(౩) అనాగతవారో

(క) అనులోమపుగ్గలో

౧౪౫. (క) యస్స దుక్ఖసచ్చం ఉప్పజ్జిస్సతి తస్స సముదయసచ్చం నిరుజ్ఝిస్సతీతి?

అగ్గమగ్గసమఙ్గీనం అరహన్తానం యస్స చిత్తస్స అనన్తరా అగ్గమగ్గం పటిలభిస్సన్తి తేసం దుక్ఖసచ్చం ఉప్పజ్జిస్సతి, నో చ తేసం సముదయసచ్చం నిరుజ్ఝిస్సతి. ఇతరేసం తేసం దుక్ఖసచ్చఞ్చ ఉప్పజ్జిస్సతి సముదయసచ్చఞ్చ నిరుజ్ఝిస్సతి.

(ఖ) యస్స వా పన…పే…? ఆమన్తా.

(క) యస్స దుక్ఖసచ్చం ఉప్పజ్జిస్సతి తస్స మగ్గసచ్చం నిరుజ్ఝిస్సతీతి?

అగ్గమగ్గస్స భఙ్గక్ఖణే అరహన్తానం యే చ పుథుజ్జనా మగ్గం న పటిలభిస్సన్తి తేసం దుక్ఖసచ్చం ఉప్పజ్జిస్సతి, నో చ తేసం మగ్గసచ్చం నిరుజ్ఝిస్సతి. అగ్గమగ్గస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం దుక్ఖసచ్చఞ్చ ఉప్పజ్జిస్సతి మగ్గసచ్చఞ్చ నిరుజ్ఝిస్సతి.

(ఖ) యస్స వా పన…పే…? ఆమన్తా.

౧౪౬. (క) యస్స సముదయసచ్చం ఉప్పజ్జిస్సతి తస్స మగ్గసచ్చం నిరుజ్ఝిస్సతీతి?

యే పుథుజ్జనా మగ్గం న పటిలభిస్సన్తి తేసం సముదయసచ్చం ఉప్పజ్జిస్సతి, నో చ తేసం మగ్గసచ్చం నిరుజ్ఝిస్సతి. యే మగ్గం పటిలభిస్సన్తి తేసం సముదయసచ్చఞ్చ ఉప్పజ్జిస్సతి మగ్గసచ్చఞ్చ నిరుజ్ఝిస్సతి.

(ఖ) యస్స వా పన మగ్గసచ్చం నిరుజ్ఝిస్సతి తస్స సముదయసచ్చం ఉప్పజ్జిస్సతీతి?

అగ్గమగ్గస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి తేసం మగ్గసచ్చం నిరుజ్ఝిస్సతి, నో చ తేసం సముదయసచ్చం ఉప్పజ్జిస్సతి. యే మగ్గం పటిలభిస్సన్తి తేసం మగ్గసచ్చఞ్చ నిరుజ్ఝిస్సతి సముదయసచ్చఞ్చ ఉప్పజ్జిస్సతి.

(ఖ) అనులోమఓకాసో

౧౪౭. యత్థ దుక్ఖసచ్చం ఉప్పజ్జిస్సతి…పే….

(గ) అనులోమపుగ్గలోకాసా

౧౪౮. యస్స యత్థ దుక్ఖసచ్చం ఉప్పజ్జిస్సతి తస్స తత్థ సముదయసచ్చం నిరుజ్ఝిస్సతీతి?

అగ్గమగ్గసమఙ్గీనం అరహన్తానం యస్స చిత్తస్స అనన్తరా అగ్గమగ్గం పటిలభిస్సన్తి అసఞ్ఞసత్తానం తేసం తత్థ …పే… ఇతరేసం చతువోకారానం పఞ్చవోకారానం తేసం తత్థ…పే…. (యస్సకమ్పి యస్సయత్థకమ్పి సదిసం).

(ఘ) పచ్చనీకపుగ్గలో

౧౪౯. (క) యస్స దుక్ఖసచ్చం నుప్పజ్జిస్సతి తస్స సముదయసచ్చం న నిరుజ్ఝిస్సతీతి? ఆమన్తా.

(ఖ) యస్స వా పన సముదయసచ్చం న నిరుజ్ఝిస్సతి తస్స దుక్ఖసచ్చం నుప్పజ్జిస్సతీతి?

అగ్గమగ్గసమఙ్గీనం అరహన్తానం యస్స చిత్తస్స అనన్తరా అగ్గమగ్గం పటిలభిస్సన్తి తేసం సముదయసచ్చం న నిరుజ్ఝిస్సతి, నో చ తేసం దుక్ఖసచ్చం నుప్పజ్జిస్సతి. పచ్ఛిమచిత్తసమఙ్గీనం తేసం సముదయసచ్చఞ్చ న నిరుజ్ఝిస్సతి దుక్ఖసచ్చఞ్చ నుప్పజ్జిస్సతి.

(క) యస్స దుక్ఖసచ్చం నుప్పజ్జిస్సతి తస్స మగ్గసచ్చం న నిరుజ్ఝిస్సతీతి? ఆమన్తా.

(ఖ) యస్స వా పన మగ్గసచ్చం న నిరుజ్ఝిస్సతి తస్స దుక్ఖసచ్చం నుప్పజ్జిస్సతీతి?

అగ్గమగ్గస్స భఙ్గక్ఖణే అరహన్తానం యే చ పుథుజ్జనా మగ్గం న పటిలభిస్సన్తి తేసం మగ్గసచ్చం న నిరుజ్ఝిస్సతి, నో చ తేసం దుక్ఖసచ్చం నుప్పజ్జిస్సతి. పచ్ఛిమచిత్తసమఙ్గీనం తేసం మగ్గసచ్చఞ్చ న నిరుజ్ఝిస్సతి దుక్ఖసచ్చఞ్చ నుప్పజ్జిస్సతి.

౧౫౦. (క) యస్స సముదయసచ్చం నుప్పజ్జిస్సతి తస్స మగ్గసచ్చం న నిరుజ్ఝిస్సతీతి?

అగ్గమగ్గస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి తేసం సముదయసచ్చం నుప్పజ్జిస్సతి, నో చ తేసం మగ్గసచ్చం న నిరుజ్ఝిస్సతి. అగ్గమగ్గస్స భఙ్గక్ఖణే అరహన్తానం తేసం సముదయసచ్చఞ్చ నుప్పజ్జిస్సతి మగ్గసచ్చఞ్చ న నిరుజ్ఝిస్సతి.

(ఖ) యస్స వా పన మగ్గసచ్చం న నిరుజ్ఝిస్సతి తస్స సముదయసచ్చం నుప్పజ్జిస్సతీతి?

యే పుథుజ్జనా మగ్గం న పటిలభిస్సన్తి తేసం మగ్గసచ్చం న నిరుజ్ఝిస్సతి, నో చ తేసం సముదయసచ్చం నుప్పజ్జిస్సతి. అగ్గమగ్గస్స భఙ్గక్ఖణే అరహన్తానం తేసం మగ్గసచ్చఞ్చ న నిరుజ్ఝిస్సతి సముదయసచ్చఞ్చ నుప్పజ్జిస్సతి.

(ఙ) పచ్చనీకఓకాసో

౧౫౧. యత్థ దుక్ఖసచ్చం నుప్పజ్జిస్సతి…పే….

(చ) పచ్చనీకపుగ్గలోకాసా

౧౫౨. యస్స యత్థ దుక్ఖసచ్చం నుప్పజ్జిస్సతి…పే….

(యస్సకమ్పి యస్సయత్థకమ్పి సదిసం, సముదయసచ్చం మగ్గసచ్చం నానాకరణం, అగ్గమగ్గస్స భఙ్గక్ఖణే, అరహన్తానం అసఞ్ఞసత్తానం తేసం తత్థ మగ్గసచ్చఞ్చ న నిరుజ్ఝిస్సతి సముదయసచ్చఞ్చ నుప్పజ్జిస్సతి).