(౧) పచ్చుప్పన్నవారో

(క) అనులోమపుగ్గలో

౭౯. (క) యస్స కాయసఙ్ఖారో నిరుజ్ఝతి తస్స వచీసఙ్ఖారో నిరుజ్ఝతీతి?

వినా వితక్కవిచారేహి అస్సాసపస్సాసానం భఙ్గక్ఖణే తేసం కాయసఙ్ఖారో నిరుజ్ఝతి, నో చ తేసం వచీసఙ్ఖారో నిరుజ్ఝతి. పఠమజ్ఝానం సమాపన్నానం కామావచరానం అస్సాసపస్సాసానం భఙ్గక్ఖణే తేసం కాయసఙ్ఖారో చ నిరుజ్ఝతి వచీసఙ్ఖారో చ నిరుజ్ఝతి.

(ఖ) యస్స వా పన వచీసఙ్ఖారో నిరుజ్ఝతి తస్స కాయసఙ్ఖారో నిరుజ్ఝతీతి?

వినా అస్సాసపస్సాసేహి వితక్కవిచారానం భఙ్గక్ఖణే తేసం వచీసఙ్ఖారో నిరుజ్ఝతి, నో చ తేసం కాయసఙ్ఖారో నిరుజ్ఝతి. పఠమజ్ఝానం సమాపన్నానం కామావచరానం అస్సాసపస్సాసానం భఙ్గక్ఖణే తేసం వచీసఙ్ఖారో చ నిరుజ్ఝతి కాయసఙ్ఖారో చ నిరుజ్ఝతి.

(క) యస్స కాయసఙ్ఖారో నిరుజ్ఝతి తస్స చిత్తసఙ్ఖారో నిరుజ్ఝతీతి? ఆమన్తా.

(ఖ) యస్స వా పన చిత్తసఙ్ఖారో నిరుజ్ఝతి తస్స కాయసఙ్ఖారో నిరుజ్ఝతీతి?

వినా అస్సాసపస్సాసేహి చిత్తస్స భఙ్గక్ఖణే తేసం చిత్తసఙ్ఖారో నిరుజ్ఝతి, నో చ తేసం కాయసఙ్ఖారో నిరుజ్ఝతి. అస్సాసపస్సాసానం భఙ్గక్ఖణే తేసం చిత్తసఙ్ఖారో చ నిరుజ్ఝతి కాయసఙ్ఖారో చ నిరుజ్ఝతి.

౮౦. (క) యస్స వచీసఙ్ఖారో నిరుజ్ఝతి తస్స చిత్తసఙ్ఖారో నిరుజ్ఝతీతి? ఆమన్తా.

(ఖ) యస్స వా పన చిత్తసఙ్ఖారో నిరుజ్ఝతి తస్స వచీసఙ్ఖారో నిరుజ్ఝతీతి?

వినా వితక్కవిచారేహి చిత్తస్స భఙ్గక్ఖణే తేసం చిత్తసఙ్ఖారో నిరుజ్ఝతి, నో చ తేసం వచీసఙ్ఖారో నిరుజ్ఝతి. వితక్కవిచారానం భఙ్గక్ఖణే తేసం చిత్తసఙ్ఖారో చ నిరుజ్ఝతి వచీసఙ్ఖారో చ నిరుజ్ఝతి.

(ఖ) అనులోమఓకాసో

౮౧. యత్థ కాయసఙ్ఖారో నిరుజ్ఝతి తత్థ వచీసఙ్ఖారో నిరుజ్ఝతీతి?…పే….

(గ) అనులోమపుగ్గలోకాసా

౮౨. యస్స యత్థ కాయసఙ్ఖారో నిరుజ్ఝతి తస్స తత్థ వచీసఙ్ఖారో నిరుజ్ఝతీతి?…పే…. (యస్సకమ్పి యస్సయత్థకమ్పి సదిసం.)

(ఘ) పచ్చనీకపుగ్గలో

౮౩. (క) యస్స కాయసఙ్ఖారో న నిరుజ్ఝతి తస్స వచీసఙ్ఖారో న నిరుజ్ఝతీతి?

వినా అస్సాసపస్సాసేహి వితక్కవిచారానం భఙ్గక్ఖణే తేసం కాయసఙ్ఖారో న నిరుజ్ఝతి, నో చ తేసం వచీసఙ్ఖారో న నిరుజ్ఝతి. సబ్బేసం చిత్తస్స ఉప్పాదక్ఖణే వినా అస్సాసపస్సాసేహి అవితక్కఅవిచారచిత్తస్స భఙ్గక్ఖణే నిరోధసమాపన్నానం అసఞ్ఞసత్తానం తేసం కాయసఙ్ఖారో చ న నిరుజ్ఝతి వచీసఙ్ఖారో చ న నిరుజ్ఝతి.

(ఖ) యస్స వా పన వచీసఙ్ఖారో న నిరుజ్ఝతి తస్స కాయసఙ్ఖారో న నిరుజ్ఝతీతి?

వినా వితక్కవిచారేహి అస్సాసపస్సాసానం భఙ్గక్ఖణే తేసం వచీసఙ్ఖారో న నిరుజ్ఝతి, నో చ తేసం కాయసఙ్ఖారో న నిరుజ్ఝతి. సబ్బేసం చిత్తస్స ఉప్పాదక్ఖణే వినా అస్సాసపస్సాసేహి అవితక్కఅవిచారచిత్తస్స భఙ్గక్ఖణే నిరోధసమాపన్నానం అసఞ్ఞసత్తానం తేసం వచీసఙ్ఖారో చ న నిరుజ్ఝతి కాయసఙ్ఖారో చ న నిరుజ్ఝతి.

(క) యస్స కాయసఙ్ఖారో న నిరుజ్ఝతి తస్స చిత్తసఙ్ఖారో న నిరుజ్ఝతీతి?

వినా అస్సాసపస్సాసేహి చిత్తస్స భఙ్గక్ఖణే తేసం కాయసఙ్ఖారో న నిరుజ్ఝతి, నో చ తేసం చిత్తసఙ్ఖారో న నిరుజ్ఝతి. సబ్బేసం చిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం కాయసఙ్ఖారో చ న నిరుజ్ఝతి చిత్తసఙ్ఖారో చ న నిరుజ్ఝతి.

(ఖ) యస్స వా పన…పే…? ఆమన్తా.

౮౪. (క) యస్స వచీసఙ్ఖారో న నిరుజ్ఝతి తస్స చిత్తసఙ్ఖారో న నిరుజ్ఝతీతి?

వినా వితక్కవిచారేహి చిత్తస్స భఙ్గక్ఖణే తేసం వచీసఙ్ఖారో న నిరుజ్ఝతి, నో చ తేసం చిత్తసఙ్ఖారో న నిరుజ్ఝతి. సబ్బేసం చిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం వచీసఙ్ఖారో చ న నిరుజ్ఝతి చిత్తసఙ్ఖారో చ న నిరుజ్ఝతి.

(ఖ) యస్స వా పన…పే…? ఆమన్తా.

(ఙ) పచ్చనీకఓకాసా

౮౫. యత్థ కాయసఙ్ఖారో న నిరుజ్ఝతి…పే….

(చ) పచ్చనీకపుగ్గలోకాసా

౮౬. యస్స యత్థ కాయసఙ్ఖారో న నిరుజ్ఝతి తస్స తత్థ వచీసఙ్ఖారో న నిరుజ్ఝతీతి?

వినా అస్సాసపస్సాసేహి వితక్కవిచారానం భఙ్గక్ఖణే తేసం తత్థ కాయసఙ్ఖారో న నిరుజ్ఝతి, నో చ తేసం తత్థ వచీసఙ్ఖారో న నిరుజ్ఝతి. సబ్బేసం చిత్తస్స ఉప్పాదక్ఖణే వినా అస్సాసపస్సాసేహి అవితక్కఅవిచారచిత్తస్స భఙ్గక్ఖణే అసఞ్ఞసత్తానం తేసం తత్థ కాయసఙ్ఖారో చ న నిరుజ్ఝతి వచీసఙ్ఖారో చ న నిరుజ్ఝతి.

యస్స వా పన యత్థ వచీసఙ్ఖారో న నిరుజ్ఝతి…పే….

(యస్సకమ్పి యస్సయత్థకమ్పి సదిసం విత్థారేతబ్బం, యస్సయత్థకే నిరోధసమాపన్నానన్తి న కాతబ్బం.)