౧-౧౦. పణ్ణదాయకత్థేరఅపదానాదివణ్ణనా

౧-౨. ఏకూనతింసతిమే వగ్గే పఠమాపదానే పణ్ణభోజనభోజనోతి ఖీరపణ్ణాదిభోజనస్స భుఞ్జనత్థాయ పణ్ణసాలాయ నిసిన్నో అమ్హి భవామీతి అత్థో. ఉపవిట్ఠఞ్చ మం సన్తన్తి పణ్ణసాలాయం ఉపవిట్ఠం సన్తం విజ్జమానం మం. ఉపాగచ్ఛి మహాఇసీతి మహన్తే సీలాదిఖన్ధే ఏసనతో మహాఇసి. లోకపజ్జోతో లోకపదీపో సిద్ధత్థో భగవా ఉపగచ్ఛి, మమ సమీపం అగమాసీతి అత్థో. నిసిన్నస్స పణ్ణసన్థరేతి ఉపగన్త్వా పణ్ణసన్థరే నిసిన్నస్స ఖాదనత్థాయ సేదితం పణ్ణం మయా దిన్నన్తి సమ్బన్ధో.

౫-౭. దుతియాపదానే సినేరుసమసన్తోసో ధరణీసమసాదిసో సిద్ధత్థో భగవాతి సమ్బన్ధో. వుట్ఠహిత్వా సమాధిమ్హాతి నిరోధసమాపత్తితో వుట్ఠహిత్వా విసుం హుత్వాతి అత్థో. భిక్ఖాయ మముపట్ఠితోతి భిక్ఖాచారవేలాయ ‘‘అజ్జ మమ యో కోచి కిఞ్చి దానం దదాతి, తస్స మహప్ఫల’’న్తి చిన్తేత్వా నిసిన్నస్స మమ సన్తికం సమీపం ఉపట్ఠితో సమీపమాగతోతి అత్థో. హరీతకం…పే… ఫారుసకఫలాని చాతి ఏవం సబ్బం తం ఫలం సబ్బలోకానుకమ్పినో తస్స సిద్ధత్థస్స మహేసిస్స మయా విప్పసన్నేన చేతసా దిన్నన్తి అత్థో.

౧౧-౧౨. తతియాపదానే సీహం యథా వనచరన్తి వనే చరమానం సీహరాజం ఇవ చరమానం సిద్ధత్థం భగవన్తన్తి సమ్బన్ధో. నిసభాజానియం యథాతి వసభో, నిసభో, విసభో, ఆసభోతి చత్తారో గవజేట్ఠకా. తేసు గవసతస్స జేట్ఠకో వసభో, గవసహస్సస్స జేట్ఠకో నిసభో, గవసతసహస్సస్స జేట్ఠకో విసభో, గవకోటిసతసహస్సస్స జేట్ఠకో ఆసభో. ఇధ పన ఆసభో ‘‘నిసభో’’తి వుత్తో, ఆజానీయం అభీతం నిచ్చలం ఉసభరాజం ఇవాతి అత్థో. కకుధం విలసన్తంవాతి పుప్ఫపల్లవేహి సోభమానం కకుధరుక్ఖం ఇవ నరాసభం నరానం ఆసభం ఉత్తమం ఆగచ్ఛన్తం సిద్ధత్థం భగవన్తం దిస్వా సద్ధాయ సమ్పయుత్తత్తా విప్పసన్నేన చేతసా పచ్చుగ్గమనం అకాసిన్తి అత్థో.

చతుత్థాపదానాదీని దసమావసానాని సువిఞ్ఞేయ్యానేవాతి.

ఏకూనతింసతిమవగ్గవణ్ణనా సమత్తా.