(౧) పచ్చుప్పన్నవారో

(క) అనులోమపుగ్గలో

౮౮. (క) యస్స దుక్ఖసచ్చం నిరుజ్ఝతి తస్స సముదయసచ్చం నిరుజ్ఝతీతి?

సబ్బేసం చవన్తానం పవత్తే తణ్హావిప్పయుత్తచిత్తస్స భఙ్గక్ఖణే తేసం దుక్ఖసచ్చం నిరుజ్ఝతి, నో చ తేసం సముదయసచ్చం నిరుజ్ఝతి. తణ్హాయ భఙ్గక్ఖణే తేసం దుక్ఖసచ్చఞ్చ నిరుజ్ఝతి సముదయసచ్చఞ్చ నిరుజ్ఝతి.

(ఖ) యస్స వా పన సముదయసచ్చం నిరుజ్ఝతి తస్స దుక్ఖసచ్చం నిరుజ్ఝతీతి? ఆమన్తా.

(క) యస్స దుక్ఖసచ్చం నిరుజ్ఝతి తస్స మగ్గసచ్చం నిరుజ్ఝతీతి?

సబ్బేసం చవన్తానం పవత్తే మగ్గవిప్పయుత్తచిత్తస్స భఙ్గక్ఖణే తేసం దుక్ఖసచ్చం నిరుజ్ఝతి, నో చ తేసం మగ్గసచ్చం నిరుజ్ఝతి. పఞ్చవోకారే మగ్గస్స భఙ్గక్ఖణే తేసం దుక్ఖసచ్చఞ్చ నిరుజ్ఝతి మగ్గసచ్చఞ్చ నిరుజ్ఝతి.

(ఖ) యస్స వా పన మగ్గసచ్చం నిరుజ్ఝతి తస్స దుక్ఖసచ్చం నిరుజ్ఝతీతి?

అరూపే మగ్గస్స భఙ్గక్ఖణే తేసం మగ్గసచ్చం నిరుజ్ఝతి, నో చ తేసం దుక్ఖసచ్చం నిరుజ్ఝతి. పఞ్చవోకారే మగ్గస్స భఙ్గక్ఖణే తేసం మగ్గసచ్చఞ్చ నిరుజ్ఝతి దుక్ఖసచ్చఞ్చ నిరుజ్ఝతి.

౮౯. (క) యస్స సముదయసచ్చం నిరుజ్ఝతి తస్స మగ్గసచ్చం నిరుజ్ఝతీతి? నో.

(ఖ) యస్స వా పన మగ్గసచ్చం నిరుజ్ఝతి తస్స సముదయసచ్చం నిరుజ్ఝతీతి? నో.

(ఖ) అనులోమఓకాసో

౯౦. యత్థ దుక్ఖసచ్చం నిరుజ్ఝతి తత్థ సముదయసచ్చం నిరుజ్ఝతీతి?

అసఞ్ఞసత్తే తత్థ దుక్ఖసచ్చం నిరుజ్ఝతి…పే….

(యత్థకం ఉప్పాదేపి నిరోధేపి ఉప్పాదనిరోధేపి సదిసం, నత్థి నానాకరణం).

(గ) అనులోమపుగ్గలోకాసా

౯౧. యస్స యత్థ దుక్ఖసచ్చం నిరుజ్ఝతి…పే….

(యస్సయత్థకమ్పి సదిసం విత్థారేతబ్బం).

(ఘ) పచ్చనీకపుగ్గలో

౯౨. (క) యస్స దుక్ఖసచ్చం న నిరుజ్ఝతి తస్స సముదయసచ్చం న నిరుజ్ఝతీతి? ఆమన్తా.

(ఖ) యస్స వా పన సముదయసచ్చం న నిరుజ్ఝతి తస్స దుక్ఖసచ్చం న నిరుజ్ఝతీతి?

సబ్బేసం చవన్తానం పవత్తే తణ్హావిప్పయుత్తచిత్తస్స భఙ్గక్ఖణే తేసం సముదయసచ్చం న నిరుజ్ఝతి, నో చ తేసం దుక్ఖసచ్చం న నిరుజ్ఝతి. సబ్బేసం ఉపపజ్జన్తానం పవత్తే చిత్తస్స ఉప్పాదక్ఖణే అరూపే మగ్గస్స చ ఫలస్స చ భఙ్గక్ఖణే తేసం సముదయసచ్చఞ్చ న నిరుజ్ఝతి దుక్ఖసచ్చఞ్చ న నిరుజ్ఝతి.

(క) యస్స దుక్ఖసచ్చం న నిరుజ్ఝతి తస్స మగ్గసచ్చం న నిరుజ్ఝతీతి?

అరూపే మగ్గస్స భఙ్గక్ఖణే తేసం దుక్ఖసచ్చం న నిరుజ్ఝతి, నో చ తేసం మగ్గసచ్చం న నిరుజ్ఝతి. సబ్బేసం ఉపపజ్జన్తానం పవత్తే చిత్తస్స ఉప్పాదక్ఖణే అరూపే ఫలస్స భఙ్గక్ఖణే తేసం దుక్ఖసచ్చఞ్చ న నిరుజ్ఝతి మగ్గసచ్చఞ్చ న నిరుజ్ఝతి.

(ఖ) యస్స వా పన మగ్గసచ్చం న నిరుజ్ఝతి తస్స దుక్ఖసచ్చం న నిరుజ్ఝతీతి?

సబ్బేసం చవన్తానం పవత్తే మగ్గవిప్పయుత్తచిత్తస్స భఙ్గక్ఖణే తేసం మగ్గసచ్చం న నిరుజ్ఝతి, నో చ తేసం దుక్ఖసచ్చం న నిరుజ్ఝతి. సబ్బేసం ఉపపజ్జన్తానం పవత్తే చిత్తస్స ఉప్పాదక్ఖణే అరూపే ఫలస్స భఙ్గక్ఖణే తేసం మగ్గసచ్చఞ్చ న నిరుజ్ఝతి దుక్ఖసచ్చఞ్చ న నిరుజ్ఝతి.

౯౩. (క) యస్స సముదయసచ్చం న నిరుజ్ఝతి తస్స మగ్గసచ్చం న నిరుజ్ఝతీతి?

మగ్గస్స భఙ్గక్ఖణే తేసం సముదయసచ్చం న నిరుజ్ఝతి, నో చ తేసం మగ్గసచ్చం న నిరుజ్ఝతి. సబ్బేసం చిత్తస్స ఉప్పాదక్ఖణే తణ్హావిప్పయుత్తమగ్గవిప్పయుత్తచిత్తస్స భఙ్గక్ఖణే నిరోధసమాపన్నానం అసఞ్ఞసత్తానం తేసం సముదయసచ్చఞ్చ న నిరుజ్ఝతి మగ్గసచ్చఞ్చ న నిరుజ్ఝతి.

(ఖ) యస్స వా పన మగ్గసచ్చం న నిరుజ్ఝతి తస్స సముదయసచ్చం న నిరుజ్ఝతీతి?

తణ్హాయ భఙ్గక్ఖణే తేసం మగ్గసచ్చం న నిరుజ్ఝతి, నో చ తేసం సముదయసచ్చం న నిరుజ్ఝతి. సబ్బేసం చిత్తస్స ఉప్పాదక్ఖణే మగ్గవిప్పయుత్తతణ్హావిప్పయుత్తచిత్తస్స భఙ్గక్ఖణే నిరోధసమాపన్నానం అసఞ్ఞసత్తానం తేసం మగ్గసచ్చఞ్చ న నిరుజ్ఝతి సముదయసచ్చఞ్చ న నిరుజ్ఝతి.

(ఙ) పచ్చనీకఓకాసో

౯౪. యత్థ దుక్ఖసచ్చం న నిరుజ్ఝతి…పే….

(చ) పచ్చనీకపుగ్గలోకాసా

౯౫. యస్స యత్థ దుక్ఖసచ్చం న నిరుజ్ఝతి…పే….

(యస్సకమ్పి [యస్సకమ్పి యత్థకమ్పి (సీ. స్యా.)] యస్సయత్థకమ్పి సదిసం, యస్సయత్థకేపి నిరోధసమాపన్నానన్తి చేతం న కాతబ్బం).