తయో వా ద్వే వా గణఞత్తిం ఠపేత్వా పవారేన్తి, సబ్బమేతం ధమ్మేనవగ్గం పవారణకమ్మం.

సచే పన సబ్బేపి పఞ్చ జనా ఏకతో సన్నిపతిత్వా సఙ్ఘఞత్తిం ఠపేత్వా పవారేన్తి, చత్తారో వా తయో వా ఏకతో సన్నిపతిత్వా గణఞత్తిం ఠపేత్వా పవారేన్తి, ద్వే అఞ్ఞమఞ్ఞం పవారేన్తి, ఏకకో వసన్తో అధిట్ఠానపవారణం కరోతి, సబ్బమేతం ధమ్మేనసమగ్గం నామ పవారణకమ్మన్తి.

పవారణాదానానుజాననకథా

౨౧౩. దిన్నా హోతి పవారణాతి ఏత్థ ఏవం దిన్నాయ పవారణాయ పవారణాహారకేన సఙ్ఘం ఉపసఙ్కమిత్వా ఏవం పవారేతబ్బం – ‘‘తిస్సో భన్తే భిక్ఖు సఙ్ఘం పవారేతి దిట్ఠేన వా సుతేన వా పరిసఙ్కాయ వా, వదతు తం భన్తే సఙ్ఘో అనుకమ్పం ఉపాదాయ, పస్సన్తో పటికరిస్సతి. దుతియమ్పి…పే… తతియమ్పి భన్తే తిస్సో భిక్ఖు సఙ్ఘం పవారేతి…పే… పటికరిస్సతీ’’తి. సచే పన వుడ్ఢతరో హోతి, ‘‘ఆయస్మా భన్తే తిస్సో’’తి వత్తబ్బం; ఏవఞ్హి తేన తస్సత్థాయ పవారితం హోతీతి.

పవారణం దేన్తేన ఛన్దమ్పి దాతున్తి ఏత్థ ఛన్దదానం ఉపోసథక్ఖన్ధకే వుత్తనయేనేవ వేదితబ్బం. ఇధాపి చ ఛన్దదానం అవసేసకమ్మత్థాయ. తస్మా సచే పవారణం దేన్తో ఛన్దం దేతి, వుత్తనయేన ఆహటాయ పవారణాయ తేన చ భిక్ఖునా సఙ్ఘేన చ పవారితమేవ హోతి. అథ పవారణమేవ దేతి, న ఛన్దం, తస్స చ పవారణాయ ఆరోచితాయ సఙ్ఘేన చ పవారితే సబ్బేసం సుప్పవారితం హోతి, అఞ్ఞం పన కమ్మం కుప్పతి. సచే ఛన్దమేవ దేతి న పవారణం, సఙ్ఘస్స పవారణా చ సేసకమ్మాని చ న కుప్పన్తి, తేన పన భిక్ఖునా అప్పవారితం హోతి. పవారణదివసే పన బహిసీమాయం పవారణం అధిట్ఠహిత్వా ఆగతేనపి ఛన్దో దాతబ్బో, తేన సఙ్ఘస్స పవారణకమ్మం న కుప్పతి.

౨౧౮. అజ్జ మే పవారణాతి ఏత్థ సచే చాతుద్దసికా హోతి, ‘‘అజ్జ మే పవారణా చాతుద్దసీ’’తి సచే పన్నరసికా ‘‘అజ్జ మే పవారణా పన్నరసీ’’తి ఏవం అధిట్ఠాతబ్బం.

౨౧౯. తదహుపవారణాయ ఆపత్తిన్తిఆది వుత్తనయమేవ.

అనాపత్తిపన్నరసకాదికథా

౨౨౨. పున పవారేతబ్బన్తి పున పుబ్బకిచ్చం కత్వా ఞత్తిం ఠపేత్వా సఙ్ఘత్థేరతో పట్ఠాయ పవారేతబ్బం. సేసం ఉపోసథక్ఖన్ధకవణ్ణనాయం వుత్తనయేనేవ వేదితబ్బం.

౨౨౮. ఆగన్తుకేహి ఆవాసికానం అనువత్తితబ్బన్తి ‘‘అజ్జ పవారణా చాతుద్దసీ’’తి ఏతదేవ పుబ్బకిచ్చం కాతబ్బం. పన్నరసికవారేపి ఏసేవ నయో. ఆవాసికేహి నిస్సీమం గన్త్వా పవారేతబ్బన్తి అస్సావసానే అయం పాళిముత్తకవినిచ్ఛయో – సచే పురిమికాయ పఞ్చ భిక్ఖూ వస్సం ఉపగతా, పచ్ఛిమికాయపి పఞ్చ, పురిమేహి ఞత్తిం ఠపేత్వా పవారితే పచ్ఛిమేహి తేసం సన్తికే పారిసుద్ధిఉపోసథో కాతబ్బో, న ఏకస్మిం ఉపోసథగ్గే ద్వే ఞత్తియో ఠపేతబ్బా. సచేపి పచ్ఛిమికాయ ఉపగతా చత్తారో తయో ద్వే ఏకో వా హోతి, ఏసేవ నయో. అథ పురిమికాయ చత్తారో పచ్ఛిమికాయపి చత్తారో తయో ద్వే ఏకో వా ఏసేవ నయో. అథాపి పురిమికాయ తయో, పచ్ఛిమికాయపి తయో ద్వే వా, ఏసేవ నయో. ఇదఞ్హేత్థ లక్ఖణం – సచే పురిమికాయ ఉపగతేహి పచ్ఛిమికాయ ఉపగతా థోకతరా చేవ హోన్తి సమసమా చ, సఙ్ఘపవారణాయ గణం పూరేన్తి, సఙ్ఘపవారణావసేన ఞత్తి ఠపేతబ్బాతి.

సచే పన పురిమికాయ తయో, పచ్ఛిమికాయ ఏకో హోతి, తేన సద్ధిం తే చత్తారో హోన్తి, చతున్నం సఙ్ఘఞత్తిం ఠపేత్వా పవారేతుం న వట్టతి. గణఞత్తియా పన సో గణపూరకో హోతి, తస్మా గణవసేన ఞత్తిం ఠపేత్వా పురిమేహి పవారేతబ్బం. ఇతరేన తేసం సన్తికే పారిసుద్ధిఉపోసథో కాతబ్బో. సచే పురిమికాయ ద్వే పచ్ఛిమికాయ ద్వే వా ఏకో వా హోతి, ఏసేవ నయో. సచే పురిమికాయ ఏకో, పచ్ఛిమికాయపి ఏకో హోతి, ఏకేన ఏకస్స సన్తికే పవారేతబ్బం, ఏకేన పారిసుద్ధిఉపోసథో కాతబ్బో. సచే పన పురిమవస్సూపగతేహి పచ్ఛిమవస్సూపగతా ఏకేనపి అధికతరా హోన్తి, పఠమం పాతిమోక్ఖం ఉద్దిసిత్వా పచ్ఛా థోకతరేహి తేసం సన్తికే పవారేతబ్బం.

కత్తికచాతుమాసినియా పవారణాయ పన సచే పఠమం వస్సూపగతేహి మహాపవారణాయ పవారితేహి పచ్ఛా ఉపగతా అధికతరా వా సమసమా వా హోన్తి, పవారణాఞత్తిం ఠపేత్వా పవారేతబ్బం. తేహి పవారితే పచ్ఛా ఇతరేహి పారిసుద్ధిఉపోసథో కాతబ్బో. అథ మహాపవారణాయ పవారితా బహూ భిక్ఖూ హోన్తి, పచ్ఛిమవస్సూపగతా థోకతరా వా ఏకో వా, పాతిమోక్ఖే ఉద్దిట్ఠే పచ్ఛా తేసం సన్తికే తేన పవారేతబ్బం.

౨౩౩. న చ భిక్ఖవే అప్పవారణాయ పవారేతబ్బం, అఞ్ఞత్ర సఙ్ఘసామగ్గియాతి ఏత్థ కోసమ్బకసామగ్గీసదిసావ సామగ్గీ వేదితబ్బా. ‘‘అజ్జ పవారణా సామగ్గీ’’తి ఏవఞ్చేత్థ పుబ్బకిచ్చం కాతబ్బం. యే పన కిస్మిఞ్చిదేవ అప్పమత్తకే పవారణం ఠపేత్వా సమగ్గా హోన్తి, తేహి పవారణాయమేవ పవారణా కాతబ్బా. సామగ్గీపవారణం కరోన్తేహి చ పఠమపవారణం ఠపేత్వా పాటిపదతో పట్ఠాయ యావ కత్తికచాతుమాసినీ పుణ్ణమా, ఏత్థన్తరే కాతబ్బా, తతో పచ్ఛా వా పురే వా న వట్టతి.

ద్వేవాచికాదిపవారణాకథా

౨౩౪. ద్వేవాచికం పవారేతున్తి ఏత్థ ఞత్తిం ఠపేన్తేనాపి ‘‘యది సఙ్ఘస్స పత్తకల్లం సఙ్ఘో ద్వేవాచికం పవారేయ్యా’’తి వత్తబ్బం, ఏకవాచికే ‘‘ఏకవాచికం పవారేయ్యా’’తి, సమానవస్సికేపి ‘‘సమానవస్సికం పవారేయ్యా’’తి వత్తబ్బం, ఏత్థ చ బహూపి సమానవస్సా ఏకతో పవారేతుం లభన్తి.

పవారణాఠపనకథా

౨౩౬. భాసితాయ లపితాయ అపరియోసితాయాతి ఏత్థ సబ్బసఙ్గాహికఞ్చ పుగ్గలికఞ్చాతి దువిధం పవారణాఠపనం. తత్థ సబ్బసఙ్గాహికే ‘‘సుణాతు మే భన్తే సఙ్ఘో…పే… సఙ్ఘో తేవాచికం పవారే’’ ఇతి సుకారతో యావ రేకారో, తావ భాసితా లపితా అపరియోసితావ హోతి పవారణా. ఏత్థన్తరే ఏకపదేపి ఠపేన్తేన ఠపితా హోతి పవారణా. ‘య్య’కారే పన పత్తే పరియోసితా హోతి, తస్మా తతో పట్ఠాయ ఠపేన్తేన ఠపితాపి అట్ఠపితా హోతి. పుగ్గలికఠపనే పన – ‘‘సఙ్ఘం భన్తే పవారేమి…పే… తతియమ్పి భన్తే సఙ్ఘం పవారేమి దిట్ఠేన వా…పే… పస్సన్తో పటీ’’తి సఙ్కారతో యావ అయం సబ్బపచ్ఛిమో ‘టి’కారో తావ భాసితా లపితా అపరియోసితావ హోతి పవారణా, ఏత్థన్తరే ఏకపదేపి ఠపేన్తేన ఠపితా హోతి పవారణా, ‘‘కరిస్సామీ’’తి వుత్తే పన పరియోసితా హోతి, తస్మా ‘‘కరిస్సామీ’’తి ఏతస్మిం పదే పత్తే ఠపితాపి అట్ఠపితా హోతి. ఏస నయో ద్వేవాచికఏకవాచికసమానవస్సికాసుపి. ఏతాసుపి హి టికారావసానంయేవ ఠపనఖేత్తన్తి.

౨౩౭. అనుయుఞ్జియమానోతి ‘‘కిమ్హి నం ఠపేసీ’’తి పరతో వుత్తనయేన పుచ్ఛియమానో. ఓమద్దిత్వాతి ఏతాని ‘‘అలం భిక్ఖు మా భణ్డన’’న్తిఆదీని వచనాని వత్వా, వచనోమద్దనా హి ఇధ ఓమద్దనాతి అధిప్పేతా. అనుద్ధంసితం పటిజానాతీతి ‘‘అమూలకేన పారాజికేన అనుద్ధంసితో అయం మయా’’తి ఏవం పటిజానాతి. యథాధమ్మన్తి సఙ్ఘాదిసేసేన అనుద్ధంసనే పాచిత్తియం; ఇతరేహి దుక్కటం. నాసేత్వాతి లిఙ్గనాసనాయ నాసేత్వా.

౨౩౮. సాస్స యథాధమ్మం పటికతాతి ఏత్తకమేవ వత్వా పవారేథాతి వత్తబ్బా, అసుకా నామ ఆపత్తీతి ఇదం పన న వత్తబ్బం, ఏతఞ్హి కలహస్స ముఖం హోతి.

వత్థుఠపనాదికథా

౨౩౯. ఇదం వత్థు పఞ్ఞాయతి న పుగ్గలోతి ఏత్థ చోరా కిర అరఞ్ఞవిహారే పోక్ఖరణితో మచ్ఛే గహేత్వా పచిత్వా ఖాదిత్వా అగమంసు. సో తం విప్పకారం దిస్వా ఆరామే వా కిఞ్చి ధుత్తేన కతం విప్పకారం దిస్వా ‘‘భిక్ఖుస్స ఇమినా కమ్మేన భవితబ్బ’’న్తి సల్లక్ఖేత్వా ఏవమాహ. వత్థుం ఠపేత్వా సఙ్ఘో పవారేయ్యాతి ‘‘యదా తం పుగ్గలం జానిస్సామ, తదా నం చోదేస్సామ. ఇదాని పన సఙ్ఘో పవారేతూ’’తి అయమేత్థ అత్థో. ఇదానేవ నం వదేహీతి సచే ఇమినా వత్థునా కఞ్చి పుగ్గలం పరిసఙ్కసి, ఇదానేవ నం అపదిసాహీతి అత్థో. సచే అపదిసతి, తం పుగ్గలం అనువిజ్జిత్వా పవారేతబ్బం; నో చే అపదిసతి, ఉపపరిక్ఖిత్వా జానిస్సామాతి పవారేతబ్బం.

అయం పుగ్గలో పఞ్ఞాయతి న వత్థూతి ఏత్థ ఏకో భిక్ఖు మాలాగన్ధవిలేపనేహి చేతియం వా పూజేసి, అరిట్ఠం వా పివి, తస్స తదనురూపో సరీరగన్ధో అహోసి; సో తం గన్ధం సన్ధాయ ‘‘ఇమస్స భిక్ఖునో ఏవరూపో సరీరగన్ధో’’తి వత్థుం పకాసేన్తో ఏవమాహ. పుగ్గలం ఠపేత్వా సఙ్ఘో పవారేయ్యాతి ఏతం పుగ్గలం ఠపేత్వా సఙ్ఘో పవారేతు. ఇదానేవ నం వదేహీతి యం త్వం పుగ్గలం ఠపేసి, తస్స పుగ్గలస్స ఇదానేవ దోసం వద. సచే అయమస్స దోసోతి వదతి, తం పుగ్గలం సోధేత్వా పవారేతబ్బం. అథ నాహం జానామీతి వదతి, ఉపపరిక్ఖిత్వా జానిస్సామాతి పవారేతబ్బం.

ఇదం వత్థు చ పుగ్గలో చ పఞ్ఞాయతీతి పురిమనయేనేవ చోరేహి మచ్ఛే గహేత్వా పచిత్వా పరిభుత్తట్ఠానఞ్చ గన్ధాదీహి నహానట్ఠానఞ్చ దిస్వా ‘‘పబ్బజితస్స కమ్మ’’న్తి మఞ్ఞమానో సో ఏవమాహ. ఇదానేవ నం వదేహీతి ఇదానేవ తేన వత్థునా పరిసఙ్కితం పుగ్గలం వదేహి; ఇదం పన ఉభయమ్పి దిస్వా దిట్ఠకాలతో పట్ఠాయ వినిచ్ఛినిత్వావ పవారేతబ్బం. కల్లం వచనాయాతి కల్లం చోదనాయ; చోదేతుం వట్టతీతి అత్థో. కస్మా? పవారణతో పుబ్బే అవినిచ్ఛితత్తా పచ్ఛా చ దిస్వా చోదితత్తాతి. ఉక్కోటనకం పాచిత్తియన్తి ఇదఞ్హి ఉభయం పుబ్బే పవారణాయ దిస్వా వినిచ్ఛినిత్వావ భిక్ఖూ పవారేన్తి, తస్మా పున తం ఉక్కోటేన్తస్స ఆపత్తి.

భణ్డనకారకవత్థుకథా

౨౪౦. ద్వే తయో ఉపోసథే చాతుద్దసికే కాతున్తి ఏత్థ చతుత్థపఞ్చమా ద్వే, తతియో పన పకతియాపి చతుద్దసికోయేవాతి. తస్మా తతియచతుత్థా వా తతియచతుత్థపఞ్చమా వా ద్వే తయో చాతుద్దసికా కాతబ్బా. అథ చతుత్థే కతే సుణన్తి, పఞ్చమో చాతుద్దసికో కాతబ్బో. ఏవమ్పి ద్వే చాతుద్దసికా హోన్తి. ఏవం కరోన్తా భణ్డనకారకానం తేరసే వా చాతుద్దసే వా ఇమే పన్నరసీపవారణం పవారేస్సన్తి. ఏవం పవారేన్తేహి చ బహిసీమాయ సామణేరే ఠపేత్వా ‘‘తే ఆగచ్ఛన్తీ’’తి సుత్వా లహుం లహుం సన్నిపతిత్వా పవారేతబ్బం. ఏతమత్థం దస్సేతుం ‘‘తే చే భిక్ఖవే…పే… తథా కరోన్తూ’’తి వుత్తం.

అసంవిహితాతి సంవిదహనరహితా ఆగమనజాననత్థాయ అకతసంవిదహితా; అవిఞ్ఞాతావ హుత్వాతి అత్థో. తేసం విక్ఖిత్వాతి ‘‘కిలన్తత్థ ముహుత్తం విస్సమథా’’తిఆదినా నయేన సమ్మోహం కత్వాతి అత్థో. నో చే లభేథాతి నో చే బహిసీమం గన్తుం లభేయ్యుం; భణ్డనకారకానం సామణేరేహి చ దహరభిక్ఖూహి చ నిరన్తరం అనుబద్ధావ హోన్తి. ఆగమే జుణ్హేతి యం సన్ధాయ ఆగమే జుణ్హే పవారేయ్యామాతి ఞత్తిం ఠపేసుం, తస్మిం ఆగమే జుణ్హే కోముదియా చాతుమాసినియా అకామా పవారేతబ్బం, అవస్సం పవారేతబ్బం, న హి తం అతిక్కమిత్వా పవారేతుం లబ్భతి. తేహి చే భిక్ఖవే భిక్ఖూహి పవారియమానేతి ఏవం చాతుమాసినియా పవారియమానే.

పవారణాసఙ్గహకథా

౨౪౧. అఞ్ఞతరో ఫాసువిహారోతి తరుణసమథో వా తరుణవిపస్సనా వా. పరిబాహిరా భవిస్సామాతి అనిబద్ధరత్తిట్ఠానదివాట్ఠానాదిభావేన భావనానుయోగం సమ్పాదేతుం అసక్కోన్తా బాహిరా భవిస్సామ. సబ్బేహేవ ఏకజ్ఝం సన్నిపతితబ్బన్తి ఇమినా ఛన్దదానం పటిక్ఖిపతి. భిన్నస్స హి సఙ్ఘస్స సమగ్గకరణకాలే తిణవత్థారకసమథే ఇమస్మిఞ్చ పవారణాసఙ్గహేతి ఇమేసు తీసు ఠానేసు ఛన్దం దాతుం న వట్టతి. పవారణాసఙ్గహో నామాయం విస్సట్ఠకమ్మట్ఠానానం థామగతసమథవిపస్సనానం సోతాపన్నాదీనఞ్చ న దాతబ్బో. తరుణసమథవిపస్సనాలాభినో పన సబ్బే వా హోన్తు, ఉపడ్ఢా వా, ఏకపుగ్గలో వా ఏకస్సపి వసేన దాతబ్బోయేవ. దిన్నే పవారణాసఙ్గహే అన్తోవస్సే పరిహారోవ హోతి, ఆగన్తుకా తేసం సేనాసనం గహేతుం న లభన్తి. తేహిపి ఛిన్నవస్సేహి న భవితబ్బం, పవారేత్వా పన అన్తరాపి చారికం పక్కమితుం లభన్తీతి దస్సనత్థం ‘‘తేహి చే భిక్ఖవే’’తిఆదిమాహ. సేసం సబ్బత్థ ఉత్తానమేవాతి.

పవారణాక్ఖన్ధకవణ్ణనా నిట్ఠితా.