౬. ఉప్పజ్జనవారో

౩౩౦. (క) యస్స కామరాగానుసయో ఉప్పజ్జతి తస్స పటిఘానుసయో ఉప్పజ్జతీతి? ఆమన్తా.

(ఖ) యస్స వా పన పటిఘానుసయో ఉప్పజ్జతి తస్స కామరాగానుసయో ఉప్పజ్జతీతి? ఆమన్తా.

(క) యస్స కామరాగానుసయో ఉప్పజ్జతి తస్స మానానుసయో ఉప్పజ్జతీతి? ఆమన్తా.

(ఖ) యస్స వా పన మానానుసయో ఉప్పజ్జతి తస్స కామరాగానుసయో ఉప్పజ్జతీతి?

అనాగామిస్స మానానుసయో ఉప్పజ్జతి, నో చ తస్స కామరాగానుసయో ఉప్పజ్జతి. తిణ్ణం పుగ్గలానం మానానుసయో చ ఉప్పజ్జతి కామరాగానుసయో చ ఉప్పజ్జతి (విత్థారేతబ్బం).

౩౩౧. (క) యస్స కామరాగానుసయో నుప్పజ్జతి తస్స పటిఘానుసయో నుప్పజ్జతీతి? ఆమన్తా.

(ఖ) యస్స వా పన పటిఘానుసయో నుప్పజ్జతి తస్స కామరాగానుసయో నుప్పజ్జతీతి? ఆమన్తా.

(క) యస్స కామరాగానుసయో నుప్పజ్జతి తస్స మానానుసయో నుప్పజ్జతీతి?

అనాగామిస్స కామరాగానుసయో నుప్పజ్జతి, నో చ తస్స మానానుసయో నుప్పజ్జతి. అరహతో కామరాగానుసయో చ నుప్పజ్జతి మానానుసయో చ నుప్పజ్జతి.

(ఖ) యస్స వా పన మానానుసయో నుప్పజ్జతి తస్స కామరాగానుసయో నుప్పజ్జతీతి? ఆమన్తా. (విత్థారేతబ్బం).

ఉప్పజ్జనవారో.