(౩) అనాగతవారో
(క) అనులోమపుగ్గలో
౩౯. (క) యస్స కాయసఙ్ఖారో ఉప్పజ్జిస్సతి తస్స వచీసఙ్ఖారో ఉప్పజ్జిస్సతీతి? ఆమన్తా.
(ఖ) యస్స వా పన వచీసఙ్ఖారో ఉప్పజ్జిస్సతి తస్స కాయసఙ్ఖారో ఉప్పజ్జిస్సతీతి?
యస్స చిత్తస్స అనన్తరా కామావచరానం పచ్ఛిమచిత్తం ఉప్పజ్జిస్సతి రూపావచరే అరూపావచరే పచ్ఛిమభవికానం యే చ రూపావచరం అరూపావచరం ఉపపజ్జిత్వా పరినిబ్బాయిస్సన్తి తేసం చవన్తానం తేసం వచీసఙ్ఖారో ఉప్పజ్జిస్సతి, నో చ తేసం కాయసఙ్ఖారో ఉప్పజ్జిస్సతి. ఇతరేసం తేసం వచీసఙ్ఖారో చ ఉప్పజ్జిస్సతి కాయసఙ్ఖారో చ ఉప్పజ్జిస్సతి.
(క) యస్స కాయసఙ్ఖారో ఉప్పజ్జిస్సతి తస్స చిత్తసఙ్ఖారో ఉప్పజ్జిస్సతీతి? ఆమన్తా.
(ఖ) యస్స వా పన చిత్తసఙ్ఖారో ఉప్పజ్జిస్సతి తస్స కాయసఙ్ఖారో ఉప్పజ్జిస్సతీతి?
యస్స చిత్తస్స అనన్తరా కామావచరానం పచ్ఛిమచిత్తం ఉప్పజ్జిస్సతి రూపావచరే అరూపావచరే పచ్ఛిమభవికానం యే చ రూపావచరం అరూపావచరం ఉపపజ్జిత్వా పరినిబ్బాయిస్సన్తి తేసం చవన్తానం తేసం చిత్తసఙ్ఖారో ఉప్పజ్జిస్సతి, నో చ తేసం కాయసఙ్ఖారో ఉప్పజ్జిస్సతి. ఇతరేసం తేసం చిత్తసఙ్ఖారో చ ఉప్పజ్జిస్సతి కాయసఙ్ఖారో చ ఉప్పజ్జిస్సతి.
౪౦. (క) యస్స వచీసఙ్ఖారో ఉప్పజ్జిస్సతి తస్స చిత్తసఙ్ఖారో ఉప్పజ్జిస్సతీతి? ఆమన్తా.
(ఖ) యస్స వా పన చిత్తసఙ్ఖారో ఉప్పజ్జిస్సతి తస్స వచీసఙ్ఖారో ఉప్పజ్జిస్సతీతి?
యస్స చిత్తస్స అనన్తరా అవితక్కఅవిచారం పచ్ఛిమచిత్తం ఉప్పజ్జిస్సతి తేసం చిత్తసఙ్ఖారో ఉప్పజ్జిస్సతి, నో చ తేసం వచీసఙ్ఖారో ఉప్పజ్జిస్సతి. ఇతరేసం తేసం చిత్తసఙ్ఖారో చ ఉప్పజ్జిస్సతి వచీసఙ్ఖారో చ ఉప్పజ్జిస్సతి.
(ఖ) అనులోమఓకాసో
౪౧. యత్థ కాయసఙ్ఖారో ఉప్పజ్జిస్సతి…పే….
(గ) అనులోమపుగ్గలోకాసా
౪౨. (క) యస్స యత్థ కాయసఙ్ఖారో ఉప్పజ్జిస్సతి తస్స తత్థ వచీసఙ్ఖారో ఉప్పజ్జిస్సతీతి?
దుతియజ్ఝానం తతియజ్ఝానం సమాపన్నానం తేసం తత్థ కాయసఙ్ఖారో ఉప్పజ్జిస్సతి, నో చ తేసం తత్థ వచీసఙ్ఖారో ఉప్పజ్జిస్సతి. పఠమజ్ఝానం సమాపన్నానం కామావచరానం తేసం తత్థ కాయసఙ్ఖారో చ ఉప్పజ్జిస్సతి వచీసఙ్ఖారో చ ఉప్పజ్జిస్సతి.
(ఖ) యస్స వా పన యత్థ వచీసఙ్ఖారో ఉప్పజ్జిస్సతి తస్స తత్థ కాయసఙ్ఖారో ఉప్పజ్జిస్సతీతి?
యస్స చిత్తస్స అనన్తరా కామావచరానం పచ్ఛిమచిత్తం ఉప్పజ్జిస్సతి రూపావచరానం అరూపావచరానం తేసం తత్థ వచీసఙ్ఖారో ఉప్పజ్జిస్సతి, నో చ తేసం తత్థ కాయసఙ్ఖారో ఉప్పజ్జిస్సతి. పఠమజ్ఝానం సమాపన్నానం ఇతరేసం కామావచరానం తేసం తత్థ వచీసఙ్ఖారో చ ఉప్పజ్జిస్సతి కాయసఙ్ఖారో చ ఉప్పజ్జిస్సతి.
(క) యస్స యత్థ కాయసఙ్ఖారో ఉప్పజ్జిస్సతి తస్స తత్థ చిత్తసఙ్ఖారో ఉప్పజ్జిస్సతీతి? ఆమన్తా.
(ఖ) యస్స వా పన యత్థ చిత్తసఙ్ఖారో ఉప్పజ్జిస్సతి తస్స తత్థ కాయసఙ్ఖారో ఉప్పజ్జిస్సతీతి?
యస్స చిత్తస్స అనన్తరా కామావచరానం పచ్ఛిమచిత్తం ఉప్పజ్జిస్సతి చతుత్థజ్ఝానం సమాపన్నానం రూపావచరానం అరూపావచరానం తేసం తత్థ చిత్తసఙ్ఖారో ఉప్పజ్జిస్సతి, నో చ తేసం తత్థ కాయసఙ్ఖారో ఉప్పజ్జిస్సతి. పఠమజ్ఝానం దుతియజ్ఝానం తతియజ్ఝానం సమాపన్నానం ఇతరేసం కామావచరానం తేసం తత్థ చిత్తసఙ్ఖారో చ ఉప్పజ్జిస్సతి కాయసఙ్ఖారో చ ఉప్పజ్జిస్సతి.
౪౩. (క) యస్స యత్థ వచీసఙ్ఖారో ఉప్పజ్జిస్సతి తస్స తత్థ చిత్తసఙ్ఖారో ఉప్పజ్జిస్సతీతి? ఆమన్తా.
(ఖ) యస్స వా పన యత్థ చిత్తసఙ్ఖారో ఉప్పజ్జిస్సతి తస్స తత్థ వచీసఙ్ఖారో ఉప్పజ్జిస్సతీతి?
యస్స చిత్తస్స అనన్తరా అవితక్కఅవిచారం పచ్ఛిమచిత్తం ఉప్పజ్జిస్సతి దుతియజ్ఝానం తతియజ్ఝానం చతుత్థజ్ఝానం సమాపన్నానం తేసం తత్థ చిత్తసఙ్ఖారో ఉప్పజ్జిస్సతి, నో చ తేసం తత్థ వచీసఙ్ఖారో ఉప్పజ్జిస్సతి. పఠమజ్ఝానం సమాపన్నానం కామావచరానం ఇతరేసం రూపావచరానం అరూపావచరానం తేసం తత్థ చిత్తసఙ్ఖారో చ ఉప్పజ్జిస్సతి వచీసఙ్ఖారో చ ఉప్పజ్జిస్సతి.
(ఘ) పచ్చనీకపుగ్గలో
౪౪. (క) యస్స కాయసఙ్ఖారో నుప్పజ్జిస్సతి తస్స వచీసఙ్ఖారో నుప్పజ్జిస్సతీతి?
యస్స చిత్తస్స అనన్తరా కామావచరానం పచ్ఛిమచిత్తం ఉప్పజ్జిస్సతి రూపావచరే అరూపావచరే పచ్ఛిమభవికానం యే చ రూపావచరం అరూపావచరం ఉపపజ్జిత్వా పరినిబ్బాయిస్సన్తి తేసం చవన్తానం తేసం కాయసఙ్ఖారో నుప్పజ్జిస్సతి, నో చ తేసం వచీసఙ్ఖారో నుప్పజ్జిస్సతి. పచ్ఛిమచిత్తసమఙ్గీనం యస్స చిత్తస్స అనన్తరా అవితక్కఅవిచారం పచ్ఛిమచిత్తం ఉప్పజ్జిస్సతి తేసం కాయసఙ్ఖారో చ నుప్పజ్జిస్సతి వచీసఙ్ఖారో చ నుప్పజ్జిస్సతి.
(ఖ) యస్స వా పన…పే…? ఆమన్తా.
(క) యస్స కాయసఙ్ఖారో నుప్పజ్జిస్సతి తస్స చిత్తసఙ్ఖారో నుప్పజ్జిస్సతీతి?
యస్స చిత్తస్స అనన్తరా కామావచరానం పచ్ఛిమచిత్తం ఉప్పజ్జిస్సతి రూపావచరే అరూపావచరే పచ్ఛిమభవికానం యే చ రూపావచరం అరూపావచరం ఉపపజ్జిత్వా పరినిబ్బాయిస్సన్తి తేసం చవన్తానం తేసం కాయసఙ్ఖారో నుప్పజ్జిస్సతి, నో చ తేసం చిత్తసఙ్ఖారో నుప్పజ్జిస్సతి. పచ్ఛిమచిత్తసమఙ్గీనం తేసం కాయసఙ్ఖారో చ నుప్పజ్జిస్సతి చిత్తసఙ్ఖారో చ నుప్పజ్జిస్సతి.
(ఖ) యస్స వా పన చిత్తసఙ్ఖారో…పే…? ఆమన్తా.
౪౫. (క) యస్స వచీసఙ్ఖారో నుప్పజ్జిస్సతి తస్స చిత్తసఙ్ఖారో నుప్పజ్జిస్సతీతి?
యస్స చిత్తస్స అనన్తరా అవితక్కఅవిచారం పచ్ఛిమచిత్తం ఉప్పజ్జిస్సతి తేసం వచీసఙ్ఖారో నుప్పజ్జిస్సతి, నో చ తేసం చిత్తసఙ్ఖారో నుప్పజ్జిస్సతి. పచ్ఛిమచిత్తసమఙ్గీనం తేసం వచీసఙ్ఖారో చ నుప్పజ్జిస్సతి చిత్తసఙ్ఖారో చ నుప్పజ్జిస్సతి.
(ఖ) యస్స వా పన…పే…? ఆమన్తా.
(ఙ) పచ్చనీకఓకాసో
౪౬. యత్థ కాయసఙ్ఖారో నుప్పజ్జిస్సతి…పే….
(చ) పచ్చనీకపుగ్గలోకాసా
౪౭. (క) యస్స యత్థ కాయసఙ్ఖారో నుప్పజ్జిస్సతి తస్స తత్థ వచీసఙ్ఖారో నుప్పజ్జిస్సతీతి?
యస్స చిత్తస్స అనన్తరా కామావచరానం పచ్ఛిమచిత్తం ఉప్పజ్జిస్సతి రూపావచరానం అరూపావచరానం తేసం తత్థ కాయసఙ్ఖారో నుప్పజ్జిస్సతి, నో చ తేసం తత్థ వచీసఙ్ఖారో నుప్పజ్జిస్సతి. పచ్ఛిమచిత్తసమఙ్గీనం యస్స చిత్తస్స అనన్తరా అవితక్కఅవిచారం పచ్ఛిమచిత్తం ఉప్పజ్జిస్సతి చతుత్థజ్ఝానం సమాపన్నానం అసఞ్ఞసత్తానం తేసం తత్థ కాయసఙ్ఖారో చ నుప్పజ్జిస్సతి వచీసఙ్ఖారో చ నుప్పజ్జిస్సతి.
(ఖ) యస్స వా పన యత్థ వచీసఙ్ఖారో నుప్పజ్జిస్సతి తస్స తత్థ కాయసఙ్ఖారో నుప్పజ్జిస్సతీతి?
దుతియజ్ఝానం తతియజ్ఝానం సమాపన్నానం తేసం తత్థ వచీసఙ్ఖారో నుప్పజ్జిస్సతి, నో చ తేసం తత్థ కాయసఙ్ఖారో నుప్పజ్జిస్సతి. పచ్ఛిమచిత్తసమఙ్గీనం యస్స చిత్తస్స అనన్తరా అవితక్కఅవిచారం పచ్ఛిమచిత్తం ఉప్పజ్జిస్సతి చతుత్థజ్ఝానం సమాపన్నానం అసఞ్ఞసత్తానం తేసం తత్థ వచీసఙ్ఖారో చ నుప్పజ్జిస్సతి కాయసఙ్ఖారో చ నుప్పజ్జిస్సతి.
(క) యస్స యత్థ కాయసఙ్ఖారో నుప్పజ్జిస్సతి తస్స తత్థ చిత్తసఙ్ఖారో నుప్పజ్జిస్సతీతి?
యస్స చిత్తస్స అనన్తరా కామావచరానం పచ్ఛిమచిత్తం ఉప్పజ్జిస్సతి చతుత్థజ్ఝానం సమాపన్నానం రూపావచరానం అరూపావచరానం తేసం తత్థ కాయసఙ్ఖారో నుప్పజ్జిస్సతి, నో చ తేసం తత్థ చిత్తసఙ్ఖారో నుప్పజ్జిస్సతి. పచ్ఛిమచిత్తసమఙ్గీనం అసఞ్ఞసత్తానం తేసం తత్థ కాయసఙ్ఖారో చ నుప్పజ్జిస్సతి చిత్తసఙ్ఖారో చ నుప్పజ్జిస్సతి.
(ఖ) యస్స వా పన యత్థ…పే…? ఆమన్తా.
౪౮. (క) యస్స యత్థ వచీసఙ్ఖారో నుప్పజ్జిస్సతి తస్స తత్థ చిత్తసఙ్ఖారో నుప్పజ్జిస్సతీతి?
యస్స చిత్తస్స అనన్తరా అవితక్కఅవిచారం పచ్ఛిమచిత్తం ఉప్పజ్జిస్సతి దుతియజ్ఝానం తతియజ్ఝానం చతుత్థజ్ఝానం సమాపన్నానం తేసం తత్థ వచీసఙ్ఖారో నుప్పజ్జిస్సతి, నో చ తేసం తత్థ చిత్తసఙ్ఖారో నుప్పజ్జిస్సతి. పచ్ఛిమచిత్తసమఙ్గీనం అసఞ్ఞసత్తానం తేసం తత్థ వచీసఙ్ఖారో చ నుప్పజ్జిస్సతి చిత్తసఙ్ఖారో చ నుప్పజ్జిస్సతి.
(ఖ) యస్స వా పన యత్థ…పే…? ఆమన్తా.