(౧) పచ్చుప్పన్నవారో

(క) అనులోమపుగ్గలో

౧౨౮. (క) యస్స కాయసఙ్ఖారో ఉప్పజ్జతి తస్స వచీసఙ్ఖారో నిరుజ్ఝతీతి? నో.

(ఖ) యస్స వా పన వచీసఙ్ఖారో నిరుజ్ఝతి తస్స కాయసఙ్ఖారో ఉప్పజ్జతీతి? నో.

(క) యస్స కాయసఙ్ఖారో ఉప్పజ్జతి తస్స చిత్తసఙ్ఖారో నిరుజ్ఝతీతి? నో.

(ఖ) యస్స వా పన చిత్తసఙ్ఖారో నిరుజ్ఝతి తస్స కాయసఙ్ఖారో ఉప్పజ్జతీతి? నో.

౧౨౯. (క) యస్స వచీసఙ్ఖారో ఉప్పజ్జతి తస్స చిత్తసఙ్ఖారో నిరుజ్ఝతీతి? నో.

(ఖ) యస్స వా పన…పే…? నో.

(ఖ) అనులోమఓకాసో

౧౩౦. యత్థ కాయసఙ్ఖారో ఉప్పజ్జతి తత్థ వచీసఙ్ఖారో నిరుజ్ఝతీతి?

దుతియజ్ఝానే తతియజ్ఝానే తత్థ…పే… (ఇతరేసం యత్థకానం సదిసం).

(గ) అనులోమపుగ్గలోకాసా

౧౩౧. యస్స యత్థ కాయసఙ్ఖారో ఉప్పజ్జతి…పే… (యస్సకమ్పి యస్సయత్థకమ్పి సదిసం).

(ఘ) పచ్చనీకపుగ్గలో

౧౩౨. (క) యస్స కాయసఙ్ఖారో నుప్పజ్జతి తస్స వచీసఙ్ఖారో న నిరుజ్ఝతీతి?

వితక్కవిచారానం భఙ్గక్ఖణే తేసం కాయసఙ్ఖారో నుప్పజ్జతి, నో చ తేసం వచీసఙ్ఖారో న నిరుజ్ఝతి. వినా అస్సాసపస్సాసేహి చిత్తస్స ఉప్పాదక్ఖణే వినా వితక్కవిచారేహి చిత్తస్స భఙ్గక్ఖణే నిరోధసమాపన్నానం అసఞ్ఞసత్తానం తేసం కాయసఙ్ఖారో చ నుప్పజ్జతి వచీసఙ్ఖారో చ న నిరుజ్ఝతి.

(ఖ) యస్స వా పన వచీసఙ్ఖారో న నిరుజ్ఝతి తస్స కాయసఙ్ఖారో నుప్పజ్జతీతి?

అస్సాసపస్సాసానం ఉప్పాదక్ఖణే తేసం వచీసఙ్ఖారో న నిరుజ్ఝతి, నో చ తేసం కాయసఙ్ఖారో నుప్పజ్జతి. వినా అస్సాసపస్సాసేహి చిత్తస్స ఉప్పాదక్ఖణే వినా వితక్కవిచారేహి చిత్తస్స భఙ్గక్ఖణే నిరోధసమాపన్నానం అసఞ్ఞసత్తానం తేసం వచీసఙ్ఖారో చ న నిరుజ్ఝతి కాయసఙ్ఖారో చ నుప్పజ్జతి.

(క) యస్స కాయసఙ్ఖారో నుప్పజ్జతి తస్స చిత్తసఙ్ఖారో నిరుజ్ఝతీతి?

సబ్బేసం చిత్తస్స భఙ్గక్ఖణే తేసం కాయసఙ్ఖారో నుప్పజ్జతి, నో చ తేసం చిత్తసఙ్ఖారో న నిరుజ్ఝతి. వినా అస్సాసపస్సాసేహి చిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం కాయసఙ్ఖారో చ నుప్పజ్జతి చిత్తసఙ్ఖారో చ న నిరుజ్ఝతి.

(ఖ) యస్స వా పన చిత్తసఙ్ఖారో న నిరుజ్ఝతి తస్స కాయసఙ్ఖారో నుప్పజ్జతీతి?

అస్సాసపస్సాసానం ఉప్పాదక్ఖణే తేసం చిత్తసఙ్ఖారో న నిరుజ్ఝతి, నో చ తేసం కాయసఙ్ఖారో నుప్పజ్జతి. వినా అస్సాసపస్సాసేహి చిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం చిత్తసఙ్ఖారో చ న నిరుజ్ఝతి కాయసఙ్ఖారో చ నుప్పజ్జతి.

౧౩౩. (క) యస్స వచీసఙ్ఖారో నుప్పజ్జతి తస్స చిత్తసఙ్ఖారో న నిరుజ్ఝతీతి?

సబ్బేసం చిత్తస్స భఙ్గక్ఖణే తేసం వచీసఙ్ఖారో నుప్పజ్జతి, నో చ తేసం చిత్తసఙ్ఖారో న నిరుజ్ఝతి. వినా వితక్కవిచారేహి చిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం వచీసఙ్ఖారో చ నుప్పజ్జతి చిత్తసఙ్ఖారో చ న నిరుజ్ఝతి.

(ఖ) యస్స వా పన చిత్తసఙ్ఖారో న నిరుజ్ఝతి తస్స వచీసఙ్ఖారో నుప్పజ్జతీతి?

వితక్కవిచారానం ఉప్పాదక్ఖణే తేసం చిత్తసఙ్ఖారో న నిరుజ్ఝతి, నో చ తేసం వచీసఙ్ఖారో నుప్పజ్జతి. వినా వితక్కవిచారేహి చిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం చిత్తసఙ్ఖారో చ న నిరుజ్ఝతి వచీసఙ్ఖారో చ నుప్పజ్జతి.

(ఙ) పచ్చనీకఓకాసో

౧౩౪. యత్థ కాయసఙ్ఖారో నుప్పజ్జతి…పే….

(చ) పచ్చనీకపుగ్గలోకాసా

౧౩౫. యస్స యత్థ కాయసఙ్ఖారో నుప్పజ్జతి…పే….

(యస్సకమ్పి యస్సయత్థకమ్పి సదిసం, యస్సయత్థకే నిరోధసమాపన్నానన్తి న లబ్భతి).