౨౦. తమాలపుప్ఫియవగ్గో

౧-౧౦. తమాలపుప్ఫియత్థేరఅపదానాదివణ్ణనా

వీసతిమే వగ్గే పఠమత్థేరాపదానం ఉత్తానమేవ.

౬. దుతియత్థేరాపదానే యం దాయవాసికో ఇసీతి ఇసిపబ్బజ్జం పబ్బజిత్వా వనే వసనభావేన దాయవాసికో ఇసీతి సఙ్ఖం గతో, అత్తనో అనుకమ్పాయ తం వనం ఉపగతస్స సిద్ధత్థస్స సత్థునో వసనమణ్డపచ్ఛాదనత్థాయ యం తిణం, తం లాయతి ఛిన్దతీతి అత్థో. దబ్బఛదనం కత్వా అనేకేహి ఖుద్దకదణ్డకేహి మణ్డపం కత్వా తం తిణేన ఛాదేత్వా సిద్ధత్థస్స భగవతో అహం అదాసిం పూజేసిన్తి అత్థో.

౮. సత్తాహం ధారయుం తత్థాతి తం మణ్డపం తత్థ ఠితా దేవమనుస్సా సత్తాహం నిరోధసమాపత్తిం సమాపజ్జిత్వా నిసిన్నస్స సత్థునో ధారయుం ధారేసున్తి అత్థో. సేసం ఉత్తానత్థమేవాతి.

తతియత్థేరస్స అపదానే ఖణ్డఫుల్లియత్థేరోతి ఏత్థ ఖణ్డన్తి కట్ఠానం జిణ్ణత్తా ఛిన్నభిన్నట్ఠానం, ఫుల్లన్తి కట్ఠానం జిణ్ణట్ఠానే కణ్ణకితమహిచ్ఛత్తకాదిపుప్ఫనం, ఖణ్డఞ్చ ఫుల్లఞ్చ ఖణ్డఫుల్లాని, ఖణ్డఫుల్లానం పటిసఙ్ఖరణం పునప్పునం థిరకరణన్తి ఖణ్డఫుల్లపటిసఙ్ఖరణం. ఇమస్స పన థేరస్స సమ్భారపూరణకాలే ఫుస్సస్స భగవతో చేతియే ఛిన్నభిన్నట్ఠానే సుధాపిణ్డం మక్ఖేత్వా థిరకరణం ఖణ్డఫుల్లపటిసఙ్ఖరణం నామ. తస్మా సో ఖణ్డఫుల్లియో థేరోతి పాకటో అహోసి. తతియం.

౧౭. చతుత్థత్థేరస్సాపదానే రఞ్ఞో బద్ధచరో అహన్తి రఞ్ఞో పరిచారకో కమ్మకారకో అహోసిన్తి అత్థో.

౧౯. జలజుత్తమనామినోతి జలే ఉదకే జాతం జలజం, కిం తం పదుమం, పదుమేన సమాననామత్తా పదుముత్తరస్స భగవతోతి అత్థో. ఉత్తమపదుమనామస్స భగవతోతి వా అత్థో. చతుత్థం.

పఞ్చమం ఉత్తానత్థమేవ.

౨౮. ఛట్ఠే నగరే ద్వారవతియాతి మహాద్వారవాతపానకవాటఫలకాహి వతిపాకారట్టాలగోపురకద్దమోదకపరిఖాహి చ సమ్పన్నం నగరన్తి ద్వారవతీనగరం, ద్వారం వతిఞ్చ పధానం కత్వా నగరస్స ఉపలక్ఖితత్తా ‘‘ద్వారవతీ నగర’’న్తి వోహరన్తీతి నగరే ద్వారవతియాతి వుత్తం. మాలావచ్ఛో పుప్ఫారామో మమ అహోసీతి అత్థో.

౩౧. తే కిసలయాతి తే అసోకపల్లవా. ఛట్ఠం.

సత్తమట్ఠమనవమాని ఉత్తానత్థానేవ. దసమేపి అపుబ్బం నత్థీతి.

వీసతిమవణ్ణనా సమత్తా.