౨౮. సువణ్ణబిబ్బోహనవగ్గో

౧-౧౦. సువణ్ణబిబ్బోహనియత్థేరఅపదానాదివణ్ణనా

అట్ఠవీసతిమే వగ్గే పఠమాపదానం ఉత్తానమేవ.

౫. దుతియాపదానే మనోమయేన కాయేనాతి యథా చిత్తవసేన పవత్తకాయేనాతి అత్థో.

౧౦. తతియాపదానే మహాసముద్దం నిస్సాయాతి మహాసాగరాసన్నే ఠితస్స పబ్బతస్స అన్తరే పబ్బతలేణేతి అత్థో. సిద్ధత్థో భగవా వివేకకామతాయ వసతి పటివసతీతి అత్థో. పచ్చుగ్గన్త్వానకాసహన్తి అహం తస్స భగవతో పటిఉగ్గన్త్వా సమీపం గన్త్వా వన్దనాదిపుఞ్ఞం అకాసిన్తి అత్థో. చఙ్కోటకమదాసహన్తి సిద్ధత్థస్స భగవతో అహం పుప్ఫభరితం చఙ్కోటకం కదమ్బం అదాసిం పూజేసిన్తి అత్థో.

౧౪. చతుత్థాపదానే అకక్కసచిత్తస్సాథాతి అఫరుసచిత్తస్స, అథ-సద్దో పదపూరణే.

౧౯. పఞ్చమాపదానే ఉదుమ్బరే వసన్తస్సాతి ఉదుమ్బరరుక్ఖమూలే రుక్ఖచ్ఛాయాయ వసన్తస్స తిస్సస్స భగవతో. నియతే పణ్ణసన్థరేతి నియామితే పటిబద్ధే పణ్ణసన్థరే సాఖాభఙ్గాసనే నిసిన్నస్స. వుత్థోకాసో మయా దిన్నోతి వివిత్తోకాసే మణ్డపద్వారాదీహి పిహితోకాసో మయా దిన్నో సమ్పాదితోతి అత్థో.

౨౪. ఛట్ఠాపదానే పోత్థదానం మయా దిన్నన్తి పోత్థవట్టిం పోత్థఛల్లిం తాళేత్వా కతం సాటకం విసమం గోఫాసుకేన ఘంసిత్వా నిమ్మితం సుత్తం గహేత్వా కన్తిత్వా తేన సుత్తేన నిసీదనత్థాయ వా భూమత్థరణత్థాయ వా సాటకం వాయాపేత్వా తం సాటకం మయా రతనత్తయస్స దిన్నన్తి అత్థో.

౨౭. సత్తమాపదానే చన్దభాగానదీతీరేతి చన్దభాగాయ నామ నదియా తీరతో, నిస్సక్కే భుమ్మవచనం. అనుసోతన్తి సోతస్స అను హేట్ఠాగఙ్గం వజామి గచ్ఛామి అహన్తి అత్థో. సత్త మాలువపుప్ఫాని, చితమారోపయిం అహన్తి అహం మాలువపుప్ఫాని సత్త పత్తాని గహేత్వా చితకే వాలుకరాసిమ్హి వాలుకాహి థూపం కత్వా పూజేసిన్తి అత్థో.

౩౧-౩౨. అట్ఠమాపదానే మహాసిన్ధు సుదస్సనాతి సున్దరదస్సనసున్దరోదకధవలపులినోపసోభితత్తా సుట్ఠు మనోహరా మహాసిన్ధు నామ వారినదీ అహోసి. తత్థ తిస్సం సిన్ధువారినదియం సప్పభాసం పభాయ సహితం సుదస్సనం సున్దరరూపం పరమోపసమే యుత్తం ఉత్తమే ఉపసమే యుత్తం సమఙ్గీభూతం వీతరాగం అహం అద్దసన్తి అత్థో. దిస్వాహం విమ్హితాసయోతి ‘‘ఏవరూపం భయానకం హిమవన్తం కథం సమ్పత్తో’’తి విమ్హితఅజ్ఝాసయో అచ్ఛరియబ్భుతచిత్తోతి అత్థో. ఆలువం తస్స పాదాసిన్తి తస్స అరహతో అహం పసన్నమానసో ఆలువకన్దం పాదాసిం ఆదరేన అదాసిన్తి అత్థో.

నవమదసమాపదానాని ఉత్తానానేవాతి.

అట్ఠవీసతిమవగ్గవణ్ణనా సమత్తా.