(౬) అతీతానాగతవారో
(క) అనులోమపుగ్గలో
౧౨౬. (క) యస్స దుక్ఖసచ్చం నిరుజ్ఝిత్థ తస్స సముదయసచ్చం నిరుజ్ఝిస్సతీతి?
అగ్గమగ్గసమఙ్గీనం అరహన్తానం యస్స చిత్తస్స అనన్తరా అగ్గమగ్గం పటిలభిస్సన్తి తేసం దుక్ఖసచ్చం నిరుజ్ఝిత్థ, నో చ తేసం సముదయసచ్చం నిరుజ్ఝిస్సతి. ఇతరేసం తేసం దుక్ఖసచ్చఞ్చ నిరుజ్ఝిత్థ సముదయసచ్చఞ్చ నిరుజ్ఝిస్సతి.
(ఖ) యస్స వా పన…పే…? ఆమన్తా.
(క) యస్స దుక్ఖసచ్చం నిరుజ్ఝిత్థ తస్స మగ్గసచ్చం నిరుజ్ఝిస్సతీతి?
అగ్గమగ్గస్స భఙ్గక్ఖణే అరహన్తానం యే చ పుథుజ్జనా మగ్గం న పటిలభిస్సన్తి తేసం దుక్ఖసచ్చం నిరుజ్ఝిత్థ, నో చ తేసం మగ్గసచ్చం నిరుజ్ఝిస్సతి. అగ్గమగ్గస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం దుక్ఖసచ్చఞ్చ నిరుజ్ఝిత్థ మగ్గసచ్చఞ్చ నిరుజ్ఝిస్సతి.
(ఖ) యస్స వా పన…పే…? ఆమన్తా.
౧౨౭. (క) యస్స సముదయసచ్చం నిరుజ్ఝిత్థ తస్స మగ్గసచ్చం నిరుజ్ఝిస్సతీతి?
అగ్గమగ్గస్స భఙ్గక్ఖణే అరహన్తానం యే చ పుథుజ్జనా మగ్గం న పటిలభిస్సన్తి తేసం సముదయసచ్చం నిరుజ్ఝిత్థ, నో చ తేసం మగ్గసచ్చం నిరుజ్ఝిస్సతి. అగ్గమగ్గస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం సముదయసచ్చఞ్చ నిరుజ్ఝిత్థ మగ్గసచ్చఞ్చ నిరుజ్ఝిస్సతి.
(ఖ) యస్స వా పన…పే…? ఆమన్తా.
(ఖ) అనులోమఓకాసో
౧౨౮. యత్థ దుక్ఖసచ్చం నిరుజ్ఝిత్థ…పే….
(గ) అనులోమపుగ్గలోకాసా
౧౨౯. (క) యస్స యత్థ దుక్ఖసచ్చం నిరుజ్ఝిత్థ తస్స తత్థ సముదయసచ్చం నిరుజ్ఝిస్సతీతి?
అగ్గమగ్గసమఙ్గీనం అరహన్తానం యస్స చిత్తస్స అనన్తరా అగ్గమగ్గం పటిలభిస్సన్తి అసఞ్ఞసత్తానం తేసం తత్థ దుక్ఖసచ్చం నిరుజ్ఝిత్థ, నో చ తేసం తత్థ సముదయసచ్చం నిరుజ్ఝిస్సతి. ఇతరేసం చతువోకారానం పఞ్చవోకారానం తేసం తత్థ దుక్ఖసచ్చఞ్చ నిరుజ్ఝిత్థ సముదయసచ్చఞ్చ నిరుజ్ఝిస్సతి.
(ఖ) యస్స వా పన యత్థ సముదయసచ్చం నిరుజ్ఝిస్సతి తస్స తత్థ దుక్ఖసచ్చం నిరుజ్ఝిత్థాతి?
సుద్ధావాసం ఉపపజ్జన్తానం తేసం తత్థ సముదయసచ్చం నిరుజ్ఝిస్సతి, నో చ తేసం తత్థ దుక్ఖసచ్చం నిరుజ్ఝిత్థ. ఇతరేసం చతువోకారానం పఞ్చవోకారానం తేసం తత్థ సముదయసచ్చఞ్చ నిరుజ్ఝిస్సతి దుక్ఖసచ్చఞ్చ నిరుజ్ఝిత్థ.
(క) యస్స యత్థ దుక్ఖసచ్చం నిరుజ్ఝిత్థ తస్స తత్థ మగ్గసచ్చం నిరుజ్ఝిస్సతీతి?
అగ్గమగ్గస్స భఙ్గక్ఖణే అరహన్తానం యే చ పుథుజ్జనా మగ్గం న పటిలభిస్సన్తి ఆపాయికానం అసఞ్ఞసత్తానం తేసం తత్థ దుక్ఖసచ్చం నిరుజ్ఝిత్థ, నో చ తేసం తత్థ మగ్గసచ్చం నిరుజ్ఝిస్సతి. అగ్గమగ్గస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం తత్థ దుక్ఖసచ్చఞ్చ నిరుజ్ఝిత్థ మగ్గసచ్చఞ్చ నిరుజ్ఝిస్సతి.
(ఖ) యస్స వా పన యత్థ మగ్గసచ్చం నిరుజ్ఝిస్సతి తస్స తత్థ దుక్ఖసచ్చం నిరుజ్ఝిత్థాతి?
సుద్ధావాసం ఉపపజ్జన్తానం తేసం తత్థ మగ్గసచ్చం నిరుజ్ఝిస్సతి, నో చ తేసం తత్థ దుక్ఖసచ్చం నిరుజ్ఝిత్థ. అగ్గమగ్గస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం తత్థ మగ్గసచ్చఞ్చ నిరుజ్ఝిస్సతి దుక్ఖసచ్చఞ్చ నిరుజ్ఝిత్థ.
౧౩౦. (క) యస్స యత్థ సముదయసచ్చం నిరుజ్ఝిత్థ తస్స తత్థ మగ్గసచ్చం నిరుజ్ఝిస్సతీతి?
అగ్గమగ్గస్స భఙ్గక్ఖణే అరహన్తానం యే చ పుథుజ్జనా మగ్గం న పటిలభిస్సన్తి ఆపాయికానం తేసం తత్థ సముదయసచ్చం నిరుజ్ఝిత్థ, నో చ తేసం తత్థ మగ్గసచ్చం నిరుజ్ఝిస్సతి. అగ్గమగ్గస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం తత్థ సముదయసచ్చఞ్చ నిరుజ్ఝిత్థ మగ్గసచ్చఞ్చ నిరుజ్ఝిస్సతి.
(ఖ) యస్స వా పన యత్థ మగ్గసచ్చం నిరుజ్ఝిస్సతి తస్స తత్థ సముదయసచ్చం నిరుజ్ఝిత్థాతి.
సుద్ధావాసానం దుతియే చిత్తే వత్తమానే తేసం తత్థ మగ్గసచ్చం నిరుజ్ఝిస్సతి, నో చ తేసం తత్థ సముదయసచ్చం నిరుజ్ఝిత్థ. అగ్గమగ్గస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం తత్థ మగ్గసచ్చఞ్చ నిరుజ్ఝిస్సతి సముదయసచ్చఞ్చ నిరుజ్ఝిత్థ.
(ఘ) పచ్చనీకపుగ్గలో
౧౩౧. (క) యస్స దుక్ఖసచ్చం న నిరుజ్ఝిత్థ తస్స సముదయసచ్చం న నిరుజ్ఝిస్సతీతి? నత్థి.
(ఖ) యస్స వా పన సముదయసచ్చం న నిరుజ్ఝిస్సతి తస్స దుక్ఖసచ్చం న నిరుజ్ఝిత్థాతి? నిరుజ్ఝిత్థ.
(క) యస్స దుక్ఖసచ్చం న నిరుజ్ఝిత్థ తస్స మగ్గసచ్చం న నిరుజ్ఝిస్సతీతి? నత్థి.
(ఖ) యస్స వా పన మగ్గసచ్చం న నిరుజ్ఝిస్సతి తస్స దుక్ఖసచ్చం న నిరుజ్ఝిత్థాతి? నిరుజ్ఝిత్థ.
౧౩౨. (క) యస్స సముదయసచ్చం న నిరుజ్ఝిత్థ తస్స మగ్గసచ్చం న నిరుజ్ఝిస్సతీతి? నత్థి.
(ఖ) యస్స వా పన మగ్గసచ్చం న నిరుజ్ఝిస్సతి తస్స సముదయసచ్చం న నిరుజ్ఝిత్థాతి? నిరుజ్ఝిత్థ.
(ఙ) పచ్చనీకఓకాసో
౧౩౩. యత్థ దుక్ఖసచ్చం న నిరుజ్ఝిత్థ…పే….
(చ) పచ్చనీకపుగ్గలోకాసా
౧౩౪. (క) యస్స యత్థ దుక్ఖసచ్చం న నిరుజ్ఝిత్థ తస్స తత్థ సముదయసచ్చం న నిరుజ్ఝిస్సతీతి? నిరుజ్ఝిస్సతి.
(ఖ) యస్స వా పన యత్థ సముదయసచ్చం న నిరుజ్ఝిస్సతి తస్స తత్థ దుక్ఖసచ్చం న నిరుజ్ఝిత్థాతి? నిరుజ్ఝిత్థ.
(క) యస్స యత్థ దుక్ఖసచ్చం న నిరుజ్ఝిత్థ తస్స తత్థ మగ్గసచ్చం న నిరుజ్ఝిస్సతీతి? నిరుజ్ఝిస్సతి.
(ఖ) యస్స వా పన యత్థ మగ్గసచ్చం న నిరుజ్ఝిస్సతి తస్స తత్థ దుక్ఖసచ్చం న నిరుజ్ఝిత్థాతి? నిరుజ్ఝిత్థ.
౧౩౫. (క) యస్స యత్థ సముదయసచ్చం న నిరుజ్ఝిత్థ తస్స తత్థ మగ్గసచ్చం న నిరుజ్ఝిస్సతీతి?
సుద్ధావాసానం దుతియే చిత్తే వత్తమానే తేసం తత్థ సముదయసచ్చం న నిరుజ్ఝిత్థ, నో చ తేసం తత్థ మగ్గసచ్చం న నిరుజ్ఝిస్సతి. అసఞ్ఞసత్తానం తేసం తత్థ సముదయసచ్చఞ్చ న నిరుజ్ఝిత్థ మగ్గసచ్చఞ్చ న నిరుజ్ఝిస్సతి.
(ఖ) యస్స వా పన యత్థ మగ్గసచ్చం న నిరుజ్ఝిస్సతి తస్స తత్థ సముదయసచ్చం న నిరుజ్ఝిత్థాతి?
అగ్గమగ్గస్స భఙ్గక్ఖణే అరహన్తానం యే చ పుథుజ్జనా మగ్గం న పటిలభిస్సన్తి ఆపాయికానం తేసం తత్థ మగ్గసచ్చం న నిరుజ్ఝిస్సతి, నో చ తేసం తత్థ సముదయసచ్చం న నిరుజ్ఝిత్థ. అసఞ్ఞసత్తానం తేసం తత్థ మగ్గసచ్చఞ్చ న నిరుజ్ఝిస్సతి సముదయసచ్చఞ్చ న నిరుజ్ఝిత్థ.
నిరోధవారో.