౩. సుద్ధధమ్మవారో

(క) అనులోమం

౨౫. (క) కుసలా ధమ్మాతి? ఆమన్తా.

(ఖ) ధమ్మా కుసలా ధమ్మాతి?

కుసలా ధమ్మా ధమ్మా చేవ కుసలా ధమ్మా చ. అవసేసా ధమ్మా న కుసలా ధమ్మా.

(క) అకుసలా ధమ్మాతి? ఆమన్తా.

(ఖ) ధమ్మా అకుసలా ధమ్మాతి?

అకుసలా ధమ్మా ధమ్మా చేవ అకుసలా ధమ్మా చ. అవసేసా ధమ్మా న అకుసలా ధమ్మా.

(క) అబ్యాకతా ధమ్మాతి? ఆమన్తా.

(ఖ) ధమ్మా అబ్యాకతా ధమ్మాతి?

అబ్యాకతా ధమ్మా ధమ్మా చేవ అబ్యాకతా ధమ్మా చ. అవసేసా ధమ్మా న అబ్యాకతా ధమ్మా.

(ఖ) పచ్చనీకం

౨౬. (క) న కుసలా న ధమ్మాతి?

కుసలం ఠపేత్వా అవసేసా ధమ్మా న కుసలా, ధమ్మా. కుసలఞ్చ ధమ్మే చ ఠపేత్వా అవసేసా న చేవ కుసలా న చ ధమ్మా.

(ఖ) న ధమ్మా న కుసలా ధమ్మాతి? ఆమన్తా.

(క) న అకుసలా న ధమ్మాతి?

అకుసలం ఠపేత్వా అవసేసా ధమ్మా న అకుసలా, ధమ్మా. అకుసలఞ్చ ధమ్మే చ ఠపేత్వా అవసేసా న చేవ అకుసలా న చ ధమ్మా.

(ఖ) న ధమ్మా న అకుసలా ధమ్మాతి? ఆమన్తా.

(క) న అబ్యాకతా న ధమ్మాతి?

అబ్యాకతం ఠపేత్వా అవసేసా ధమ్మా న అబ్యాకతా, ధమ్మా. అబ్యాకతఞ్చ ధమ్మే చ ఠపేత్వా అవసేసా న చేవ అబ్యాకతా న చ ధమ్మా.

(ఖ) న ధమ్మా న అబ్యాకతా ధమ్మాతి? ఆమన్తా.