౩. సుద్ధిన్ద్రియవారో

(క) అనులోమం

౧౪౦. (క) చక్ఖు ఇన్ద్రియన్తి? ఆమన్తా.

(ఖ) ఇన్ద్రియా చక్ఖున్ద్రియన్తి?

చక్ఖున్ద్రియం ఇన్ద్రియఞ్చేవ చక్ఖున్ద్రియఞ్చ. అవసేసా ఇన్ద్రియా న చక్ఖున్ద్రియం.

(క) సోతం ఇన్ద్రియన్తి?

యం సోతం ఇన్ద్రియం తం సోతఞ్చేవ ఇన్ద్రియఞ్చ. అవసేసం సోతం న ఇన్ద్రియం.

(ఖ) ఇన్ద్రియా సోతిన్ద్రియన్తి? సోతిన్ద్రియం ఇన్ద్రియఞ్చేవ సోతిన్ద్రియఞ్చ. అవసేసా ఇన్ద్రియా న సోతిన్ద్రియం.

(క) ఘానం ఇన్ద్రియన్తి? ఆమన్తా.

(ఖ) ఇన్ద్రియా ఘానిన్ద్రియన్తి?

ఘానిన్ద్రియం ఇన్ద్రియఞ్చేవ ఘానిన్ద్రియఞ్చ. అవసేసా ఇన్ద్రియా న ఘానిన్ద్రియం.

(క) జివ్హా ఇన్ద్రియన్తి? ఆమన్తా.

(ఖ) ఇన్ద్రియా జివ్హిన్ద్రియన్తి?

జివ్హిన్ద్రియం ఇన్ద్రియఞ్చేవ జివ్హిన్ద్రియఞ్చ. అవసేసా ఇన్ద్రియా న జివ్హిన్ద్రియం.

(క) కాయో ఇన్ద్రియన్తి?

యో కాయో ఇన్ద్రియం సో కాయో చేవ ఇన్ద్రియఞ్చ. అవసేసో కాయో న ఇన్ద్రియా.

(ఖ) ఇన్ద్రియా కాయిన్ద్రియన్తి?

కాయిన్ద్రియం ఇన్ద్రియఞ్చేవ కాయిన్ద్రియఞ్చ. అవసేసా ఇన్ద్రియా న కాయిన్ద్రియం.

(క) మనో ఇన్ద్రియన్తి? ఆమన్తా.

(ఖ) ఇన్ద్రియా మనిన్ద్రియన్తి?

మనిన్ద్రియం ఇన్ద్రియఞ్చేవ మనిన్ద్రియఞ్చ. అవసేసా ఇన్ద్రియా న మనిన్ద్రియం.

(క) ఇత్థీ ఇన్ద్రియన్తి? నో.

(ఖ) ఇన్ద్రియా ఇత్థిన్ద్రియన్తి?

ఇత్థిన్ద్రియం ఇన్ద్రియఞ్చేవ ఇత్థిన్ద్రియఞ్చ. అవసేసా ఇన్ద్రియా న ఇత్థిన్ద్రియం.

(క) పురిసో ఇన్ద్రియన్తి? నో.

(ఖ) ఇన్ద్రియా పురిసిన్ద్రియన్తి?

పురిసిన్ద్రియం ఇన్ద్రియఞ్చేవ పురిసిన్ద్రియఞ్చ. అవసేసా ఇన్ద్రియా న పురిసిన్ద్రియం.

(క) జీవితం ఇన్ద్రియన్తి? ఆమన్తా.

(ఖ) ఇన్ద్రియా జీవితిన్ద్రియన్తి?

జీవితిన్ద్రియం ఇన్ద్రియఞ్చేవ జీవితిన్ద్రియఞ్చ. అవసేసా ఇన్ద్రియా న జీవితిన్ద్రియం.

(క) సుఖం ఇన్ద్రియన్తి? ఆమన్తా.

(ఖ) ఇన్ద్రియా సుఖిన్ద్రియన్తి?

సుఖిన్ద్రియం ఇన్ద్రియఞ్చేవ సుఖిన్ద్రియఞ్చ. అవసేసా ఇన్ద్రియా న సుఖిన్ద్రియం.

(క) దుక్ఖం ఇన్ద్రియన్తి? ఆమన్తా.

(ఖ) ఇన్ద్రియా దుక్ఖిన్ద్రియన్తి?

దుక్ఖిన్ద్రియం ఇన్ద్రియఞ్చేవ దుక్ఖిన్ద్రియఞ్చ. అవసేసా ఇన్ద్రియా న దుక్ఖిన్ద్రియం.

(క) సోమనస్సం ఇన్ద్రియన్తి? ఆమన్తా.

(ఖ) ఇన్ద్రియా సోమనస్సిన్ద్రియన్తి?

సోమనస్సిన్ద్రియం ఇన్ద్రియఞ్చేవ సోమనస్సిన్ద్రియఞ్చ. అవసేసా ఇన్ద్రియా న సోమనస్సిన్ద్రియం.

(క) దోమనస్సం ఇన్ద్రియన్తి? ఆమన్తా.

(క) ఇన్ద్రియా దోమనస్సిన్ద్రియన్తి?

దోమనస్సిన్ద్రియం ఇన్ద్రియఞ్చేవ దోమనస్సిన్ద్రియఞ్చ. అవసేసా ఇన్ద్రియా న దోమనస్సిన్ద్రియం.

(క) ఉపేక్ఖా ఇన్ద్రియన్తి?

యా ఉపేక్ఖా ఇన్ద్రియం సా ఉపేక్ఖా చేవ ఇన్ద్రియఞ్చ. అవసేసా ఉపేక్ఖా న ఇన్ద్రియం.

(ఖ) ఇన్ద్రియా ఉపేక్ఖిన్ద్రియన్తి?

ఉపేక్ఖిన్ద్రియం ఇన్ద్రియఞ్చేవ ఉపేక్ఖిన్ద్రియఞ్చ. అవసేసా ఇన్ద్రియా న ఉపేక్ఖిన్ద్రియం.

(క) సద్ధా ఇన్ద్రియన్తి? ఆమన్తా.

(ఖ) ఇన్ద్రియా సద్ధిన్ద్రియన్తి?

సద్ధిన్ద్రియం ఇన్ద్రియఞ్చేవ సద్ధిన్ద్రియఞ్చ. అవసేసా ఇన్ద్రియా న సద్ధిన్ద్రియం.

(క) వీరియం ఇన్ద్రియన్తి? ఆమన్తా.

(ఖ) ఇన్ద్రియా వీరియిన్ద్రియన్తి?

వీరియిన్ద్రియం ఇన్ద్రియఞ్చేవ వీరియిన్ద్రియఞ్చ. అవసేసా ఇన్ద్రియా న వీరియిన్ద్రియం.

(క) సతి ఇన్ద్రియన్తి? ఆమన్తా.

(ఖ) ఇన్ద్రియా సతిన్ద్రియన్తి?

సతిన్ద్రియం ఇన్ద్రియఞ్చేవ సతిన్ద్రియఞ్చ. అవసేసా ఇన్ద్రియా న సతిన్ద్రియం.

(క) సమాధి ఇన్ద్రియన్తి? ఆమన్తా.

(ఖ) ఇన్ద్రియా సమాధిన్ద్రియన్తి?

సమాధిన్ద్రియం ఇన్ద్రియఞ్చేవ సమాధిన్ద్రియఞ్చ. అవసేసా ఇన్ద్రియా న సమాధిన్ద్రియం.

(క) పఞ్ఞా ఇన్ద్రియన్తి? ఆమన్తా.

(ఖ) ఇన్ద్రియా పఞ్ఞిన్ద్రియన్తి?

పఞ్ఞిన్ద్రియం ఇన్ద్రియఞ్చేవ పఞ్ఞిన్ద్రియఞ్చ. అవసేసా ఇన్ద్రియా న పఞ్ఞిన్ద్రియం.

(క) అనఞ్ఞాతఞ్ఞస్సామీతి ఇన్ద్రియన్తి? ఆమన్తా.

(ఖ) ఇన్ద్రియా అనఞ్ఞాతఞ్ఞస్సామీతిన్ద్రియన్తి?

అనఞ్ఞాతఞ్ఞస్సామీతిన్ద్రియం ఇన్ద్రియఞ్చేవ అనఞ్ఞాతఞ్ఞస్సామీతిన్ద్రియఞ్చ. అవసేసా ఇన్ద్రియా న అనఞ్ఞాతఞ్ఞస్సామీతిన్ద్రియం.

(క) అఞ్ఞం ఇన్ద్రియన్తి? ఆమన్తా.

(ఖ) ఇన్ద్రియా అఞ్ఞిన్ద్రియన్తి?

అఞ్ఞిన్ద్రియం ఇన్ద్రియఞ్చేవ అఞ్ఞిన్ద్రియఞ్చ. అవసేసా ఇన్ద్రియా న అఞ్ఞిన్ద్రియం.

(క) అఞ్ఞాతావీ ఇన్ద్రియన్తి? ఆమన్తా.

(ఖ) ఇన్ద్రియా అఞ్ఞాతావిన్ద్రియన్తి?

అఞ్ఞాతావిన్ద్రియం ఇన్ద్రియఞ్చేవ అఞ్ఞాతావిన్ద్రియఞ్చ. అవసేసా ఇన్ద్రియా న అఞ్ఞాతావిన్ద్రియం.

(ఖ) పచ్చనీకం

౧౪౧. (క) న చక్ఖు న ఇన్ద్రియన్తి?

చక్ఖుం ఠపేత్వా అవసేసా ఇన్ద్రియా న చక్ఖు, ఇన్ద్రియా. చక్ఖుఞ్చ ఇన్ద్రియే చ ఠపేత్వా అవసేసా న చేవ చక్ఖు న చ ఇన్ద్రియా.

(ఖ) న ఇన్ద్రియా న చక్ఖున్ద్రియన్తి? ఆమన్తా.

(క) న సోతం న ఇన్ద్రియన్తి?

సోతం ఠపేత్వా అవసేసా ఇన్ద్రియా న సోతం, ఇన్ద్రియా. సోతఞ్చ ఇన్ద్రియే చ ఠపేత్వా అవసేసా న చేవ సోతం న చ ఇన్ద్రియా.

(ఖ) న ఇన్ద్రియా న సోతిన్ద్రియన్తి? ఆమన్తా.

(క) న ఘానం న ఇన్ద్రియన్తి?

ఘానం ఠపేత్వా అవసేసా ఇన్ద్రియా న ఘానం, ఇన్ద్రియా. ఘానఞ్చ ఇన్ద్రియే చ ఠపేత్వా అవసేసా న చేవ ఘానం న చ ఇన్ద్రియా.

(ఖ) న ఇన్ద్రియా న ఘానిన్ద్రియన్తి? ఆమన్తా.

(క) న జివ్హా న ఇన్ద్రియన్తి?

జివ్హం ఠపేత్వా అవసేసా ఇన్ద్రియా న జివ్హా, ఇన్ద్రియా. జివ్హఞ్చ ఇన్ద్రియే చ ఠపేత్వా అవసేసా న చేవ జివ్హా న చ ఇన్ద్రియా.

(ఖ) న ఇన్ద్రియా న జివ్హిన్ద్రియన్తి? ఆమన్తా.

(క) న కాయో న ఇన్ద్రియన్తి? ఆమన్తా.

(ఖ) న ఇన్ద్రియా న కాయిన్ద్రియన్తి? ఆమన్తా.

(క) న మనో న ఇన్ద్రియన్తి?

మనం ఠపేత్వా అవసేసా ఇన్ద్రియా న మనో, ఇన్ద్రియా. మనఞ్చ ఇన్ద్రియే చ ఠపేత్వా అవసేసా న చేవ మనో న చ ఇన్ద్రియా.

(ఖ) న ఇన్ద్రియా న మనిన్ద్రియన్తి? ఆమన్తా.

(క) న ఇత్థీ న ఇన్ద్రియన్తి?

ఇత్థిం ఠపేత్వా అవసేసా ఇన్ద్రియా న ఇత్థీ, ఇన్ద్రియా. ఇత్థిఞ్చ ఇన్ద్రియే చ ఠపేత్వా అవసేసా న చేవ ఇత్థీ న చ ఇన్ద్రియా.

(ఖ) న ఇన్ద్రియా న ఇత్థిన్ద్రియన్తి? ఆమన్తా.

(క) న పురిసో న ఇన్ద్రియన్తి?

పురిసం ఠపేత్వా అవసేసా ఇన్ద్రియా న పురిసో, ఇన్ద్రియా. పురిసఞ్చ ఇన్ద్రియే చ ఠపేత్వా అవసేసా న చేవ పురిసో న చ ఇన్ద్రియా.

(ఖ) న ఇన్ద్రియా న పురిసిన్ద్రియన్తి? ఆమన్తా.

(క) న జీవితం న ఇన్ద్రియన్తి?

జీవితం ఠపేత్వా అవసేసా ఇన్ద్రియా న జీవితం, ఇన్ద్రియా. జీవితఞ్చ ఇన్ద్రియే చ ఠపేత్వా అవసేసా న చేవ జీవితం న చ ఇన్ద్రియా.

(ఖ) న ఇన్ద్రియా న జీవితిన్ద్రియన్తి? ఆమన్తా.

(క) న సుఖం న ఇన్ద్రియన్తి?

సుఖం ఠపేత్వా అవసేసా ఇన్ద్రియా న సుఖం, ఇన్ద్రియా. సుఖఞ్చ ఇన్ద్రియే చ ఠపేత్వా అవసేసా న చేవ సుఖం న చ ఇన్ద్రియా.

(ఖ) న ఇన్ద్రియా న సుఖిన్ద్రియన్తి? ఆమన్తా.

(క) న దుక్ఖం న ఇన్ద్రియన్తి?

దుక్ఖం ఠపేత్వా అవసేసా ఇన్ద్రియా న దుక్ఖం, ఇన్ద్రియా. దుక్ఖఞ్చ ఇన్ద్రియే చ ఠపేత్వా అవసేసా న చేవ దుక్ఖం న చ ఇన్ద్రియా.

(ఖ) న ఇన్ద్రియా న దుక్ఖిన్ద్రియన్తి? ఆమన్తా.

(క) న సోమనస్సం న ఇన్ద్రియన్తి?

సోమనస్సం ఠపేత్వా అవసేసా ఇన్ద్రియా న సోమనస్సం, ఇన్ద్రియా. సోమనస్సఞ్చ ఇన్ద్రియే చ ఠపేత్వా అవసేసా న చేవ సోమనస్సం న చ ఇన్ద్రియా.

(ఖ) న ఇన్ద్రియా న సోమనస్సిన్ద్రియన్తి? ఆమన్తా.

(క) న దోమనస్సం న ఇన్ద్రియన్తి?

దోమనస్సం ఠపేత్వా అవసేసా ఇన్ద్రియా న దోమనస్సం, ఇన్ద్రియా. దోమనస్సఞ్చ ఇన్ద్రియే చ ఠపేత్వా అవసేసా న చేవ దోమనస్సం న చ ఇన్ద్రియా.

(ఖ) న ఇన్ద్రియా న దోమనస్సిన్ద్రియన్తి? ఆమన్తా.

(క) న ఉపేక్ఖా న ఇన్ద్రియన్తి?

ఉపేక్ఖం ఠపేత్వా అవసేసా ఇన్ద్రియా న ఉపేక్ఖా, ఇన్ద్రియా. ఉపేక్ఖఞ్చ ఇన్ద్రియే చ ఠపేత్వా అవసేసా న చేవ ఉపేక్ఖా న చ ఇన్ద్రియా.

(ఖ) న ఇన్ద్రియా న ఉపేక్ఖిన్ద్రియన్తి? ఆమన్తా.

(క) న సద్ధా న ఇన్ద్రియన్తి?

సద్ధం ఠపేత్వా అవసేసా ఇన్ద్రియా న సద్ధా, ఇన్ద్రియా. సద్ధఞ్చ ఇన్ద్రియే చ ఠపేత్వా అవసేసా న చేవ సద్ధా న చ ఇన్ద్రియా.

(ఖ) న ఇన్ద్రియా న సద్ధిన్ద్రియన్తి? ఆమన్తా.

(క) న వీరియం న ఇన్ద్రియన్తి?

వీరియం ఠపేత్వా అవసేసా ఇన్ద్రియా న వీరియం, ఇన్ద్రియా. వీరియఞ్చ ఇన్ద్రియే చ ఠపేత్వా అవసేసా న చేవ వీరియం న చ ఇన్ద్రియా.

(ఖ) న ఇన్ద్రియా న వీరియిన్ద్రియన్తి? ఆమన్తా.

(క) న సతి న ఇన్ద్రియన్తి?

సతిం ఠపేత్వా అవసేసా ఇన్ద్రియా న సతి, ఇన్ద్రియా. సతిఞ్చ ఇన్ద్రియే చ ఠపేత్వా అవసేసా న చేవ సతి న చ ఇన్ద్రియా.

(ఖ) న ఇన్ద్రియా న సతిన్ద్రియన్తి? ఆమన్తా.

(క) న సమాధి న ఇన్ద్రియన్తి?

సమాధిం ఠపేత్వా అవసేసా ఇన్ద్రియా న సమాధి, ఇన్ద్రియా. సమాధిఞ్చ ఇన్ద్రియే చ ఠపేత్వా అవసేసా న చేవ సమాధి న చ ఇన్ద్రియా.

(ఖ) న ఇన్ద్రియా న సమాధిన్ద్రియన్తి? ఆమన్తా.

(క) న పఞ్ఞా న ఇన్ద్రియన్తి?

పఞ్ఞం ఠపేత్వా అవసేసా ఇన్ద్రియా న పఞ్ఞా, ఇన్ద్రియా. పఞ్ఞఞ్చ ఇన్ద్రియే చ ఠపేత్వా అవసేసా న చేవ పఞ్ఞా న చ ఇన్ద్రియా.

(ఖ) న ఇన్ద్రియా న పఞ్ఞిన్ద్రియన్తి? ఆమన్తా.

(క) న అనఞ్ఞాతఞ్ఞస్సామీతి న ఇన్ద్రియన్తి?

అనఞ్ఞాతఞ్ఞస్సామీతిం ఠపేత్వా అవసేసా ఇన్ద్రియా న అనఞ్ఞాతఞ్ఞస్సామీతి, ఇన్ద్రియా. అనఞ్ఞాతఞ్ఞస్సామీతిఞ్చ ఇన్ద్రియే చ ఠపేత్వా అవసేసా న చేవ అనఞ్ఞాతఞ్ఞస్సామీతి న చ ఇన్ద్రియా.

(ఖ) న ఇన్ద్రియా న అనఞ్ఞాతఞ్ఞస్సామీతిన్ద్రియన్తి? ఆమన్తా.

(క) న అఞ్ఞం న ఇన్ద్రియన్తి?

అఞ్ఞం ఠపేత్వా అవసేసా ఇన్ద్రియా న అఞ్ఞం, ఇన్ద్రియా. అఞ్ఞఞ్చ ఇన్ద్రియే చ ఠపేత్వా అవసేసా న చేవ అఞ్ఞం న చ ఇన్ద్రియా.

(ఖ) న ఇన్ద్రియా న అఞ్ఞిన్ద్రియన్తి? ఆమన్తా.

(క) న అఞ్ఞాతావీ న ఇన్ద్రియన్తి?

అఞ్ఞాతావిం ఠపేత్వా అవసేసా ఇన్ద్రియా న అఞ్ఞాతావీ, ఇన్ద్రియా. అఞ్ఞాతావిఞ్చ ఇన్ద్రియే చ ఠపేత్వా అవసేసా న చేవ అఞ్ఞాతావీ న చ ఇన్ద్రియా.

(ఖ) న ఇన్ద్రియా న అఞ్ఞాతావిన్ద్రియన్తి? ఆమన్తా.