౧౩. ఝానసంయుత్తం

౧. సమాధిమూలకసమాపత్తిసుత్తవణ్ణనా

౬౬౨. ఝానసంయుత్తస్స పఠమే సమాధికుసలోతి పఠమం ఝానం పఞ్చఙ్గికం దుతియం తివఙ్గికన్తి ఏవం అఙ్గవవత్థానకుసలో. న సమాధిస్మిం సమాపత్తికుసలోతి చిత్తం హాసేత్వా కల్లం కత్వా ఝానం సమాపజ్జితుం న సక్కోతి. ఇమినా నయేన సేసపదానిపి వేదితబ్బాని.

౨-౫౫. సమాధిమూలకఠితిసుత్తాదివణ్ణనా

౬౬౩-౭౧౬. దుతియాదీసు న సమాధిస్మిం ఠితికుసలోతి ఝానం ఠపేతుం అకుసలో, సత్తట్ఠఅచ్ఛరామత్తం ఝానం ఠపేతుం న సక్కోతి. న సమాధిస్మిం వుట్ఠానకుసలోతి ఝానతో వుట్ఠాతుం అకుసలో, యథాపరిచ్ఛేదేన వుట్ఠాతుం న సక్కోతి. న సమాధిస్మిం కల్లితకుసలోతి చిత్తం హాసేత్వా కల్లం కాతుం అకుసలో. న సమాధిస్మిం ఆరమ్మణకుసలోతి కసిణారమ్మణేసు అకుసలో. న సమాధిస్మిం గోచరకుసలోతి కమ్మట్ఠానగోచరే చేవ భిక్ఖాచారగోచరే చ అకుసలో. న సమాధిస్మిం అభినీహారకుసలోతి కమ్మట్ఠానం అభినీహరితుం అకుసలో. న సమాధిస్మిం సక్కచ్చకారీతి ఝానం అప్పేతుం సక్కచ్చకారీ న హోతి. న సమాధిస్మిం సాతచ్చకారీతి ఝానప్పనాయ సతతకారీ న హోతి, కదాచిదేవ కరోతి. న సమాధిస్మిం సప్పాయకారీతి సమాధిస్స సప్పాయే ఉపకారకధమ్మే పూరేతుం న సక్కోతి. తతో పరం సమాపత్తిఆదీహి పదేహి యోజేత్వా చతుక్కా వుత్తా. తేసం అత్థో వుత్తనయేనేవ వేదితబ్బో. సకలం పనేత్థ ఝానసంయుత్తం లోకియజ్ఝానవసేనేవ కథితన్తి.

ఝానసంయుత్తవణ్ణనా నిట్ఠితా.

ఇతి సారత్థప్పకాసినియా సంయుత్తనికాయ-అట్ఠకథాయ

ఖన్ధవగ్గవణ్ణనా నిట్ఠితా.

సంయుత్తనికాయ-అట్ఠకథాయ దుతియో భాగో.