(౬) అతీతానాగతవారో

(క) అనులోమపుగ్గలో

౧౮౪. (క) యస్స చక్ఖాయతనం నిరుజ్ఝిత్థ తస్స సోతాయతనం నిరుజ్ఝిస్సతీతి?

పఞ్చవోకారే పరినిబ్బన్తానం అరూపే పచ్ఛిమభవికానం యే చ అరూపం ఉపపజ్జిత్వా పరినిబ్బాయిస్సన్తి తేసం చవన్తానం తేసం చక్ఖాయతనం నిరుజ్ఝిత్థ, నో చ తేసం సోతాయతనం నిరుజ్ఝిస్సతి. ఇతరేసం తేసం చక్ఖాయతనఞ్చ నిరుజ్ఝిత్థ సోతాయతనఞ్చ నిరుజ్ఝిస్సతి.

(ఖ) యస్స వా పన సోతాయతనం నిరుజ్ఝిస్సతి తస్స చక్ఖాయతనం నిరుజ్ఝిత్థాతి? ఆమన్తా.

(క) యస్స చక్ఖాయతనం నిరుజ్ఝిత్థ తస్స ఘానాయతనం నిరుజ్ఝిస్సతీతి?

కామావచరే పరినిబ్బన్తానం రూపావచరే అరూపావచరే పచ్ఛిమభవికానం యే చ రూపావచరం అరూపావచరం ఉపపజ్జిత్వా పరినిబ్బాయిస్సన్తి తేసం చవన్తానం తేసం చక్ఖాయతనం నిరుజ్ఝిత్థ, నో చ తేసం ఘానాయతనం నిరుజ్ఝిస్సతి. ఇతరేసం తేసం చక్ఖాయతనఞ్చ నిరుజ్ఝిత్థ ఘానాయతనఞ్చ నిరుజ్ఝిస్సతి.

(ఖ) యస్స వా పన…పే…? ఆమన్తా.

(క) యస్స చక్ఖాయతనం నిరుజ్ఝిత్థ తస్స రూపాయతనం నిరుజ్ఝిస్సతీతి?

పఞ్చవోకారే పరినిబ్బన్తానం అరూపే పచ్ఛిమభవికానం యే చ అరూపం ఉపపజ్జిత్వా పరినిబ్బాయిస్సన్తి తేసం చవన్తానం తేసం చక్ఖాయతనం నిరుజ్ఝిత్థ, నో చ తేసం రూపాయతనం నిరుజ్ఝిస్సతి. ఇతరేసం తేసం చక్ఖాయతనఞ్చ నిరుజ్ఝిత్థ రూపాయతనఞ్చ నిరుజ్ఝిస్సతి.

(ఖ) యస్స వా పన…పే…? ఆమన్తా.

యస్స చక్ఖాయతనం నిరుజ్ఝిత్థ తస్స మనాయతనం…పే… ధమ్మాయతనం నిరుజ్ఝిస్సతీతి?

పరినిబ్బన్తానం తేసం చక్ఖాయతనం నిరుజ్ఝిత్థ, నో చ తేసం ధమ్మాయతనం నిరుజ్ఝిస్సతి. ఇతరేసం తేసం చక్ఖాయతనఞ్చ నిరుజ్ఝిత్థ ధమ్మాయతనఞ్చ నిరుజ్ఝిస్సతి. యస్స వా పన…పే…? ఆమన్తా. (చక్ఖాయతనమూలకం)

౧౮౫. (క) యస్స ఘానాయతనం నిరుజ్ఝిత్థ తస్స రూపాయతనం నిరుజ్ఝిస్సతీతి?

పఞ్చవోకారే పరినిబ్బన్తానం అరూపే పచ్ఛిమభవికానం యే చ అరూపం ఉపపజ్జిత్వా పరినిబ్బాయిస్సన్తి తేసం చవన్తానం తేసం ఘానాయతనం నిరుజ్ఝిత్థ, నో చ తేసం రూపాయతనం నిరుజ్ఝిస్సతి. ఇతరేసం తేసం ఘానాయతనఞ్చ నిరుజ్ఝిత్థ రూపాయతనఞ్చ నిరుజ్ఝిస్సతి.

(ఖ) యస్స వా పన…పే…? ఆమన్తా.

యస్స ఘానాయతనం నిరుజ్ఝిత్థ తస్స మనాయతనం…పే… ధమ్మాయతనం నిరుజ్ఝిస్సతీతి?

పరినిబ్బన్తానం తేసం ఘానాయతనం నిరుజ్ఝిత్థ, నో చ తేసం ధమ్మాయతనం నిరుజ్ఝిస్సతి. ఇతరేసం తేసం ఘానాయతనఞ్చ నిరుజ్ఝిత్థ ధమ్మాయతనఞ్చ నిరుజ్ఝిస్సతి.

యస్స వా పన…పే…? ఆమన్తా.

౧౮౬. యస్స రూపాయతనం నిరుజ్ఝిత్థ తస్స మనాయతన…పే… ధమ్మాయతనం నిరుజ్ఝిస్సతీతి?

పరినిబ్బన్తానం తేసం రూపాయతనం నిరుజ్ఝిత్థ, నో చ తేసం ధమ్మాయతనం నిరుజ్ఝిస్సతి. ఇతరేసం తేసం రూపాయతనఞ్చ నిరుజ్ఝిత్థ ధమ్మాయతనఞ్చ నిరుజ్ఝిస్సతి.

(ఖ) యస్స వా పన…పే…? ఆమన్తా.

౧౮౭. (క) యస్స మనాయతనం నిరుజ్ఝిత్థ తస్స ధమ్మాయతనం నిరుజ్ఝిస్సతీతి?

పరినిబ్బన్తానం తేసం మనాయతనం నిరుజ్ఝిత్థ, నో చ తేసం ధమ్మాయతనం నిరుజ్ఝిస్సతి. ఇతరేసం తేసం మనాయతనఞ్చ నిరుజ్ఝిత్థ ధమ్మాయతనఞ్చ నిరుజ్ఝిస్సతి.

(ఖ) యస్స వా పన…పే…? ఆమన్తా.

(ఖ) అనులోమఓకాసో

౧౮౮. యత్థ చక్ఖాయతనం నిరుజ్ఝిత్థ…పే….

(గ) అనులోమపుగ్గలోకాసా

౧౮౯. (క) యస్స యత్థ చక్ఖాయతనం నిరుజ్ఝిత్థ తస్స తత్థ సోతాయతనం నిరుజ్ఝిస్సతీతి?

పఞ్చవోకారే పరినిబ్బన్తానం తేసం తత్థ చక్ఖాయతనం నిరుజ్ఝిత్థ, నో చ తేసం తత్థ సోతాయతనం నిరుజ్ఝిస్సతి. ఇతరేసం పఞ్చవోకారానం తేసం తత్థ చక్ఖాయతనఞ్చ నిరుజ్ఝిత్థ సోతాయతనఞ్చ నిరుజ్ఝిస్సతి.

(ఖ) యస్స వా పన యత్థ సోతాయతనం నిరుజ్ఝిస్సతి తస్స తత్థ చక్ఖాయతనం నిరుజ్ఝిత్థాతి?

సుద్ధావాసం ఉపపజ్జన్తానం తేసం తత్థ సోతాయతనం నిరుజ్ఝిస్సతి, నో చ తేసం తత్థ చక్ఖాయతనం నిరుజ్ఝిత్థ. ఇతరేసం పఞ్చవోకారానం తేసం తత్థ సోతాయతనఞ్చ నిరుజ్ఝిస్సతి చక్ఖాయతనఞ్చ నిరుజ్ఝిత్థ.

(క) యస్స యత్థ చక్ఖాయతనం నిరుజ్ఝిత్థ తస్స తత్థ ఘానాయతనం నిరుజ్ఝిస్సతీతి?

కామావచరే పరినిబ్బన్తానం రూపావచరానం తేసం తత్థ చక్ఖాయతనం నిరుజ్ఝిత్థ, నో చ తేసం తత్థ ఘానాయతనం నిరుజ్ఝిస్సతి. ఇతరేసం కామావచరానం తేసం తత్థ చక్ఖాయతనఞ్చ నిరుజ్ఝిత్థ ఘానాయతనఞ్చ నిరుజ్ఝిస్సతి.

(ఖ) యస్స వా పన యత్థ ఘానాయతనం నిరుజ్ఝిస్సతి తస్స తత్థ చక్ఖాయతనం నిరుజ్ఝిత్థాతి? ఆమన్తా.

(క) యస్స యత్థ చక్ఖాయతనం నిరుజ్ఝిత్థ తస్స తత్థ రూపాయతనం నిరుజ్ఝిస్సతీతి?

పఞ్చవోకారే పరినిబ్బన్తానం తేసం తత్థ చక్ఖాయతనం నిరుజ్ఝిత్థ, నో చ తేసం తత్థ రూపాయతనం నిరుజ్ఝిస్సతి. ఇతరేసం పఞ్చవోకారానం తేసం తత్థ చక్ఖాయతనఞ్చ నిరుజ్ఝిత్థ రూపాయతనఞ్చ నిరుజ్ఝిస్సతి.

(ఖ) యస్స వా పన యత్థ రూపాయతనం నిరుజ్ఝిస్సతి తస్స తత్థ చక్ఖాయతనం నిరుజ్ఝిత్థాతి?

సుద్ధావాసం ఉపపజ్జన్తానం అసఞ్ఞసత్తానం తేసం తత్థ రూపాయతనం నిరుజ్ఝిస్సతి, నో చ తేసం తత్థ చక్ఖాయతనం నిరుజ్ఝిత్థ. ఇతరేసం పఞ్చవోకారానం తేసం తత్థ రూపాయతనఞ్చ నిరుజ్ఝిస్సతి చక్ఖాయతనఞ్చ నిరుజ్ఝిత్థ.

(క) యస్స యత్థ చక్ఖాయతనం నిరుజ్ఝిత్థ తస్స తత్థ మనాయతనం నిరుజ్ఝిస్సతీతి?

పఞ్చవోకారే పరినిబ్బన్తానం తేసం తత్థ చక్ఖాయతనం నిరుజ్ఝిత్థ, నో చ తేసం తత్థ మనాయతనం నిరుజ్ఝిస్సతి. ఇతరేసం పఞ్చవోకారానం తేసం తత్థ చక్ఖాయతనఞ్చ నిరుజ్ఝిత్థ మనాయతనఞ్చ నిరుజ్ఝిస్సతి.

(ఖ) యస్స వా పన యత్థ మనాయతనం నిరుజ్ఝిస్సతి తస్స తత్థ చక్ఖాయతనం నిరుజ్ఝిత్థాతి?

సుద్ధావాసం ఉపపజ్జన్తానం అరూపానం తేసం తత్థ మనాయతనం నిరుజ్ఝిస్సతి, నో చ తేసం తత్థ చక్ఖాయతనం నిరుజ్ఝిత్థ. ఇతరేసం పఞ్చవోకారానం తేసం తత్థ మనాయతనఞ్చ నిరుజ్ఝిస్సతి చక్ఖాయతనఞ్చ నిరుజ్ఝిత్థ.

(క) యస్స యత్థ చక్ఖాయతనం నిరుజ్ఝిత్థ తస్స తత్థ ధమ్మాయతనం నిరుజ్ఝిస్సతీతి?

పఞ్చవోకారే పరినిబ్బన్తానం తేసం తత్థ చక్ఖాయతనం నిరుజ్ఝిత్థ, నో చ తేసం తత్థ ధమ్మాయతనం నిరుజ్ఝిస్సతి. ఇతరేసం పఞ్చవోకారానం తేసం తత్థ చక్ఖాయతనఞ్చ నిరుజ్ఝిత్థ ధమ్మాయతనఞ్చ నిరుజ్ఝిస్సతి.

(ఖ) యస్స వా పన యత్థ ధమ్మాయతనం నిరుజ్ఝిస్సతి తస్స తత్థ చక్ఖాయతనం నిరుజ్ఝిత్థాతి?

సుద్ధావాసం ఉపపజ్జన్తానం అసఞ్ఞసత్తానం అరూపానం తేసం తత్థ ధమ్మాయతనం నిరుజ్ఝిస్సతి, నో చ తేసం తత్థ చక్ఖాయతనం నిరుజ్ఝిత్థ. ఇతరేసం పఞ్చవోకారానం తేసం తత్థ ధమ్మాయతనఞ్చ నిరుజ్ఝిస్సతి చక్ఖాయతనఞ్చ నిరుజ్ఝిత్థ. (చక్ఖాయతనమూలకం)

౧౯౦. (క) యస్స యత్థ ఘానాయతనం నిరుజ్ఝిత్థ తస్స తత్థ రూపాయతనం నిరుజ్ఝిస్సతీతి?

కామావచరే పరినిబ్బన్తానం తేసం తత్థ ఘానాయతనం నిరుజ్ఝిత్థ, నో చ తేసం తత్థ రూపాయతనం నిరుజ్ఝిస్సతి. ఇతరేసం కామావచరానం తేసం తత్థ ఘానాయతనఞ్చ నిరుజ్ఝిత్థ రూపాయతనఞ్చ నిరుజ్ఝిస్సతి.

(ఖ) యస్స వా పన యత్థ రూపాయతనం నిరుజ్ఝిస్సతి తస్స తత్థ ఘానాయతనం నిరుజ్ఝిత్థాతి?

రూపావచరానం తేసం తత్థ రూపాయతనం నిరుజ్ఝిస్సతి, నో చ తేసం తత్థ ఘానాయతనం నిరుజ్ఝిత్థ. కామావచరానం తేసం తత్థ రూపాయతనఞ్చ నిరుజ్ఝిస్సతి ఘానాయతనఞ్చ నిరుజ్ఝిత్థ.

యస్స యత్థ ఘానాయతనం నిరుజ్ఝిత్థ తస్స తత్థ మనాయతనం…పే… ధమ్మాయతనం నిరుజ్ఝిస్సతీతి?

కామావచరే పరినిబ్బన్తానం తేసం తత్థ ఘానాయతనం నిరుజ్ఝిత్థ, నో చ తేసం తత్థ ధమ్మాయతనం నిరుజ్ఝిస్సతి. ఇతరేసం కామావచరానం తేసం తత్థ ఘానాయతనఞ్చ నిరుజ్ఝిత్థ ధమ్మాయతనఞ్చ నిరుజ్ఝిస్సతి.

యస్స వా పన యత్థ ధమ్మాయతనం నిరుజ్ఝిస్సతి తస్స తత్థ ఘానాయతనం నిరుజ్ఝిత్థాతి?

రూపావచరానం అరూపావచరానం తేసం తత్థ ధమ్మాయతనం నిరుజ్ఝిస్సతి, నో చ తేసం తత్థ ఘానాయతనం నిరుజ్ఝిత్థ. కామావచరానం తేసం తత్థ ధమ్మాయతనఞ్చ నిరుజ్ఝిస్సతి ఘానాయతనఞ్చ నిరుజ్ఝిత్థ. (ఘానాయతనమూలకం)

౧౯౧. (క) యస్స యత్థ రూపాయతనం నిరుజ్ఝిత్థ తస్స తత్థ మనాయతనం నిరుజ్ఝిస్సతీతి?

పఞ్చవోకారే పరినిబ్బన్తానం అసఞ్ఞసత్తానం తేసం తత్థ రూపాయతనం నిరుజ్ఝిత్థ, నో చ తేసం తత్థ మనాయతనం నిరుజ్ఝిస్సతి. ఇతరేసం పఞ్చవోకారానం తేసం తత్థ రూపాయతనఞ్చ నిరుజ్ఝిత్థ మనాయతనఞ్చ నిరుజ్ఝిస్సతి.

(ఖ) యస్స వా పన యత్థ మనాయతనం నిరుజ్ఝిస్సతి తస్స తత్థ రూపాయతనం నిరుజ్ఝిత్థాతి?

సుద్ధావాసం ఉపపజ్జన్తానం అరూపానం తేసం తత్థ మనాయతనం నిరుజ్ఝిస్సతి, నో చ తేసం తత్థ రూపాయతనం నిరుజ్ఝిత్థ. ఇతరేసం పఞ్చవోకారానం తేసం తత్థ మనాయతనఞ్చ నిరుజ్ఝిస్సతి రూపాయతనఞ్చ నిరుజ్ఝిత్థ.

(క) యస్స యత్థ రూపాయతనం నిరుజ్ఝిత్థ తస్స తత్థ ధమ్మాయతనం నిరుజ్ఝిస్సతీతి?

పఞ్చవోకారే పరినిబ్బన్తానం తేసం తత్థ రూపాయతనం నిరుజ్ఝిత్థ, నో చ తేసం తత్థ ధమ్మాయతనం నిరుజ్ఝిస్సతి. ఇతరేసం పఞ్చవోకారానం అసఞ్ఞసత్తానం తేసం తత్థ రూపాయతనఞ్చ నిరుజ్ఝిత్థ ధమ్మాయతనఞ్చ నిరుజ్ఝిస్సతి.

(ఖ) యస్స వా పన యత్థ ధమ్మాయతనం నిరుజ్ఝిస్సతి తస్స తత్థ రూపాయతనం నిరుజ్ఝిత్థాతి?

సుద్ధావాసం ఉపపజ్జన్తానం అరూపానం తేసం తత్థ ధమ్మాయతనం నిరుజ్ఝిస్సతి, నో చ తేసం తత్థ రూపాయతనం నిరుజ్ఝిత్థ. ఇతరేసం పఞ్చవోకారానం అసఞ్ఞసత్తానం తేసం తత్థ ధమ్మాయతనఞ్చ నిరుజ్ఝిస్సతి రూపాయతనఞ్చ నిరుజ్ఝిత్థ. (రూపాయతనమూలకం)

౧౯౨. (క) యస్స యత్థ మనాయతనం నిరుజ్ఝిత్థ తస్స తత్థ ధమ్మాయతనం నిరుజ్ఝిస్సతీతి?

పరినిబ్బన్తానం తేసం తత్థ మనాయతనం నిరుజ్ఝిత్థ, నో చ తేసం తత్థ ధమ్మాయతనం నిరుజ్ఝిస్సతి. ఇతరేసం చతువోకారానం పఞ్చవోకారానం తేసం తత్థ మనాయతనఞ్చ నిరుజ్ఝిత్థ ధమ్మాయతనఞ్చ నిరుజ్ఝిస్సతి.

(ఖ) యస్స వా పన యత్థ ధమ్మాయతనం నిరుజ్ఝిస్సతి తస్స తత్థ మనాయతనం నిరుజ్ఝిత్థాతి?

సుద్ధావాసం ఉపపజ్జన్తానం అసఞ్ఞసత్తానం తేసం తత్థ ధమ్మాయతనం నిరుజ్ఝిస్సతి, నో చ తేసం తత్థ మనాయతనం నిరుజ్ఝిత్థ. ఇతరేసం చతువోకారానం పఞ్చవోకారానం తేసం తత్థ ధమ్మాయతనఞ్చ నిరుజ్ఝిస్సతి మనాయతనఞ్చ నిరుజ్ఝిత్థ.

(ఘ) పచ్చనీకపుగ్గలో

౧౯౩. (క) యస్స చక్ఖాయతనం న నిరుజ్ఝిత్థ తస్స సోతాయతనం న నిరుజ్ఝిస్సతీతి? నత్థి.

(ఖ) యస్స వా పన సోతాయతనం న నిరుజ్ఝిస్సతి తస్స చక్ఖాయతనం న నిరుజ్ఝిత్థాతి? నిరుజ్ఝిత్థ.

యస్స చక్ఖాయతనం…పే… ఘానాయతనం… రూపాయతనం… మనాయతనం న నిరుజ్ఝిత్థ తస్స ధమ్మాయతనం న నిరుజ్ఝిస్సతీతి? నత్థి.

యస్స వా పన ధమ్మాయతనం న నిరుజ్ఝిస్సతి తస్స మనాయతనం న నిరుజ్ఝిత్థాతి? నిరుజ్ఝిత్థ.

(ఙ) పచ్చనీకఓకాసో

౧౯౪. యస్స చక్ఖాయతనం న నిరుజ్ఝిత్థ…పే….

(చ) పచ్చనీకపుగ్గలోకాసా

౧౯౫. (క) యస్స యత్థ చక్ఖాయతనం న నిరుజ్ఝిత్థ తస్స తత్థ సోతాయతనం న నిరుజ్ఝిస్సతీతి?

సుద్ధావాసం ఉపపజ్జన్తానం తేసం తత్థ చక్ఖాయతనం న నిరుజ్ఝిత్థ, నో చ తేసం తత్థ సోతాయతనం న నిరుజ్ఝిస్సతి. సుద్ధావాసే పరినిబ్బన్తానం అసఞ్ఞసత్తానం అరూపానం తేసం తత్థ చక్ఖాయతనఞ్చ న నిరుజ్ఝిత్థ సోతాయతనఞ్చ న నిరుజ్ఝిస్సతి.

(ఖ) యస్స వా పన యత్థ సోతాయతనం న నిరుజ్ఝిస్సతి తస్స తత్థ చక్ఖాయతనం న నిరుజ్ఝిత్థాతి?

పఞ్చవోకారే పరినిబ్బన్తానం తేసం తత్థ సోతాయతనం న నిరుజ్ఝిస్సతి, నో చ తేసం తత్థ చక్ఖాయతనం న నిరుజ్ఝిత్థ. సుద్ధావాసే పరినిబ్బన్తానం అసఞ్ఞసత్తానం అరూపానం తేసం తత్థ సోతాయతనఞ్చ న నిరుజ్ఝిస్సతి చక్ఖాయతనఞ్చ న నిరుజ్ఝిత్థ.

(క) యస్స యత్థ చక్ఖాయతనం న నిరుజ్ఝిత్థ తస్స తత్థ ఘానాయతనం న నిరుజ్ఝిస్సతీతి? ఆమన్తా.

(ఖ) యస్స వా పన యత్థ ఘానాయతనం న నిరుజ్ఝిస్సతి తస్స తత్థ చక్ఖాయతనం న నిరుజ్ఝిత్థాతి?

కామావచరే పరినిబ్బన్తానం రూపావచరానం తేసం తత్థ ఘానాయతనం న నిరుజ్ఝిస్సతి, నో చ తేసం తత్థ చక్ఖాయతనం న నిరుజ్ఝిత్థ. సుద్ధావాసానం అసఞ్ఞసత్తానం అరూపానం తేసం తత్థ ఘానాయతనఞ్చ న నిరుజ్ఝిస్సతి చక్ఖాయతనఞ్చ న నిరుజ్ఝిత్థ.

(క) యస్స యత్థ చక్ఖాయతనం న నిరుజ్ఝిత్థ తస్స తత్థ రూపాయతనం న నిరుజ్ఝిస్సతీతి?

సుద్ధావాసం ఉపపజ్జన్తానం అసఞ్ఞసత్తానం తేసం తత్థ చక్ఖాయతనం న నిరుజ్ఝిత్థ, నో చ తేసం తత్థ రూపాయతనం న నిరుజ్ఝిస్సతి. సుద్ధావాసే పరినిబ్బన్తానం అరూపానం తేసం తత్థ చక్ఖాయతనఞ్చ న నిరుజ్ఝిత్థ రూపాయతనఞ్చ న నిరుజ్ఝిస్సతి.

(ఖ) యస్స వా పన యత్థ రూపాయతనం న నిరుజ్ఝిస్సతి తస్స తత్థ చక్ఖాయతనం న నిరుజ్ఝిత్థాతి?

పఞ్చవోకారే పరినిబ్బన్తానం తేసం తత్థ రూపాయతనం న నిరుజ్ఝిస్సతి, నో చ తేసం తత్థ చక్ఖాయతనం న నిరుజ్ఝిత్థ. సుద్ధావాసే పరినిబ్బన్తానం అరూపానం తేసం తత్థ రూపాయతనఞ్చ న నిరుజ్ఝిస్సతి చక్ఖాయతనఞ్చ న నిరుజ్ఝిత్థ.

(క) యస్స యత్థ చక్ఖాయతనం న నిరుజ్ఝిత్థ తస్స తత్థ మనాయతనం న నిరుజ్ఝిస్సతీతి?

సుద్ధావాసం ఉపపజ్జన్తానం అరూపానం తేసం తత్థ చక్ఖాయతనం న నిరుజ్ఝిత్థ, నో చ తేసం తత్థ మనాయతనం న నిరుజ్ఝిస్సతి. సుద్ధావాసే పరినిబ్బన్తానం అరూపే పరినిబ్బన్తానం అసఞ్ఞసత్తానం తేసం తత్థ చక్ఖాయతనఞ్చ న నిరుజ్ఝిత్థ మనాయతనఞ్చ న నిరుజ్ఝిస్సతి.

(ఖ) యస్స వా పన యత్థ మనాయతనం న నిరుజ్ఝిస్సతి తస్స తత్థ చక్ఖాయతనం న నిరుజ్ఝిత్థాతి?

పఞ్చవోకారే పరినిబ్బన్తానం తేసం తత్థ మనాయతనం న నిరుజ్ఝిస్సతి, నో చ తేసం తత్థ చక్ఖాయతనం న నిరుజ్ఝిత్థ. సుద్ధావాసే పరినిబ్బన్తానం అరూపే పరినిబ్బన్తానం అసఞ్ఞసత్తానం తేసం తత్థ మనాయతనఞ్చ న నిరుజ్ఝిస్సతి, చక్ఖాయతనఞ్చ న నిరుజ్ఝిత్థ.

(క) యస్స యత్థ చక్ఖాయతనం న నిరుజ్ఝిత్థ తస్స తత్థ ధమ్మాయతనం న నిరుజ్ఝిస్సతీతి?

సుద్ధావాసం ఉపపజ్జన్తానం అసఞ్ఞసత్తానం అరూపానం తేసం తత్థ చక్ఖాయతనం న నిరుజ్ఝిత్థ, నో చ తేసం తత్థ ధమ్మాయతనం న నిరుజ్ఝిస్సతి. సుద్ధావాసే పరినిబ్బన్తానం అరూపే పరినిబ్బన్తానం తేసం తత్థ చక్ఖాయతనఞ్చ న నిరుజ్ఝిత్థ ధమ్మాయతనఞ్చ న నిరుజ్ఝిస్సతి.

(ఖ) యస్స వా పన యత్థ ధమ్మాయతనం న నిరుజ్ఝిస్సతి తస్స తత్థ చక్ఖాయతనం న నిరుజ్ఝిత్థాతి?

పఞ్చవోకారే పరినిబ్బన్తానం తేసం తత్థ ధమ్మాయతనం న నిరుజ్ఝిస్సతి, నో చ తేసం తత్థ చక్ఖాయతనం న నిరుజ్ఝిత్థ. సుద్ధావాసే పరినిబ్బన్తానం అరూపే పరినిబ్బన్తానం తేసం తత్థ ధమ్మాయతనఞ్చ న నిరుజ్ఝిస్సతి చక్ఖాయతనఞ్చ న నిరుజ్ఝిత్థ. (చక్ఖాయతనమూలకం)

౧౯౬. (క) యస్స యత్థ ఘానాయతనం న నిరుజ్ఝిత్థ తస్స తత్థ రూపాయతనం న నిరుజ్ఝిస్సతీతి?

రూపావచరానం తేసం తత్థ ఘానాయతనం న నిరుజ్ఝిత్థ, నో చ తేసం తత్థ రూపాయతనం న నిరుజ్ఝిస్సతి. రూపావచరే పరినిబ్బన్తానం అరూపానం తేసం తత్థ ఘానాయతనఞ్చ న నిరుజ్ఝిత్థ రూపాయతనఞ్చ న నిరుజ్ఝిస్సతి.

(ఖ) యస్స వా పన యత్థ రూపాయతనం న నిరుజ్ఝిస్సతి తస్స తత్థ ఘానాయతనం న నిరుజ్ఝిత్థాతి?

కామావచరే పరినిబ్బన్తానం తేసం తత్థ రూపాయతనం న నిరుజ్ఝిస్సతి, నో చ తేసం తత్థ ఘానాయతనం న నిరుజ్ఝిత్థ. రూపావచరే పరినిబ్బన్తానం అరూపానం తేసం తత్థ రూపాయతనఞ్చ న నిరుజ్ఝిస్సతి ఘానాయతనఞ్చ న నిరుజ్ఝిత్థ.

(క) యస్స యత్థ ఘానాయతనం న నిరుజ్ఝిత్థ తస్స తత్థ మనాయతనం న నిరుజ్ఝిస్సతీతి?

రూపావచరానం అరూపావచరానం తేసం తత్థ ఘానాయతనం న నిరుజ్ఝిత్థ, నో చ తేసం తత్థ మనాయతనం న నిరుజ్ఝిస్సతి. రూపావచరే అరూపావచరే పరినిబ్బన్తానం అసఞ్ఞసత్తానం తేసం తత్థ ఘానాయతనఞ్చ న నిరుజ్ఝిత్థ మనాయతనఞ్చ న నిరుజ్ఝిస్సతి.

(ఖ) యస్స వా పన యత్థ మనాయతనం న నిరుజ్ఝిస్సతి తస్స తత్థ ఘానాయతనం న నిరుజ్ఝిత్థాతి?

కామావచరే పరినిబ్బన్తానం తేసం తత్థ మనాయతనం న నిరుజ్ఝిస్సతి, నో చ తేసం తత్థ ఘానాయతనం న నిరుజ్ఝిత్థ. రూపావచరే అరూపావచరే పరినిబ్బన్తానం అసఞ్ఞసత్తానం తేసం తత్థ మనాయతనఞ్చ న నిరుజ్ఝిస్సతి ఘానాయతనఞ్చ న నిరుజ్ఝిత్థ.

(క) యస్స యత్థ ఘానాయతనం న నిరుజ్ఝిత్థ తస్స తత్థ ధమ్మాయతనం న నిరుజ్ఝిస్సతీతి?

రూపావచరానం అరూపావచరానం తేసం తత్థ ఘానాయతనం న నిరుజ్ఝిత్థ, నో చ తేసం తత్థ ధమ్మాయతనం న నిరుజ్ఝిస్సతి. రూపావచరే అరూపావచరే పరినిబ్బన్తానం తేసం తత్థ ఘానాయతనఞ్చ న నిరుజ్ఝిత్థ ధమ్మాయతనఞ్చ న నిరుజ్ఝిస్సతి.

(ఖ) యస్స వా పన యత్థ ధమ్మాయతనం న నిరుజ్ఝిస్సతి తస్స తత్థ ఘానాయతనం న నిరుజ్ఝిత్థాతి?

కామావచరే పరినిబ్బన్తానం తేసం తత్థ ధమ్మాయతనం న నిరుజ్ఝిస్సతి, నో చ తేసం తత్థ ఘానాయతనం న నిరుజ్ఝిత్థ. రూపావచరే అరూపావచరే పరినిబ్బన్తానం తేసం తత్థ ధమ్మాయతనఞ్చ న నిరుజ్ఝిస్సతి ఘానాయతనఞ్చ న నిరుజ్ఝిత్థ. (ఘానాయతనమూలకం)

౧౯౭. (క) యస్స యత్థ రూపాయతనం న నిరుజ్ఝిత్థ తస్స తత్థ మనాయతనం న నిరుజ్ఝిస్సతీతి?

సుద్ధావాసం ఉపపజ్జన్తానం అరూపానం తేసం తత్థ రూపాయతనం న నిరుజ్ఝిత్థ, నో చ తేసం తత్థ మనాయతనం న నిరుజ్ఝిస్సతి. సుద్ధావాసే పరినిబ్బన్తానం అరూపే పరినిబ్బన్తానం తేసం తత్థ రూపాయతనఞ్చ న నిరుజ్ఝిత్థ మనాయతనఞ్చ న నిరుజ్ఝిస్సతి.

(ఖ) యస్స వా పన యత్థ మనాయతనం న నిరుజ్ఝిస్సతి తస్స తత్థ రూపాయతనం న నిరుజ్ఝిత్థాతి?

పఞ్చవోకారే పరినిబ్బన్తానం అసఞ్ఞసత్తానం తేసం తత్థ మనాయతనం న నిరుజ్ఝిస్సతి, నో చ తేసం తత్థ రూపాయతనం న నిరుజ్ఝిత్థ. సుద్ధావాసే పరినిబ్బన్తానం అరూపే పరినిబ్బన్తానం తేసం తత్థ మనాయతనఞ్చ న నిరుజ్ఝిస్సతి రూపాయతనఞ్చ న నిరుజ్ఝిత్థ.

(క) యస్స యత్థ రూపాయతనం న నిరుజ్ఝిత్థ తస్స తత్థ ధమ్మాయతనం న నిరుజ్ఝిస్సతీతి?

సుద్ధావాసం ఉపపజ్జన్తానం అరూపానం తేసం తత్థ రూపాయతనం న నిరుజ్ఝిత్థ, నో చ తేసం తత్థ ధమ్మాయతనం న నిరుజ్ఝిస్సతి. సుద్ధావాసే పరినిబ్బన్తానం అరూపే పరినిబ్బన్తానం తేసం తత్థ రూపాయతనఞ్చ న నిరుజ్ఝిత్థ ధమ్మాయతనఞ్చ న నిరుజ్ఝిస్సతి.

(ఖ) యస్స వా పన యత్థ ధమ్మాయతనం న నిరుజ్ఝిస్సతి తస్స తత్థ రూపాయతనం న నిరుజ్ఝిత్థాతి?

పఞ్చవోకారే పరినిబ్బన్తానం తేసం తత్థ ధమ్మాయతనం న నిరుజ్ఝిస్సతి, నో చ తేసం తత్థ రూపాయతనం న నిరుజ్ఝిత్థ. సుద్ధావాసే పరినిబ్బన్తానం అరూపే పరినిబ్బన్తానం తేసం తత్థ ధమ్మాయతనఞ్చ న నిరుజ్ఝిస్సతి రూపాయతనఞ్చ న నిరుజ్ఝిత్థ. (రూపాయతనమూలకం)

౧౯౮. (క) యస్స యత్థ మనాయతనం న నిరుజ్ఝిత్థ తస్స తత్థ ధమ్మాయతనం న నిరుజ్ఝిస్సతీతి?

సుద్ధావాసం ఉపపజ్జన్తానం అసఞ్ఞసత్తానం తేసం తత్థ మనాయతనం న నిరుజ్ఝిత్థ, నో చ తేసం తత్థ ధమ్మాయతనం న నిరుజ్ఝిస్సతి. సుద్ధావాసే పరినిబ్బన్తానం తేసం తత్థ మనాయతనఞ్చ న నిరుజ్ఝిత్థ ధమ్మాయతనఞ్చ న నిరుజ్ఝిస్సతి.

(ఖ) యస్స వా పన యత్థ ధమ్మాయతనం న నిరుజ్ఝిస్సతి తస్స తత్థ మనాయతనం న నిరుజ్ఝిత్థాతి?

పరినిబ్బన్తానం తేసం తత్థ ధమ్మాయతనం న నిరుజ్ఝిస్సతి, నో చ తేసం తత్థ మనాయతనం న నిరుజ్ఝిత్థ. సుద్ధావాసే పరినిబ్బన్తానం తేసం తత్థ ధమ్మాయతనఞ్చ న నిరుజ్ఝిస్సతి మనాయతనఞ్చ న నిరుజ్ఝిత్థ.

నిరోధవారో.