(౫) పచ్చుప్పన్నానాగతవారో

(క) అనులోమపుగ్గలో

౧౪౮. (క) యస్స కాయసఙ్ఖారో ఉప్పజ్జతి తస్స వచీసఙ్ఖారో నిరుజ్ఝిస్సతీతి? ఆమన్తా.

(ఖ) యస్స వా పన వచీసఙ్ఖారో నిరుజ్ఝిస్సతి తస్స కాయసఙ్ఖారో ఉప్పజ్జతీతి?

సబ్బేసం చిత్తస్స భఙ్గక్ఖణే వినా అస్సాసపస్సాసేహి చిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం వచీసఙ్ఖారో నిరుజ్ఝిస్సతి, నో చ తేసం కాయసఙ్ఖారో ఉప్పజ్జతి. అస్సాసపస్సాసానం ఉప్పాదక్ఖణే తేసం వచీసఙ్ఖారో చ నిరుజ్ఝిస్సతి కాయసఙ్ఖారో చ ఉప్పజ్జతి.

(క) యస్స కాయసఙ్ఖారో ఉప్పజ్జతి తస్స చిత్తసఙ్ఖారో నిరుజ్ఝిస్సతీతి? ఆమన్తా.

(ఖ) యస్స వా పన చిత్తసఙ్ఖారో నిరుజ్ఝిస్సతి తస్స కాయసఙ్ఖారో ఉప్పజ్జతీతి?

సబ్బేసం చిత్తస్స భఙ్గక్ఖణే వినా అస్సాసపస్సాసేహి చిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం చిత్తసఙ్ఖారో నిరుజ్ఝిస్సతి, నో చ తేసం కాయసఙ్ఖారో ఉప్పజ్జతి. అస్సాసపస్సాసానం ఉప్పాదక్ఖణే తేసం చిత్తసఙ్ఖారో చ నిరుజ్ఝిస్సతి కాయసఙ్ఖారో చ ఉప్పజ్జతి.

౧౪౯. (క) యస్స వచీసఙ్ఖారో ఉప్పజ్జతి తస్స చిత్తసఙ్ఖారో నిరుజ్ఝిస్సతీతి? ఆమన్తా.

(ఖ) యస్స వా పన చిత్తసఙ్ఖారో నిరుజ్ఝిస్సతి తస్స వచీసఙ్ఖారో ఉప్పజ్జతీతి?

సబ్బేసం చిత్తస్స భఙ్గక్ఖణే వినా వితక్కవిచారేహి చిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం చిత్తసఙ్ఖారో నిరుజ్ఝిస్సతి, నో చ తేసం వచీసఙ్ఖారో ఉప్పజ్జతి. వితక్కవిచారానం ఉప్పాదక్ఖణే తేసం చిత్తసఙ్ఖారో చ నిరుజ్ఝిస్సతి వచీసఙ్ఖారో చ ఉప్పజ్జతి.

(ఖ) అనులోమఓకాసో

౧౫౦. యత్థ కాయసఙ్ఖారో ఉప్పజ్జతి…పే….

(గ) అనులోమపుగ్గలోకాసా

౧౫౧. (క) యస్స యత్థ కాయసఙ్ఖారో ఉప్పజ్జతి తస్స తత్థ వచీసఙ్ఖారో నిరుజ్ఝిస్సతీతి?

దుతియజ్ఝానం తతియజ్ఝానం సమాపన్నానం అస్సాసపస్సాసానం ఉప్పాదక్ఖణే తేసం తత్థ కాయసఙ్ఖారో ఉప్పజ్జతి, నో చ తేసం తత్థ వచీసఙ్ఖారో నిరుజ్ఝిస్సతి. పఠమజ్ఝానం సమాపన్నానం కామావచరానం అస్సాసపస్సాసానం ఉప్పాదక్ఖణే తేసం తత్థ కాయసఙ్ఖారో చ ఉప్పజ్జతి వచీసఙ్ఖారో చ నిరుజ్ఝిస్సతి.

(ఖ) యస్స వా పన యత్థ వచీసఙ్ఖారో నిరుజ్ఝిస్సతి తస్స తత్థ కాయసఙ్ఖారో ఉప్పజ్జతీతి?

పఠమజ్ఝానం సమాపన్నానం కామావచరానం అస్సాసపస్సాసానం భఙ్గక్ఖణే తేసంయేవ వినా అస్సాసపస్సాసేహి చిత్తస్స ఉప్పాదక్ఖణే రూపావచరానం అరూపావచరానం తేసం తత్థ వచీసఙ్ఖారో నిరుజ్ఝిస్సతి, నో చ తేసం తత్థ కాయసఙ్ఖారో ఉప్పజ్జతి. పఠమజ్ఝానం సమాపన్నానం కామావచరానం అస్సాసపస్సాసానం ఉప్పాదక్ఖణే తేసం తత్థ వచీసఙ్ఖారో చ నిరుజ్ఝిస్సతి కాయసఙ్ఖారో చ ఉప్పజ్జతి.

(క) యస్స యత్థ కాయసఙ్ఖారో ఉప్పజ్జతి తస్స తత్థ చిత్తసఙ్ఖారో నిరుజ్ఝిస్సతీతి? ఆమన్తా.

(ఖ) యస్స వా పన యత్థ చిత్తసఙ్ఖారో నిరుజ్ఝిస్సతి తస్స తత్థ కాయసఙ్ఖారో ఉప్పజ్జతీతి?

సబ్బేసం చిత్తస్స భఙ్గక్ఖణే వినా అస్సాసపస్సాసేహి చిత్తస్స ఉప్పాదక్ఖణే తేసం తత్థ చిత్తసఙ్ఖారో నిరుజ్ఝిస్సతి, నో చ తేసం తత్థ కాయసఙ్ఖారో ఉప్పజ్జతి. అస్సాసపస్సాసానం ఉప్పాదక్ఖణే తేసం తత్థ చిత్తసఙ్ఖారో చ నిరుజ్ఝిస్సతి కాయసఙ్ఖారో చ ఉప్పజ్జతి.

౧౫౨. (క) యస్స యత్థ వచీసఙ్ఖారో ఉప్పజ్జతి తస్స తత్థ చిత్తసఙ్ఖారో నిరుజ్ఝిస్సతీతి? ఆమన్తా.

(ఖ) యస్స వా పన యత్థ చిత్తసఙ్ఖారో నిరుజ్ఝిస్సతి తస్స తత్థ వచీసఙ్ఖారో ఉప్పజ్జతీతి?

సబ్బేసం చిత్తస్స భఙ్గక్ఖణే వినా వితక్కవిచారేహి చిత్తస్స ఉప్పాదక్ఖణే తేసం తత్థ చిత్తసఙ్ఖారో నిరుజ్ఝిస్సతి, నో చ తేసం తత్థ వచీసఙ్ఖారో ఉప్పజ్జతి. వితక్కవిచారానం ఉప్పాదక్ఖణే తేసం తత్థ చిత్తసఙ్ఖారో చ నిరుజ్ఝిస్సతి వచీసఙ్ఖారో చ ఉప్పజ్జతి.

(ఘ) పచ్చనీకపుగ్గలో

౧౫౩. (క) యస్స కాయసఙ్ఖారో నుప్పజ్జతి తస్స వచీసఙ్ఖారో న నిరుజ్ఝిస్సతీతి?

సబ్బేసం చిత్తస్స భఙ్గక్ఖణే వినా అస్సాసపస్సాసేహి చిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం కాయసఙ్ఖారో నుప్పజ్జతి, నో చ తేసం వచీసఙ్ఖారో న నిరుజ్ఝిస్సతి. సవితక్కసవిచారపచ్ఛిమచిత్తస్స భఙ్గక్ఖణే అవితక్కఅవిచారపచ్ఛిమచిత్తసమఙ్గీనం యస్స చిత్తస్స అనన్తరా అవితక్కఅవిచారం పచ్ఛిమచిత్తం ఉప్పజ్జిస్సతి తేసం కాయసఙ్ఖారో చ నుప్పజ్జతి వచీసఙ్ఖారో చ న నిరుజ్ఝిస్సతి.

(ఖ) యస్స వా పన వచీసఙ్ఖారో న నిరుజ్ఝిస్సతి తస్స కాయసఙ్ఖారో నుప్పజ్జతీతి? ఆమన్తా.

(క) యస్స కాయసఙ్ఖారో నుప్పజ్జతి తస్స చిత్తసఙ్ఖారో న నిరుజ్ఝిస్సతీతి?

సబ్బేసం చిత్తస్స భఙ్గక్ఖణే వినా అస్సాసపస్సాసేహి చిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం కాయసఙ్ఖారో నుప్పజ్జతి, నో చ తేసం చిత్తసఙ్ఖారో న నిరుజ్ఝిస్సతి. పచ్ఛిమచిత్తస్స భఙ్గక్ఖణే తేసం కాయసఙ్ఖారో చ నుప్పజ్జతి చిత్తసఙ్ఖారో చ న నిరుజ్ఝిస్సతి.

(ఖ) యస్స వా పన చిత్తసఙ్ఖారో న నిరుజ్ఝిస్సతి తస్స కాయసఙ్ఖారో నుప్పజ్జతీతి? ఆమన్తా.

౧౫౪. (క) యస్స వచీసఙ్ఖారో నుప్పజ్జతి తస్స చిత్తసఙ్ఖారో న నిరుజ్ఝిస్సతీతి?

సబ్బేసం చిత్తస్స భఙ్గక్ఖణే వినా వితక్కవిచారేహి చిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం వచీసఙ్ఖారో నుప్పజ్జతి, నో చ తేసం చిత్తసఙ్ఖారో న నిరుజ్ఝిస్సతి. పచ్ఛిమచిత్తస్స భఙ్గక్ఖణే తేసం వచీసఙ్ఖారో చ నుప్పజ్జతి చిత్తసఙ్ఖారో చ న నిరుజ్ఝిస్సతి.

(ఖ) యస్స వా పన చిత్తసఙ్ఖారో న నిరుజ్ఝిస్సతి తస్స వచీసఙ్ఖారో నుప్పజ్జతీతి? ఆమన్తా.

(ఙ) పచ్చనీకఓకాసో

౧౫౫. యత్థ కాయసఙ్ఖారో నుప్పజ్జతి…పే….

(చ) పచ్చనీకపుగ్గలోకాసా

౧౫౬. (క) యస్స యత్థ కాయసఙ్ఖారో నుప్పజ్జతి తస్స తత్థ వచీసఙ్ఖారో న నిరుజ్ఝిస్సతీతి?

పఠమజ్ఝానం సమాపన్నానం కామావచరానం అస్సాసపస్సాసానం భఙ్గక్ఖణే తేసంయేవ వినా అస్సాసపస్సాసేహి చిత్తస్స ఉప్పాదక్ఖణే రూపావచరానం అరూపావచరానం తేసం తత్థ కాయసఙ్ఖారో నుప్పజ్జతి, నో చ తేసం తత్థ వచీసఙ్ఖారో న నిరుజ్ఝిస్సతి. సవితక్కసవిచారపచ్ఛిమచిత్తస్స భఙ్గక్ఖణే అవితక్కఅవిచారపచ్ఛిమచిత్తసమఙ్గీనం యస్స చిత్తస్స అనన్తరా అవితక్కఅవిచారం పచ్ఛిమచిత్తం ఉప్పజ్జిస్సతి దుతియజ్ఝానం తతియజ్ఝానం సమాపన్నానం అస్సాసపస్సాసానం భఙ్గక్ఖణే తేసంయేవ వినా అస్సాసపస్సాసేహి చిత్తస్స ఉప్పాదక్ఖణే చతుత్థజ్ఝానం సమాపన్నానం అసఞ్ఞసత్తానం తేసం తత్థ కాయసఙ్ఖారో చ నుప్పజ్జతి వచీసఙ్ఖారో చ న నిరుజ్ఝిస్సతి.

(ఖ) యస్స వా పన యత్థ వచీసఙ్ఖారో న నిరుజ్ఝిస్సతి తస్స తత్థ కాయసఙ్ఖారో నుప్పజ్జతీతి?

దుతియజ్ఝానం తతియజ్ఝానం సమాపన్నానం అస్సాసపస్సాసానం ఉప్పాదక్ఖణే తేసం తత్థ వచీసఙ్ఖారో న నిరుజ్ఝిస్సతి, నో చ తేసం తత్థ కాయసఙ్ఖారో నుప్పజ్జతి. సవితక్కసవిచారపచ్ఛిమచిత్తస్స భఙ్గక్ఖణే అవితక్కఅవిచారపచ్ఛిమచిత్తసమఙ్గీనం యస్స చిత్తస్స అనన్తరా అవితక్కఅవిచారం పచ్ఛిమచిత్తం ఉప్పజ్జిస్సతి దుతియజ్ఝానం తతియజ్ఝానం సమాపన్నానం అస్సాసపస్సాసానం భఙ్గక్ఖణే తేసంయేవ వినా అస్సాసపస్సాసేహి చిత్తస్స ఉప్పాదక్ఖణే చతుత్థజ్ఝానం సమాపన్నానం అసఞ్ఞసత్తానం తేసం తత్థ వచీసఙ్ఖారో చ న నిరుజ్ఝిస్సతి కాయసఙ్ఖారో చ నుప్పజ్జతి.

(క) యస్స యత్థ కాయసఙ్ఖారో నుప్పజ్జతి తస్స తత్థ చిత్తసఙ్ఖారో న నిరుజ్ఝిస్సతీతి?

సబ్బేసం చిత్తస్స భఙ్గక్ఖణే వినా అస్సాసపస్సాసేహి చిత్తస్స ఉప్పాదక్ఖణే తేసం తత్థ కాయసఙ్ఖారో నుప్పజ్జతి, నో చ తేసం తత్థ చిత్తసఙ్ఖారో న నిరుజ్ఝిస్సతి. పచ్ఛిమచిత్తస్స భఙ్గక్ఖణే అసఞ్ఞసత్తానం తేసం తత్థ కాయసఙ్ఖారో చ నుప్పజ్జతి చిత్తసఙ్ఖారో చ న నిరుజ్ఝిస్సతి.

(ఖ) యస్స వా పన యత్థ చిత్తసఙ్ఖారో న నిరుజ్ఝిస్సతి తస్స తత్థ కాయసఙ్ఖారో నుప్పజ్జతీతి? ఆమన్తా.

౧౫౭. (క) యస్స యత్థ వచీసఙ్ఖారో నుప్పజ్జతి తస్స తత్థ చిత్తసఙ్ఖారో న నిరుజ్ఝిస్సతీతి?

సబ్బేసం చిత్తస్స భఙ్గక్ఖణే వినా వితక్కవిచారేహి చిత్తస్స ఉప్పాదక్ఖణే తేసం తత్థ వచీసఙ్ఖారో నుప్పజ్జతి, నో చ తేసం తత్థ చిత్తసఙ్ఖారో న నిరుజ్ఝిస్సతి. పచ్ఛిమచిత్తస్స భఙ్గక్ఖణే అసఞ్ఞసత్తానం తేసం తత్థ వచీసఙ్ఖారో చ నుప్పజ్జతి చిత్తసఙ్ఖారో చ న నిరుజ్ఝిస్సతి.

(ఖ) యస్స వా పన యత్థ చిత్తసఙ్ఖారో న నిరుజ్ఝిస్సతి తస్స తత్థ వచీసఙ్ఖారో నుప్పజ్జతీతి? ఆమన్తా.