(౧) పచ్చుప్పన్నవారో
(క) అనులోమపుగ్గలో
౨౭. (క) యస్స దుక్ఖసచ్చం ఉప్పజ్జతి తస్స సముదయసచ్చం ఉప్పజ్జతీతి?
సబ్బేసం ఉపపజ్జన్తానం పవత్తే తణ్హావిప్పయుత్తచిత్తస్స ఉప్పాదక్ఖణే తేసం దుక్ఖసచ్చం ఉప్పజ్జతి, నో చ తేసం సముదయసచ్చం ఉప్పజ్జతి. తణ్హాయ ఉప్పాదక్ఖణే తేసం దుక్ఖసచ్చఞ్చ ఉప్పజ్జతి సముదయసచ్చఞ్చ ఉప్పజ్జతి.
(ఖ) యస్స వా పన సముదయసచ్చం ఉప్పజ్జతి తస్స దుక్ఖసచ్చం ఉప్పజ్జతీతి? ఆమన్తా.
(క) యస్స దుక్ఖసచ్చం ఉప్పజ్జతి తస్స మగ్గసచ్చం ఉప్పజ్జతీతి?
సబ్బేసం ఉపపజ్జన్తానం పవత్తే మగ్గవిప్పయుత్తచిత్తస్స ఉప్పాదక్ఖణే తేసం దుక్ఖసచ్చం ఉప్పజ్జతి, నో చ తేసం మగ్గసచ్చం ఉప్పజ్జతి. పఞ్చవోకారే మగ్గస్స ఉప్పాదక్ఖణే తేసం దుక్ఖసచ్చఞ్చ ఉప్పజ్జతి మగ్గసచ్చఞ్చ ఉప్పజ్జతి.
(ఖ) యస్స వా పన మగ్గసచ్చం ఉప్పజ్జతి తస్స దుక్ఖసచ్చం ఉప్పజ్జతీతి?
అరూపే మగ్గస్స ఉప్పాదక్ఖణే తేసం మగ్గసచ్చం ఉప్పజ్జతి, నో చ తేసం దుక్ఖసచ్చం ఉప్పజ్జతి. పఞ్చవోకారే మగ్గస్స ఉప్పాదక్ఖణే తేసం మగ్గసచ్చఞ్చ ఉప్పజ్జతి దుక్ఖసచ్చఞ్చ ఉప్పజ్జతి.
౨౮. (క) యస్స సముదయసచ్చం ఉప్పజ్జతి తస్స మగ్గసచ్చం ఉప్పజ్జతీతి? నో.
(ఖ) యస్స వా పన మగ్గసచ్చం ఉప్పజ్జతి తస్స సముదయసచ్చం ఉప్పజ్జతీతి? నో.
(ఖ) అనులోమఓకాసో
౨౯. (క) యత్థ దుక్ఖసచ్చం ఉప్పజ్జతి తత్థ సముదయసచ్చం ఉప్పజ్జతీతి?
అసఞ్ఞసత్తే తత్థ దుక్ఖసచ్చం ఉప్పజ్జతి, నో చ తత్థ సముదయసచ్చం ఉప్పజ్జతి. చతువోకారే పఞ్చవోకారే తత్థ దుక్ఖసచ్చఞ్చ ఉప్పజ్జతి సముదయసచ్చఞ్చ ఉప్పజ్జతి.
(ఖ) యత్థ వా పన…పే…? ఆమన్తా.
(క) యత్థ దుక్ఖసచ్చం ఉప్పజ్జతి తత్థ మగ్గసచ్చం ఉప్పజ్జతీతి?
అపాయే అసఞ్ఞసత్తే తత్థ దుక్ఖసచ్చం ఉప్పజ్జతి, నో చ తత్థ మగ్గసచ్చం ఉప్పజ్జతి. అవసేసే చతువోకారే పఞ్చవోకారే తత్థ దుక్ఖసచ్చఞ్చ ఉప్పజ్జతి మగ్గసచ్చఞ్చ ఉప్పజ్జతి.
(ఖ) యత్థ వా పన మగ్గసచ్చం ఉప్పజ్జతి తత్థ దుక్ఖసచ్చం ఉప్పజ్జతీతి? ఆమన్తా.
౩౦. (క) యత్థ సముదయసచ్చం ఉప్పజ్జతి తత్థ మగ్గసచ్చం ఉప్పజ్జతీతి?
అపాయే తత్థ సముదయసచ్చం ఉప్పజ్జతి, నో చ తత్థ మగ్గసచ్చం ఉప్పజ్జతి. అవసేసే చతువోకారే పఞ్చవోకారే తత్థ సముదయసచ్చఞ్చ ఉప్పజ్జతి మగ్గసచ్చఞ్చ ఉప్పజ్జతి.
(ఖ) యత్థ వా పన…పే…? ఆమన్తా.
(గ) అనులోమపుగ్గలోకాసా
౩౧. యస్స యత్థ దుక్ఖసచ్చం ఉప్పజ్జతి తస్స తత్థ సముదయసచ్చం ఉప్పజ్జతీతి?…పే….
(యస్సకమ్పి యస్సయత్థకమ్పి సదిసం విత్థారేతబ్బం).
(ఘ) పచ్చనీకపుగ్గలో
౩౨. (క) యస్స దుక్ఖసచ్చం నుప్పజ్జతి తస్స సముదయసచ్చం నుప్పజ్జతీతి? ఆమన్తా.
(ఖ) యస్స వా పన సముదయసచ్చం నుప్పజ్జతి తస్స దుక్ఖసచ్చం నుప్పజ్జతీతి?
సబ్బేసం ఉపపజ్జన్తానం పవత్తే తణ్హావిప్పయుత్తచిత్తస్స ఉప్పాదక్ఖణే తేసం సముదయసచ్చం నుప్పజ్జతి, నో చ తేసం దుక్ఖసచ్చం నుప్పజ్జతి. సబ్బేసం చవన్తానం పవత్తే చిత్తస్స భఙ్గక్ఖణే అరూపే మగ్గస్స చ ఫలస్స చ ఉప్పాదక్ఖణే తేసం సముదయసచ్చఞ్చ నుప్పజ్జతి దుక్ఖసచ్చఞ్చ నుప్పజ్జతి.
(క) యస్స దుక్ఖసచ్చం నుప్పజ్జతి తస్స మగ్గసచ్చం నుప్పజ్జతీతి?
అరూపే మగ్గస్స ఉప్పాదక్ఖణే తేసం దుక్ఖసచ్చం నుప్పజ్జతి, నో చ తేసం మగ్గసచ్చం నుప్పజ్జతి. సబ్బేసం చవన్తానం పవత్తే చిత్తస్స భఙ్గక్ఖణే అరూపే ఫలస్స ఉప్పాదక్ఖణే తేసం దుక్ఖసచ్చఞ్చ నుప్పజ్జతి మగ్గసచ్చఞ్చ నుప్పజ్జతి.
(ఖ) యస్స వా పన మగ్గసచ్చం నుప్పజ్జతి తస్స దుక్ఖసచ్చం నుప్పజ్జతీతి?
సబ్బేసం ఉపపజ్జన్తానం పవత్తే మగ్గవిప్పయుత్తచిత్తస్స ఉప్పాదక్ఖణే తేసం మగ్గసచ్చం నుప్పజ్జతి, నో చ తేసం దుక్ఖసచ్చం నుప్పజ్జతి. సబ్బేసం చవన్తానం పవత్తే చిత్తస్స భఙ్గక్ఖణే అరూపే ఫలస్స ఉప్పాదక్ఖణే తేసం మగ్గసచ్చఞ్చ నుప్పజ్జతి దుక్ఖసచ్చఞ్చ నుప్పజ్జతి.
౩౩. (క) యస్స సముదయసచ్చం నుప్పజ్జతి తస్స మగ్గసచ్చం నుప్పజ్జతీతి?
మగ్గస్స ఉప్పాదక్ఖణే తేసం సముదయసచ్చం నుప్పజ్జతి, నో చ తేసం మగ్గసచ్చం నుప్పజ్జతి. సబ్బేసం చిత్తస్స భఙ్గక్ఖణే తణ్హావిప్పయుత్తమగ్గవిప్పయుత్తచిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం సముదయసచ్చఞ్చ నుప్పజ్జతి మగ్గసచ్చఞ్చ నుప్పజ్జతి.
(ఖ) యస్స వా పన మగ్గసచ్చం నుప్పజ్జతి తస్స సముదయసచ్చం నుప్పజ్జతీతి?
తణ్హాయ ఉప్పాదక్ఖణే తేసం మగ్గసచ్చం నుప్పజ్జతి, నో చ తేసం సముదయసచ్చం నుప్పజ్జతి. సబ్బేసం చిత్తస్స భఙ్గక్ఖణే మగ్గవిప్పయుత్తతణ్హావిప్పయుత్తచిత్తస్స [తణ్హావిప్పయుత్తమగ్గవిప్పయుత్తచిత్తస్స (సీ.) ఏవం పుగ్గలోకాసేపి నిరోధవారేపి] ఉప్పాదక్ఖణే నిరోధసమాపన్నానం అసఞ్ఞసత్తానం తేసం మగ్గసచ్చఞ్చ నుప్పజ్జతి సముదయసచ్చఞ్చ నుప్పజ్జతి.
(ఙ) పచ్చనీకఓకాసో
౩౪. (క) యత్థ దుక్ఖసచ్చం నుప్పజ్జతి తత్థ సముదయసచ్చం నుప్పజ్జతీతి? నత్థి.
(ఖ) యత్థ వా పన సముదయసచ్చం నుప్పజ్జతి తత్థ దుక్ఖసచ్చం నుప్పజ్జతీతి? ఉప్పజ్జతి.
(క) యత్థ దుక్ఖసచ్చం నుప్పజ్జతి తత్థ మగ్గసచ్చం నుప్పజ్జతీతి? నత్థి.
(ఖ) యత్థ వా పన మగ్గసచ్చం నుప్పజ్జతి తత్థ దుక్ఖసచ్చం నుప్పజ్జతీతి? ఉప్పజ్జతి.
౩౫. (క) యత్థ సముదయసచ్చం నుప్పజ్జతి తత్థ మగ్గసచ్చం నుప్పజ్జతీతి? ఆమన్తా.
(ఖ) యత్థ వా పన మగ్గసచ్చం నుప్పజ్జతి తత్థ సముదయసచ్చం నుప్పజ్జతీతి?
అపాయే తత్థ మగ్గసచ్చం నుప్పజ్జతి, నో చ తత్థ సముదయసచ్చం నుప్పజ్జతి. అసఞ్ఞసత్తే తత్థ మగ్గసచ్చఞ్చ నుప్పజ్జతి సముదయసచ్చఞ్చ నుప్పజ్జతి.
(చ) పచ్చనీకపుగ్గలోకాసా
౩౬. (క) యస్స యత్థ దుక్ఖసచ్చం నుప్పజ్జతి తస్స తత్థ సముదయసచ్చం నుప్పజ్జతీతి? ఆమన్తా.
(ఖ) యస్స వా పన యత్థ సముదయసచ్చం నుప్పజ్జతి తస్స తత్థ దుక్ఖసచ్చం నుప్పజ్జతీతి?
సబ్బేసం ఉపపజ్జన్తానం పవత్తే తణ్హావిప్పయుత్తచిత్తస్స ఉప్పాదక్ఖణే తేసం తత్థ సముదయసచ్చం నుప్పజ్జతి, నో చ తేసం తత్థ దుక్ఖసచ్చం నుప్పజ్జతి. సబ్బేసం చవన్తానం పవత్తే చిత్తస్స భఙ్గక్ఖణే అరూపే మగ్గస్స చ ఫలస్స చ ఉప్పాదక్ఖణే తేసం తత్థ సముదయసచ్చఞ్చ నుప్పజ్జతి దుక్ఖసచ్చఞ్చ నుప్పజ్జతి.
(క) యస్స యత్థ దుక్ఖసచ్చం నుప్పజ్జతి తస్స తత్థ మగ్గసచ్చం నుప్పజ్జతీతి?
అరూపే మగ్గస్స ఉప్పాదక్ఖణే తేసం తత్థ దుక్ఖసచ్చం నుప్పజ్జతి, నో చ తేసం తత్థ మగ్గసచ్చం నుప్పజ్జతి. సబ్బేసం చవన్తానం పవత్తే చిత్తస్స భఙ్గక్ఖణే అరూపే ఫలస్స ఉప్పాదక్ఖణే తేసం తత్థ దుక్ఖసచ్చఞ్చ నుప్పజ్జతి మగ్గసచ్చఞ్చ నుప్పజ్జతి.
(ఖ) యస్స వా పన యత్థ మగ్గసచ్చం నుప్పజ్జతి తస్స తత్థ దుక్ఖసచ్చం నుప్పజ్జతీతి?
సబ్బేసం ఉపపజ్జన్తానం పవత్తే మగ్గవిప్పయుత్తచిత్తస్స ఉప్పాదక్ఖణే తేసం తత్థ మగ్గసచ్చం నుప్పజ్జతి, నో చ తేసం తత్థ దుక్ఖసచ్చం నుప్పజ్జతి. సబ్బేసం చవన్తానం పవత్తే చిత్తస్స భఙ్గక్ఖణే అరూపే ఫలస్స ఉప్పాదక్ఖణే తేసం తత్థ మగ్గసచ్చఞ్చ నుప్పజ్జతి దుక్ఖసచ్చఞ్చ నుప్పజ్జతి.
౩౭. (క) యస్స యత్థ సముదయసచ్చం నుప్పజ్జతి తస్స తత్థ మగ్గసచ్చం నుప్పజ్జతీతి?
మగ్గస్స ఉప్పాదక్ఖణే తేసం తత్థ సముదయసచ్చం నుప్పజ్జతి, నో చ తేసం తత్థ మగ్గసచ్చం నుప్పజ్జతి. సబ్బేసం చిత్తస్స భఙ్గక్ఖణే తణ్హావిప్పయుత్తమగ్గవిప్పయుత్తచిత్తస్స ఉప్పాదక్ఖణే అసఞ్ఞసత్తానం తేసం తత్థ సముదయసచ్చఞ్చ నుప్పజ్జతి మగ్గసచ్చఞ్చ నుప్పజ్జతి.
(ఖ) యస్స వా పన యత్థ మగ్గసచ్చం నుప్పజ్జతి తస్స తత్థ సముదయసచ్చం నుప్పజ్జతీతి?
తణ్హాయ ఉప్పాదక్ఖణే తేసం తత్థ మగ్గసచ్చం నుప్పజ్జతి, నో చ తేసం తత్థ సముదయసచ్చం నుప్పజ్జతి. సబ్బేసం చిత్తస్స భఙ్గక్ఖణే మగ్గవిప్పయుత్తతణ్హావిప్పయుత్తచిత్తస్స ఉప్పాదక్ఖణే అసఞ్ఞసత్తానం తేసం తత్థ మగ్గసచ్చఞ్చ నుప్పజ్జతి సముదయసచ్చఞ్చ నుప్పజ్జతి.