౨౪. ఉదకాసనవగ్గో

౧-౧౦.ఉదకాసనదాయకత్థేరఅపదానాదివణ్ణనా

చతువీసతిమే వగ్గే పఠమదుతియాపదానాని ఉత్తానానేవ.

౯. తతియాపదానే అరుణవతియా నగరేతి ఆ సమన్తతో ఆలోకం కరోన్తో ఉణతి ఉగ్గచ్ఛతీతి అరుణో, సో తస్మిం విజ్జతీతి అరుణవతీ, తస్మిం నగరే ఆలోకం కరోన్తో సూరియో ఉగ్గచ్ఛతీతి అత్థో. సేసనగరేసుపి సూరియుగ్గమనే విజ్జమానేపి విసేసవచనం సబ్బచతుప్పదానం మహియం సయనేపి సతి మహియం సయతీతి మహింసోతి వచనం వియ రూళ్హివసేన వుత్తన్తి వేదితబ్బం. అథ వా పాకారపాసాదహమ్మియాదీసు సువణ్ణరజతమణిముత్తాదిసత్తరతనపభాహి అరుణుగ్గమనం వియ పభావతీ అరుణవతీ నామ, తస్మిం అరుణవతియా నగరే, పూపికో పూపవిక్కయేన జీవికం కప్పేన్తో అహోసిన్తి అత్థో.

౧౪. చతుత్థాపదానే తివరాయం పురే రమ్మేతి తీహి పాకారేహి పరివారితా పరిక్ఖిత్తాతి తివరా, ఖజ్జభోజ్జాదిఉపభోగవత్థాభరణాదినచ్చగీతాదీహి రమణీయన్తి రమ్మం, తస్మిం తివరాయం పురే నగరే రమ్మే నళకారో అహం అహోసిన్తి సమ్బన్ధో.

పఞ్చమాపదానం ఉత్తానత్థమేవ.

౨౩. ఛట్ఠాపదానే వణ్ణకారో అహం తదాతి నీలపీతరత్తాదివణ్ణవసేన వత్థాని కరోతి రఞ్జేతీతి వణ్ణకారో. వత్థరజకో హుత్వా చేతియే వత్థేహి అచ్ఛాదనసమయే నానావణ్ణేహి దుస్సాని రఞ్జేసిన్తి అత్థో.

౨౭. సత్తమాపదానే పియాలం పుప్ఫితం దిస్వాతి సుపుప్ఫితం పియాలరుక్ఖం దిస్వా. గతమగ్గే ఖిపిం అహన్తి అహం మిగలుద్దో నేసాదో హుత్వా పియాలపుప్ఫం ఓచినిత్వా బుద్ధస్స గతమగ్గే ఖిపిం పూజేసిన్తి అత్థో.

౩౦. అట్ఠమాపదానే సకే సిప్పే అపత్థద్ధోతి అత్తనో తక్కబ్యాకరణాదిసిప్పస్మిం అపత్థద్ధో పతిట్ఠితో ఛేకో అహం కాననం అగమం గతో సమ్బుద్ధం యన్తం దిస్వానాతి వనన్తరే గచ్ఛన్తం విపస్సిం సమ్బుద్ధం పస్సిత్వా. అమ్బయాగం అదాసహన్తి అహం అమ్బదానం అదాసిన్తి అత్థో.

౩౩. నవమాపదానే జగతీ కారితా మయ్హన్తి అత్థదస్సిస్స భగవతో సరీరధాతునిధాపితచేతియే జగతి ఛిన్నభిన్నఆలిన్దపుప్ఫాధానసఙ్ఖాతా జగతి మయా కారితా కారాపితాతి అత్థో.

దసమాపదానం ఉత్తానత్థమేవాతి.

చతువీసతిమవగ్గవణ్ణనా సమత్తా.