(౪) పచ్చుప్పన్నాతీతవారో
(క) అనులోమపుగ్గలో
౯౮. (క) యస్స కాయసఙ్ఖారో నిరుజ్ఝతి తస్స వచీసఙ్ఖారో నిరుజ్ఝిత్థాతి? ఆమన్తా.
(ఖ) యస్స వా పన వచీసఙ్ఖారో నిరుజ్ఝిత్థ తస్స కాయసఙ్ఖారో నిరుజ్ఝతీతి?
సబ్బేసం చిత్తస్స ఉప్పాదక్ఖణే వినా అస్సాసపస్సాసేహి చిత్తస్స భఙ్గక్ఖణే నిరోధసమాపన్నానం అసఞ్ఞసత్తానం తేసం వచీసఙ్ఖారో నిరుజ్ఝిత్థ, నో చ తేసం కాయసఙ్ఖారో నిరుజ్ఝతి. అస్సాసపస్సాసానం భఙ్గక్ఖణే తేసం వచీసఙ్ఖారో చ నిరుజ్ఝిత్థ కాయసఙ్ఖారో చ నిరుజ్ఝతి.
(క) యస్స కాయసఙ్ఖారో నిరుజ్ఝతి తస్స చిత్తసఙ్ఖారో నిరుజ్ఝిత్థాతి? ఆమన్తా.
(ఖ) యస్స వా పన చిత్తసఙ్ఖారో నిరుజ్ఝిత్థ తస్స కాయసఙ్ఖారో నిరుజ్ఝతీతి?
సబ్బేసం చిత్తస్స ఉప్పాదక్ఖణే వినా అస్సాసపస్సాసేహి చిత్తస్స భఙ్గక్ఖణే నిరోధసమాపన్నానం అసఞ్ఞసత్తానం తేసం చిత్తసఙ్ఖారో నిరుజ్ఝిత్థ, నో చ తేసం కాయసఙ్ఖారో నిరుజ్ఝతి. అస్సాసపస్సాసానం భఙ్గక్ఖణే తేసం చిత్తసఙ్ఖారో చ నిరుజ్ఝిత్థ కాయసఙ్ఖారో చ నిరుజ్ఝతి.
౯౯. (క) యస్స వచీసఙ్ఖారో నిరుజ్ఝతి తస్స చిత్తసఙ్ఖారో నిరుజ్ఝిత్థాతి? ఆమన్తా.
(ఖ) యస్స వా పన చిత్తసఙ్ఖారో నిరుజ్ఝిత్థ తస్స వచీసఙ్ఖారో నిరుజ్ఝతీతి?
సబ్బేసం చిత్తస్స ఉప్పాదక్ఖణే వినా వితక్కవిచారేహి చిత్తస్స భఙ్గక్ఖణే నిరోధసమాపన్నానం అసఞ్ఞసత్తానం తేసం చిత్తసఙ్ఖారో నిరుజ్ఝిత్థ, నో చ తేసం వచీసఙ్ఖారో నిరుజ్ఝతి. వితక్కవిచారానం భఙ్గక్ఖణే తేసం చిత్తసఙ్ఖారో చ నిరుజ్ఝిత్థ వచీసఙ్ఖారో చ నిరుజ్ఝతి.
(ఖ) అనులోమఓకాసో
౧౦౦. యత్థ కాయసఙ్ఖారో నిరుజ్ఝతి…పే….
(గ) అనులోమపుగ్గలోకాసా
౧౦౧. (క) యస్స యత్థ కాయసఙ్ఖారో నిరుజ్ఝతి తస్స తత్థ వచీసఙ్ఖారో నిరుజ్ఝిత్థాతి?
దుతియజ్ఝానం తతియజ్ఝానం సమాపన్నానం అస్సాసపస్సాసానం భఙ్గక్ఖణే తేసం తత్థ కాయసఙ్ఖారో నిరుజ్ఝతి, నో చ తేసం తత్థ వచీసఙ్ఖారో నిరుజ్ఝిత్థ. పఠమజ్ఝానం సమాపన్నానం కామావచరానం అస్సాసపస్సాసానం భఙ్గక్ఖణే తేసం తత్థ కాయసఙ్ఖారో చ నిరుజ్ఝతి వచీసఙ్ఖారో చ నిరుజ్ఝిత్థ.
(ఖ) యస్స వా పన యత్థ వచీసఙ్ఖారో నిరుజ్ఝిత్థ తస్స తత్థ కాయసఙ్ఖారో నిరుజ్ఝతీతి?
పఠమజ్ఝానం సమాపన్నానం కామావచరానం అస్సాసపస్సాసానం ఉప్పాదక్ఖణే తేసంయేవ వినా అస్సాసపస్సాసేహి చిత్తస్స భఙ్గక్ఖణే రూపావచరానం అరూపావచరానం తేసం తత్థ వచీసఙ్ఖారో నిరుజ్ఝిత్థ, నో చ తేసం తత్థ కాయసఙ్ఖారో నిరుజ్ఝతి. పఠమజ్ఝానం సమాపన్నానం కామావచరానం అస్సాసపస్సాసానం భఙ్గక్ఖణే తేసం తత్థ వచీసఙ్ఖారో చ నిరుజ్ఝిత్థ కాయసఙ్ఖారో చ నిరుజ్ఝతి.
(క) యస్స యత్థ కాయసఙ్ఖారో నిరుజ్ఝతి తస్స తత్థ చిత్తసఙ్ఖారో నిరుజ్ఝిత్థాతి? ఆమన్తా.
(ఖ) యస్స వా పన యత్థ చిత్తసఙ్ఖారో నిరుజ్ఝిత్థ తస్స తత్థ కాయసఙ్ఖారో నిరుజ్ఝతీతి?
సబ్బేసం చిత్తస్స ఉప్పాదక్ఖణే వినా అస్సాసపస్సాసేహి చిత్తస్స భఙ్గక్ఖణే తేసం తత్థ చిత్తసఙ్ఖారో నిరుజ్ఝిత్థ, నో చ తేసం తత్థ కాయసఙ్ఖారో నిరుజ్ఝతి. అస్సాసపస్సాసానం భఙ్గక్ఖణే తేసం తత్థ చిత్తసఙ్ఖారో చ నిరుజ్ఝిత్థ కాయసఙ్ఖారో చ నిరుజ్ఝతి.
౧౦౨. (క) యస్స యత్థ వచీసఙ్ఖారో నిరుజ్ఝతి తస్స తత్థ చిత్తసఙ్ఖారో నిరుజ్ఝిత్థాతి? ఆమన్తా.
(ఖ) యస్స వా పన యత్థ చిత్తసఙ్ఖారో నిరుజ్ఝిత్థ తస్స తత్థ వచీసఙ్ఖారో నిరుజ్ఝతీతి?
సబ్బేసం చిత్తస్స ఉప్పాదక్ఖణే వినా వితక్కవిచారేహి చిత్తస్స భఙ్గక్ఖణే తేసం తత్థ చిత్తసఙ్ఖారో నిరుజ్ఝిత్థ, నో చ తేసం తత్థ వచీసఙ్ఖారో నిరుజ్ఝతి. వితక్కవిచారానం భఙ్గక్ఖణే తేసం తత్థ చిత్తసఙ్ఖారో చ నిరుజ్ఝిత్థ వచీసఙ్ఖారో చ నిరుజ్ఝతి.
(ఘ) పచ్చనీకపుగ్గలో
౧౦౩. (క) యస్స కాయసఙ్ఖారో న నిరుజ్ఝతి తస్స వచీసఙ్ఖారో న నిరుజ్ఝిత్థాతి? నిరుజ్ఝిత్థ.
(ఖ) యస్స వా పన వచీసఙ్ఖారో న నిరుజ్ఝిత్థ తస్స కాయసఙ్ఖారో న నిరుజ్ఝతీతి? నత్థి.
(క) యస్స కాయసఙ్ఖారో న నిరుజ్ఝతి తస్స చిత్తసఙ్ఖారో న నిరుజ్ఝిత్థాతి? నిరుజ్ఝిత్థ.
(ఖ) యస్స వా పన చిత్తసఙ్ఖారో న నిరుజ్ఝిత్థ తస్స కాయసఙ్ఖారో న నిరుజ్ఝతీతి? నత్థి.
౧౦౪. (క) యస్స వచీసఙ్ఖారో న నిరుజ్ఝతి తస్స చిత్తసఙ్ఖారో న నిరుజ్ఝిత్థాతి? నిరుజ్ఝిత్థ.
(ఖ) యస్స వా పన చిత్తసఙ్ఖారో న నిరుజ్ఝిత్థ తస్స వచీసఙ్ఖారో న నిరుజ్ఝతీతి? నత్థి.
(ఙ) పచ్చనీకఓకాసో
౧౦౫. యత్థ కాయసఙ్ఖారో న నిరుజ్ఝతి…పే….
(చ) పచ్చనీకపుగ్గలోకాసా
౧౦౬. (క) యస్స యత్థ కాయసఙ్ఖారో న నిరుజ్ఝతి తస్స తత్థ వచీసఙ్ఖారో న నిరుజ్ఝిత్థాతి?
పఠమజ్ఝానం సమాపన్నానం కామావచరానం అస్సాసపస్సాసానం ఉప్పాదక్ఖణే తేసంయేవ వినా అస్సాసపస్సాసేహి చిత్తస్స భఙ్గక్ఖణే రూపావచరానం అరూపావచరానం తేసం తత్థ కాయసఙ్ఖారో న నిరుజ్ఝతి, నో చ తేసం తత్థ వచీసఙ్ఖారో న నిరుజ్ఝిత్థ. దుతియజ్ఝానం తతియజ్ఝానం సమాపన్నానం అస్సాసపస్సాసానం ఉప్పాదక్ఖణే తేసంయేవ వినా అస్సాసపస్సాసేహి చిత్తస్స భఙ్గక్ఖణే చతుత్థజ్ఝానం సమాపన్నానం సుద్ధావాసానం దుతియే చిత్తే వత్తమానే అసఞ్ఞసత్తానం తేసం తత్థ కాయసఙ్ఖారో చ న నిరుజ్ఝతి వచీసఙ్ఖారో చ న నిరుజ్ఝిత్థ.
(ఖ) యస్స వా పన యత్థ వచీసఙ్ఖారో న నిరుజ్ఝిత్థ తస్స తత్థ కాయసఙ్ఖారో న నిరుజ్ఝతీతి?
దుతియజ్ఝానం తతియజ్ఝానం సమాపన్నానం అస్సాసపస్సాసానం భఙ్గక్ఖణే తేసం తత్థ వచీసఙ్ఖారో న నిరుజ్ఝిత్థ, నో చ తేసం తత్థ కాయసఙ్ఖారో న నిరుజ్ఝతి. దుతియజ్ఝానం తతియజ్ఝానం సమాపన్నానం అస్సాసపస్సాసానం ఉప్పాదక్ఖణే తేసంయేవ వినా అస్సాసపస్సాసేహి చిత్తస్స భఙ్గక్ఖణే చతుత్థజ్ఝానం సమాపన్నానం సుద్ధావాసానం దుతియే చిత్తే వత్తమానే అసఞ్ఞసత్తానం తేసం తత్థ వచీసఙ్ఖారో చ న నిరుజ్ఝిత్థ కాయసఙ్ఖారో చ న నిరుజ్ఝతి.
(క) యస్స యత్థ కాయసఙ్ఖారో న నిరుజ్ఝతి తస్స తత్థ చిత్తసఙ్ఖారో న నిరుజ్ఝిత్థాతి?
సబ్బేసం చిత్తస్స ఉప్పాదక్ఖణే వినా అస్సాసపస్సాసేహి చిత్తస్స భఙ్గక్ఖణే తేసం తత్థ కాయసఙ్ఖారో న నిరుజ్ఝతి, నో చ తేసం తత్థ చిత్తసఙ్ఖారో న నిరుజ్ఝిత్థ. సుద్ధావాసం ఉపపజ్జన్తానం అసఞ్ఞసత్తానం తేసం తత్థ కాయసఙ్ఖారో చ న నిరుజ్ఝతి చిత్తసఙ్ఖారో చ న నిరుజ్ఝిత్థ.
(ఖ) యస్స వా పన యత్థ చిత్తసఙ్ఖారో న నిరుజ్ఝిత్థ తస్స తత్థ కాయసఙ్ఖారో న నిరుజ్ఝతీతి? ఆమన్తా.
౧౦౭. (క) యస్స యత్థ వచీసఙ్ఖారో న నిరుజ్ఝతి తస్స తత్థ చిత్తసఙ్ఖారో న నిరుజ్ఝిత్థాతి?
సబ్బేసం చిత్తస్స ఉప్పాదక్ఖణే వినా వితక్కవిచారేహి చిత్తస్స భఙ్గక్ఖణే తేసం తత్థ వచీసఙ్ఖారో న నిరుజ్ఝతి, నో చ తేసం తత్థ చిత్తసఙ్ఖారో న నిరుజ్ఝిత్థ. సుద్ధావాసం ఉపపజ్జన్తానం అసఞ్ఞసత్తానం తేసం తత్థ వచీసఙ్ఖారో చ న నిరుజ్ఝతి చిత్తసఙ్ఖారో చ న నిరుజ్ఝిత్థ.
(ఖ) యస్స వా పన యత్థ చిత్తసఙ్ఖారో న నిరుజ్ఝిత్థ తస్స తత్థ వచీసఙ్ఖారో న నిరుజ్ఝతీతి? ఆమన్తా.