౧౦. అధికరణసమథసుత్తవణ్ణనా

౮౪. దసమే అధికరణాని సమేన్తి వూపసమేన్తీతి అధికరణసమథా. ఉప్పన్నుప్పన్నానన్తి ఉప్పన్నానం ఉప్పన్నానం. అధికరణానన్తి వివాదాధికరణం అనువాదాధికరణం ఆపత్తాధికరణం కిచ్చాధికరణన్తి ఇమేసం చతున్నం. సమథాయ వూపసమాయాతి సమథత్థఞ్చేవ వూపసమనత్థఞ్చ. సమ్ముఖావినయో దాతబ్బో…పే… తిణవత్థారకోతి ఇమే సత్త సమథా దాతబ్బా. తేసం వినిచ్ఛయో వినయసంవణ్ణనతో (చూళవ. అట్ఠ. ౧౮౬-౧౮౭ ఆదయో) గహేతబ్బో. అపిచ దీఘనికాయే సఙ్గీతిసుత్తవణ్ణనాయమ్పి (దీ. ని. అట్ఠ. ౩.౩౩౧ అధికరణసమథసత్తకవణ్ణనా) విత్థారితోయేవ, తథా మజ్ఝిమనికాయే సామగామసుత్తవణ్ణనాయాతి (మ. ని. అట్ఠ. ౩.౪౬).

వినయవగ్గో అట్ఠమో.