(౧) పచ్చుప్పన్నవారో
(క) అనులోమపుగ్గలో
౧౮. (క) యస్స చక్ఖాయతనం ఉప్పజ్జతి తస్స సోతాయతనం ఉప్పజ్జతీతి?
సచక్ఖుకానం అసోతకానం ఉపపజ్జన్తానం తేసం చక్ఖాయతనం ఉప్పజ్జతి, నో చ తేసం సోతాయతనం ఉప్పజ్జతి. సచక్ఖుకానం ససోతకానం ఉపపజ్జన్తానం తేసం చక్ఖాయతనఞ్చ ఉప్పజ్జతి సోతాయతనఞ్చ ఉప్పజ్జతి.
(ఖ) యస్స వా పన సోతాయతనం ఉప్పజ్జతి తస్స చక్ఖాయతనం ఉప్పజ్జతీతి?
ససోతకానం అచక్ఖుకానం ఉపపజ్జన్తానం తేసం సోతాయతనం ఉప్పజ్జతి, నో చ తేసం చక్ఖాయతనం ఉప్పజ్జతి. ససోతకానం సచక్ఖుకానం ఉపపజ్జన్తానం తేసం సోతాయతనఞ్చ ఉప్పజ్జతి చక్ఖాయతనఞ్చ ఉప్పజ్జతి.
(క) యస్స చక్ఖాయతనం ఉప్పజ్జతి తస్స ఘానాయతనం ఉప్పజ్జతీతి?
సచక్ఖుకానం అఘానకానం ఉపపజ్జన్తానం తేసం చక్ఖాయతనం ఉప్పజ్జతి, నో చ తేసం ఘానాయతనం ఉప్పజ్జతి. సచక్ఖుకానం సఘానకానం ఉపపజ్జన్తానం తేసం చక్ఖాయతనఞ్చ ఉప్పజ్జతి ఘానాయతనఞ్చ ఉప్పజ్జతి.
(ఖ) యస్స వా పన ఘానాయతనం ఉప్పజ్జతి తస్స చక్ఖాయతనం ఉప్పజ్జతీతి?
సఘానకానం అచక్ఖుకానం ఉపపజ్జన్తానం తేసం ఘానాయతనం ఉప్పజ్జతి, నో చ తేసం చక్ఖాయతనం ఉప్పజ్జతి. సఘానకానం సచక్ఖుకానం ఉపపజ్జన్తానం తేసం ఘానాయతనఞ్చ ఉప్పజ్జతి చక్ఖాయతనఞ్చ ఉప్పజ్జతి.
(క) యస్స చక్ఖాయతనం ఉప్పజ్జతి తస్స రూపాయతనం ఉప్పజ్జతీతి? ఆమన్తా.
(ఖ) యస్స వా పన రూపాయతనం ఉప్పజ్జతి తస్స చక్ఖాయతనం ఉప్పజ్జతీతి?
సరూపకానం అచక్ఖుకానం ఉపపజ్జన్తానం తేసం రూపాయతనం ఉప్పజ్జతి, నో చ తేసం చక్ఖాయతనం ఉప్పజ్జతి. సచక్ఖుకానం ఉపపజ్జన్తానం తేసం రూపాయతనఞ్చ ఉప్పజ్జతి చక్ఖాయతనఞ్చ ఉప్పజ్జతి.
(క) యస్స చక్ఖాయతనం ఉప్పజ్జతి తస్స మనాయతనం ఉప్పజ్జతీతి? ఆమన్తా.
(ఖ) యస్స వా పన మనాయతనం ఉప్పజ్జతి తస్స చక్ఖాయతనం ఉప్పజ్జతీతి?
సచిత్తకానం అచక్ఖుకానం ఉపపజ్జన్తానం తేసం మనాయతనం ఉప్పజ్జతి, నో చ తేసం చక్ఖాయతనం ఉప్పజ్జతి. సచక్ఖుకానం ఉపపజ్జన్తానం తేసం మనాయతనఞ్చ ఉప్పజ్జతి చక్ఖాయతనఞ్చ ఉప్పజ్జతి.
(క) యస్స చక్ఖాయతనం ఉప్పజ్జతి తస్స ధమ్మాయతనం ఉప్పజ్జతీతి? ఆమన్తా.
(ఖ) యస్స వా పన ధమ్మాయతనం ఉప్పజ్జతి తస్స చక్ఖాయతనం ఉప్పజ్జతీతి?
అచక్ఖుకానం ఉపపజ్జన్తానం తేసం ధమ్మాయతనం ఉప్పజ్జతి, నో చ తేసం చక్ఖాయతనం ఉప్పజ్జతి. సచక్ఖుకానం ఉపపజ్జన్తానం తేసం ధమ్మాయతనఞ్చ ఉప్పజ్జతి చక్ఖాయతనఞ్చ ఉప్పజ్జతి. (చక్ఖాయతనమూలకం)
౧౯. (క) యస్స ఘానాయతనం ఉప్పజ్జతి తస్స రూపాయతనం ఉప్పజ్జతీతి? ఆమన్తా.
(ఖ) యస్స వా పన రూపాయతనం ఉప్పజ్జతి తస్స ఘానాయతనం ఉప్పజ్జతీతి?
సరూపకానం అఘానకానం ఉపపజ్జన్తానం తేసం రూపాయతనం ఉప్పజ్జతి, నో చ తేసం ఘానాయతనం ఉప్పజ్జతి. సఘానకానం ఉపపజ్జన్తానం తేసం రూపాయతనఞ్చ ఉప్పజ్జతి ఘానాయతనఞ్చ ఉప్పజ్జతి.
(క) యస్స ఘానాయతనం ఉప్పజ్జతి తస్స మనాయతనం ఉప్పజ్జతీతి? ఆమన్తా.
(ఖ) యస్స వా పన మనాయతనం ఉప్పజ్జతి తస్స ఘానాయతనం ఉప్పజ్జతీతి?
సచిత్తకానం అఘానకానం ఉపపజ్జన్తానం తేసం మనాయతనం ఉప్పజ్జతి, నో చ తేసం ఘానాయతనం ఉప్పజ్జతి. సఘానకానం ఉపపజ్జన్తానం తేసం మనాయతనఞ్చ ఉప్పజ్జతి ఘానాయతనఞ్చ ఉప్పజ్జతి.
(క) యస్స ఘానాయతనం ఉప్పజ్జతి తస్స ధమ్మాయతనం ఉప్పజ్జతీతి? ఆమన్తా.
(ఖ) యస్స వా పన ధమ్మాయతనం ఉప్పజ్జతి తస్స ఘానాయతనం ఉప్పజ్జతీతి?
అఘానకానం ఉపపజ్జన్తానం తేసం ధమ్మాయతనం ఉప్పజ్జతి, నో చ తేసం ఘానాయతనం ఉప్పజ్జతి. సఘానకానం ఉపపజ్జన్తానం తేసం ధమ్మాయతనఞ్చ ఉప్పజ్జతి ఘానాయతనఞ్చ ఉప్పజ్జతి. (ఘానాయతనమూలకం)
౨౦. (క) యస్స రూపాయతనం ఉప్పజ్జతి తస్స మనాయతనం ఉప్పజ్జతీతి?
అచిత్తకానం ఉపపజ్జన్తానం తేసం రూపాయతనం ఉప్పజ్జతి, నో చ తేసం మనాయతనం ఉప్పజ్జతి. సరూపకానం సచిత్తకానం ఉపపజ్జన్తానం తేసం రూపాయతనఞ్చ ఉప్పజ్జతి మనాయతనఞ్చ ఉప్పజ్జతి.
(ఖ) యస్స వా పన మనాయతనం ఉప్పజ్జతి తస్స రూపాయతనం ఉప్పజ్జతీతి?
అరూపకానం ఉపపజ్జన్తానం తేసం మనాయతనం ఉప్పజ్జతి, నో చ తేసం రూపాయతనం ఉప్పజ్జతి. సచిత్తకానం సరూపకానం ఉపపజ్జన్తానం తేసం మనాయతనఞ్చ ఉప్పజ్జతి రూపాయతనఞ్చ ఉప్పజ్జతి.
(క) యస్స రూపాయతనం ఉప్పజ్జతి తస్స ధమ్మాయతనం ఉప్పజ్జతీతి? ఆమన్తా.
(ఖ) యస్స వా పన ధమ్మాయతనం ఉప్పజ్జతి తస్స రూపాయతనం ఉప్పజ్జతీతి?
అరూపకానం ఉపపజ్జన్తానం తేసం ధమ్మాయతనం ఉప్పజ్జతి, నో చ తేసం రూపాయతనం ఉప్పజ్జతి. సరూపకానం ఉపపజ్జన్తానం తేసం ధమ్మాయతనఞ్చ ఉప్పజ్జతి రూపాయతనఞ్చ ఉప్పజ్జతి. (రూపాయతనమూలకం)
౨౧. (క) యస్స మనాయతనం ఉప్పజ్జతి తస్స ధమ్మాయతనం ఉప్పజ్జతీతి? ఆమన్తా.
(ఖ) యస్స వా పన ధమ్మాయతనం ఉప్పజ్జతి తస్స మనాయతనం ఉప్పజ్జతీతి?
అచిత్తకానం ఉపపజ్జన్తానం తేసం ధమ్మాయతనం ఉప్పజ్జతి, నో చ తేసం మనాయతనం ఉప్పజ్జతి. సచిత్తకానం ఉపపజ్జన్తానం తేసం ధమ్మాయతనఞ్చ ఉప్పజ్జతి మనాయతనఞ్చ ఉప్పజ్జతి. (మనాయతనమూలకం)
(ఖ) అనులోమఓకాసో
౨౨. (క) యత్థ చక్ఖాయతనం ఉప్పజ్జతి తత్థ సోతాయతనం ఉప్పజ్జతీతి? ఆమన్తా.
(ఖ) యత్థ వా పన సోతాయతనం ఉప్పజ్జతి తత్థ చక్ఖాయతనం ఉప్పజ్జతీతి? ఆమన్తా.
(క) యత్థ చక్ఖాయతనం ఉప్పజ్జతి తత్థ ఘానాయతనం ఉప్పజ్జతీతి?
రూపావచరే తత్థ చక్ఖాయతనం ఉప్పజ్జతి, నో చ తత్థ ఘానాయతనం ఉప్పజ్జతి. కామావచరే తత్థ చక్ఖాయతనఞ్చ ఉప్పజ్జతి ఘానాయతనఞ్చ ఉప్పజ్జతి.
(ఖ) యత్థ వా పన ఘానాయతనం ఉప్పజ్జతి తత్థ చక్ఖాయతనం ఉప్పజ్జతీతి? ఆమన్తా.
(క) యత్థ చక్ఖాయతనం ఉప్పజ్జతి తత్థ రూపాయతనం ఉప్పజ్జతీతి? ఆమన్తా.
(ఖ) యత్థ వా పన రూపాయతనం ఉప్పజ్జతి తత్థ చక్ఖాయతనం ఉప్పజ్జతీతి?
అసఞ్ఞసత్తే తత్థ రూపాయతనం ఉప్పజ్జతి, నో చ తత్థ చక్ఖాయతనం ఉప్పజ్జతి. పఞ్చవోకారే తత్థ రూపాయతనఞ్చ ఉప్పజ్జతి చక్ఖాయతనఞ్చ ఉప్పజ్జతి.
(క) యత్థ చక్ఖాయతనం ఉప్పజ్జతి తత్థ మనాయతనం ఉప్పజ్జతీతి? ఆమన్తా.
(ఖ) యత్థ వా పన మనాయతనం ఉప్పజ్జతి తత్థ చక్ఖాయతనం ఉప్పజ్జతీతి?
అరూపే తత్థ మనాయతనం ఉప్పజ్జతి, నో చ తత్థ చక్ఖాయతనం ఉప్పజ్జతి. పఞ్చవోకారే తత్థ మనాయతనఞ్చ ఉప్పజ్జతి చక్ఖాయతనఞ్చ ఉప్పజ్జతి.
(క) యత్థ చక్ఖాయతనం ఉప్పజ్జతి తత్థ ధమ్మాయతనం ఉప్పజ్జతీతి? ఆమన్తా.
(ఖ) యత్థ వా పన ధమ్మాయతనం ఉప్పజ్జతి తత్థ చక్ఖాయతనం ఉప్పజ్జతీతి?
అసఞ్ఞసత్తే అరూపే తత్థ ధమ్మాయతనం ఉప్పజ్జతి, నో చ తత్థ చక్ఖాయతనం ఉప్పజ్జతి. పఞ్చవోకారే తత్థ ధమ్మాయతనఞ్చ ఉప్పజ్జతి చక్ఖాయతనఞ్చ ఉప్పజ్జతి. (చక్ఖాయతనమూలకం)
౨౩. (క) యత్థ ఘానాయతనం ఉప్పజ్జతి తత్థ రూపాయతనం ఉప్పజ్జతీతి? ఆమన్తా.
(ఖ) యత్థ వా పన రూపాయతనం ఉప్పజ్జతి తత్థ ఘానాయతనం ఉప్పజ్జతీతి?
రూపావచరే తత్థ రూపాయతనం ఉప్పజ్జతి, నో చ తత్థ ఘానాయతనం ఉప్పజ్జతి. కామావచరే తత్థ రూపాయతనఞ్చ ఉప్పజ్జతి ఘానాయతనఞ్చ ఉప్పజ్జతి.
(యత్థ ఘానాయతనం ఉప్పజ్జతి తత్థ మనాయతనం ధమ్మాయతనఞ్చ ఏకసదిసం, నానం నత్థి, ఉపరి పన వారసఙ్ఖేపో [ఉపరివారే సఙ్ఖేపో (స్యా.), ఉపరివారే సఙ్ఖేపం (సీ. క.)] తీతి జానితబ్బం.)
(క) యత్థ ఘానాయతనం ఉప్పజ్జతి తత్థ ధమ్మాయతనం ఉప్పజ్జతీతి? ఆమన్తా.
(ఖ) యత్థ వా పన ధమ్మాయతనం ఉప్పజ్జతి తత్థ ఘానాయతనం ఉప్పజ్జతీతి?
రూపావచరే అరూపావచరే తత్థ ధమ్మాయతనం ఉప్పజ్జతి, నో చ తత్థ ఘానాయతనం ఉప్పజ్జతి. కామావచరే తత్థ ధమ్మాయతనఞ్చ ఉప్పజ్జతి ఘానాయతనఞ్చ ఉప్పజ్జతి. (ఘానాయతనమూలకం)
౨౪. (క) యత్థ రూపాయతనం ఉప్పజ్జతి తత్థ మనాయతనం ఉప్పజ్జతీతి?
అసఞ్ఞసత్తే తత్థ రూపాయతనం ఉప్పజ్జతి, నో చ తత్థ మనాయతనం ఉప్పజ్జతి. పఞ్చవోకారే తత్థ రూపాయతనఞ్చ ఉప్పజ్జతి మనాయతనఞ్చ ఉప్పజ్జతి.
(ఖ) యత్థ వా పన మనాయతనం ఉప్పజ్జతి తత్థ రూపాయతనం ఉప్పజ్జతీతి?
అరూపే తత్థ మనాయతనం ఉప్పజ్జతి, నో చ తత్థ రూపాయతనం ఉప్పజ్జతి. పఞ్చవోకారే తత్థ మనాయతనఞ్చ ఉప్పజ్జతి రూపాయతనఞ్చ ఉప్పజ్జతి.
(క) యత్థ రూపాయతనం ఉప్పజ్జతి తత్థ ధమ్మాయతనం ఉప్పజ్జతీతి? ఆమన్తా.
(ఖ) యత్థ వా పన ధమ్మాయతనం ఉప్పజ్జతి తత్థ రూపాయతనం ఉప్పజ్జతీతి?
అరూపే తత్థ ధమ్మాయతనం ఉప్పజ్జతి, నో చ తత్థ రూపాయతనం ఉప్పజ్జతి. పఞ్చవోకారే అసఞ్ఞసత్తే తత్థ ధమ్మాయతనఞ్చ ఉప్పజ్జతి రూపాయతనఞ్చ ఉప్పజ్జతి. (రూపాయతనమూలకం)
౨౫. (క) యత్థ మనాయతనం ఉప్పజ్జతి తత్థ ధమ్మాయతనం ఉప్పజ్జతీతి? ఆమన్తా.
(ఖ) యత్థ వా పన ధమ్మాయతనం ఉప్పజ్జతి తత్థ మనాయతనం ఉప్పజ్జతీతి?
అసఞ్ఞసత్తే తత్థ ధమ్మాయతనం ఉప్పజ్జతి, నో చ తత్థ మనాయతనం ఉప్పజ్జతి. చతువోకారే పఞ్చవోకారే తత్థ ధమ్మాయతనఞ్చ ఉప్పజ్జతి మనాయతనఞ్చ ఉప్పజ్జతి. (మనాయతనమూలకం)
(గ) అనులోమపుగ్గలోకాసా
౨౬. (క) యస్స యత్థ చక్ఖాయతనం ఉప్పజ్జతి తస్స తత్థ సోతాయతనం ఉప్పజ్జతీతి?
సచక్ఖుకానం అసోతకానం ఉపపజ్జన్తానం తేసం తత్థ చక్ఖాయతనం ఉప్పజ్జతి, నో చ తేసం తత్థ సోతాయతనం ఉప్పజ్జతి. సచక్ఖుకానం ససోతకానం ఉపపజ్జన్తానం తేసం తత్థ చక్ఖాయతనఞ్చ ఉప్పజ్జతి సోతాయతనఞ్చ ఉప్పజ్జతి.
(ఖ) యస్స వా పన యత్థ సోతాయతనం ఉప్పజ్జతి తస్స తత్థ చక్ఖాయతనం ఉప్పజ్జతీతి?
ససోతకానం అచక్ఖుకానం ఉపపజ్జన్తానం తేసం తత్థ సోతాయతనం ఉప్పజ్జతి, నో చ తేసం తత్థ చక్ఖాయతనం ఉప్పజ్జతి. ససోతకానం సచక్ఖుకానం ఉపపజ్జన్తానం తేసం తత్థ సోతాయతనఞ్చ ఉప్పజ్జతి చక్ఖాయతనఞ్చ ఉప్పజ్జతి (సంఖిత్తం యస్సకసదిసం [యస్సకమ్పి సదిసం (సీ.), యస్సేకసదిసం (స్యా.)] ).
౨౭. (క) యస్స యత్థ మనాయతనం ఉప్పజ్జతి తస్స తత్థ ధమ్మాయతనం ఉప్పజ్జతీతి? ఆమన్తా.
(ఖ) యస్స వా పన యత్థ ధమ్మాయతనం ఉప్పజ్జతి తస్స తత్థ మనాయతనం ఉప్పజ్జతీతి?
అచిత్తకానం ఉపపజ్జన్తానం తేసం తత్థ ధమ్మాయతనం ఉప్పజ్జతి, నో చ తేసం తత్థ మనాయతనం ఉప్పజ్జతి. సచిత్తకానం ఉపపజ్జన్తానం తేసం తత్థ ధమ్మాయతనఞ్చ ఉప్పజ్జతి మనాయతనఞ్చ ఉప్పజ్జతి.
(ఘ) పచ్చనీకపుగ్గలో
౨౮. (క) యస్స చక్ఖాయతనం నుప్పజ్జతి తస్స సోతాయతనం నుప్పజ్జతీతి?
అచక్ఖుకానం ససోతకానం ఉపపజ్జన్తానం తేసం చక్ఖాయతనం నుప్పజ్జతి, నో చ తేసం సోతాయతనం నుప్పజ్జతి. సబ్బేసం చవన్తానం అచక్ఖుకానం అసోతకానం ఉపపజ్జన్తానం తేసం చక్ఖాయతనఞ్చ నుప్పజ్జతి సోతాయతనఞ్చ నుప్పజ్జతి.
(ఖ) యస్స వా పన సోతాయతనం నుప్పజ్జతి తస్స చక్ఖాయతనం నుప్పజ్జతీతి?
అసోతకానం సచక్ఖుకానం ఉపపజ్జన్తానం తేసం సోతాయతనం నుప్పజ్జతి, నో చ తేసం చక్ఖాయతనం నుప్పజ్జతి. సబ్బేసం చవన్తానం అసోతకానం అచక్ఖుకానం ఉపపజ్జన్తానం తేసం సోతాయతనఞ్చ నుప్పజ్జతి చక్ఖాయతనఞ్చ నుప్పజ్జతి.
(క) యస్స చక్ఖాయతనం నుప్పజ్జతి తస్స ఘానాయతనం నుప్పజ్జతీతి?
అచక్ఖుకానం సఘానకానం ఉపపజ్జన్తానం తేసం చక్ఖాయతనం నుప్పజ్జతి, నో చ తేసం ఘానాయతనం నుప్పజ్జతి. సబ్బేసం చవన్తానం అచక్ఖుకానం అఘానకానం ఉపపజ్జన్తానం తేసం చక్ఖాయతనఞ్చ నుప్పజ్జతి ఘానాయతనఞ్చ నుప్పజ్జతి.
(ఖ) యస్స వా పన ఘానాయతనం నుప్పజ్జతి తస్స చక్ఖాయతనం నుప్పజ్జతీతి?
అఘానకానం సచక్ఖుకానం ఉపపజ్జన్తానం తేసం ఘానాయతనం నుప్పజ్జతి, నో చ తేసం చక్ఖాయతనం నుప్పజ్జతి. సబ్బేసం చవన్తానం అఘానకానం అచక్ఖుకానం ఉపపజ్జన్తానం తేసం ఘానాయతనఞ్చ నుప్పజ్జతి చక్ఖాయతనఞ్చ నుప్పజ్జతి.
(క) యస్స చక్ఖాయతనం నుప్పజ్జతి తస్స రూపాయతనం నుప్పజ్జతీతి?
అచక్ఖుకానం సరూపకానం ఉపపజ్జన్తానం తేసం చక్ఖాయతనం నుప్పజ్జతి, నో చ తేసం రూపాయతనం నుప్పజ్జతి. సబ్బేసం చవన్తానం అరూపకానం ఉపపజ్జన్తానం తేసం చక్ఖాయతనఞ్చ నుప్పజ్జతి రూపాయతనఞ్చ నుప్పజ్జతి.
(ఖ) యస్స వా పన రూపాయతనం నుప్పజ్జతి తస్స చక్ఖాయతనం నుప్పజ్జతీతి? ఆమన్తా.
(క) యస్స చక్ఖాయతనం నుప్పజ్జతి తస్స మనాయతనం నుప్పజ్జతీతి?
అచక్ఖుకానం సచిత్తకానం ఉపపజ్జన్తానం తేసం చక్ఖాయతనం నుప్పజ్జతి, నో చ తేసం మనాయతనం నుప్పజ్జతి. సబ్బేసం చవన్తానం అచిత్తకానం ఉపపజ్జన్తానం తేసం చక్ఖాయతనఞ్చ నుప్పజ్జతి మనాయతనఞ్చ నుప్పజ్జతి.
(ఖ) యస్స వా పన మనాయతనం నుప్పజ్జతి తస్స చక్ఖాయతనం నుప్పజ్జతీతి? ఆమన్తా.
(క) యస్స చక్ఖాయతనం నుప్పజ్జతి తస్స ధమ్మాయతనం నుప్పజ్జతీతి?
అచక్ఖుకానం ఉపపజ్జన్తానం తేసం చక్ఖాయతనం నుప్పజ్జతి, నో చ తేసం ధమ్మాయతనం నుప్పజ్జతి. సబ్బేసం చవన్తానం తేసం చక్ఖాయతనఞ్చ నుప్పజ్జతి ధమ్మాయతనఞ్చ నుప్పజ్జతి.
(ఖ) యస్స వా పన ధమ్మాయతనం నుప్పజ్జతి తస్స చక్ఖాయతనం నుప్పజ్జతీతి? ఆమన్తా. (చక్ఖాయతనమూలకం)
౨౯. (క) యస్స ఘానాయతనం నుప్పజ్జతి తస్స రూపాయతనం నుప్పజ్జతీతి?
అఘానకానం సరూపకానం ఉపపజ్జన్తానం తేసం ఘానాయతనం నుప్పజ్జతి, నో చ తేసం రూపాయతనం నుప్పజ్జతి. సబ్బేసం చవన్తానం అరూపకానం ఉపపజ్జన్తానం తేసం ఘానాయతనఞ్చ నుప్పజ్జతి రూపాయతనఞ్చ నుప్పజ్జతి.
(ఖ) యస్స వా పన రూపాయతనం నుప్పజ్జతి తస్స ఘానాయతనం నుప్పజ్జతీతి? ఆమన్తా.
(క) యస్స ఘానాయతనం నుప్పజ్జతి తస్స మనాయతనం నుప్పజ్జతీతి?
అఘానకానం సచిత్తకానం ఉపపజ్జన్తానం తేసం ఘానాయతనం నుప్పజ్జతి, నో చ తేసం మనాయతనం నుప్పజ్జతి. సబ్బేసం చవన్తానం అచిత్తకానం ఉపపజ్జన్తానం తేసం ఘానాయతనఞ్చ నుప్పజ్జతి మనాయతనఞ్చ నుప్పజ్జతి.
(ఖ) యస్స వా పన మనాయతనం నుప్పజ్జతి తస్స ఘానాయతనం నుప్పజ్జతీతి? ఆమన్తా.
(క) యస్స ఘానాయతనం నుప్పజ్జతి తస్స ధమ్మాయతనం నుప్పజ్జతీతి?
అఘానకానం ఉపపజ్జన్తానం తేసం ఘానాయతనం నుప్పజ్జతి, నో చ తేసం ధమ్మాయతనం నుప్పజ్జతి. సబ్బేసం చవన్తానం తేసం ఘానాయతనఞ్చ నుప్పజ్జతి ధమ్మాయతనఞ్చ నుప్పజ్జతి.
(ఖ) యస్స వా పన ధమ్మాయతనం నుప్పజ్జతి తస్స ఘానాయతనం నుప్పజ్జతీతి? ఆమన్తా. (ఘానాయతనమూలకం)
౩౦. (క) యస్స రూపాయతనం నుప్పజ్జతి తస్స మనాయతనం నుప్పజ్జతీతి?
అరూపకానం ఉపపజ్జన్తానం తేసం రూపాయతనం నుప్పజ్జతి, నో చ తేసం మనాయతనం నుప్పజ్జతి. సబ్బేసం చవన్తానం తేసం రూపాయతనఞ్చ నుప్పజ్జతి మనాయతనఞ్చ నుప్పజ్జతి.
(ఖ) యస్స వా పన మనాయతనం నుప్పజ్జతి తస్స రూపాయతనం నుప్పజ్జతీతి?
అచిత్తకానం ఉపపజ్జన్తానం తేసం మనాయతనం నుప్పజ్జతి, నో చ తేసం రూపాయతనం నుప్పజ్జతి. సబ్బేసం చవన్తానం తేసం మనాయతనఞ్చ నుప్పజ్జతి రూపాయతనఞ్చ నుప్పజ్జతి.
(క) యస్స రూపాయతనం నుప్పజ్జతి తస్స ధమ్మాయతనం నుప్పజ్జతీతి?
అరూపకానం ఉపపజ్జన్తానం తేసం రూపాయతనం నుప్పజ్జతి, నో చ తేసం ధమ్మాయతనం నుప్పజ్జతి. సబ్బేసం చవన్తానం తేసం రూపాయతనఞ్చ నుప్పజ్జతి ధమ్మాయతనఞ్చ నుప్పజ్జతి.
(ఖ) యస్స వా పన ధమ్మాయతనం నుప్పజ్జతి తస్స రూపాయతనం నుప్పజ్జతీతి? ఆమన్తా. (రూపాయతనమూలకం)
౩౧. (క) యస్స మనాయతనం నుప్పజ్జతి తస్స ధమ్మాయతనం నుప్పజ్జతీతి?
అచిత్తకానం ఉపపజ్జన్తానం తేసం మనాయతనం నుప్పజ్జతి, నో చ తేసం ధమ్మాయతనం నుప్పజ్జతి. సబ్బేసం చవన్తానం తేసం మనాయతనఞ్చ నుప్పజ్జతి ధమ్మాయతనఞ్చ నుప్పజ్జతి.
(ఖ) యస్స వా పన ధమ్మాయతనం నుప్పజ్జతి తస్స మనాయతనం నుప్పజ్జతీతి? ఆమన్తా. (మనాయతనమూలకం)
(ఙ) పచ్చనీకఓకాసో
౩౨. (క) యత్థ చక్ఖాయతనం నుప్పజ్జతి తత్థ సోతాయతనం నుప్పజ్జతీతి? ఆమన్తా.
(ఖ) యత్థ వా పన సోతాయతనం నుప్పజ్జతి తత్థ చక్ఖాయతనం నుప్పజ్జతీతి? ఆమన్తా.
(క) యత్థ చక్ఖాయతనం నుప్పజ్జతి తత్థ ఘానాయతనం నుప్పజ్జతీతి? ఆమన్తా.
(ఖ) యత్థ వా పన ఘానాయతనం నుప్పజ్జతి తత్థ చక్ఖాయతనం నుప్పజ్జతీతి?
రూపావచరే తత్థ ఘానాయతనం నుప్పజ్జతి, నో చ తత్థ చక్ఖాయతనం నుప్పజ్జతి. అసఞ్ఞసత్తే అరూపే తత్థ ఘానాయతనఞ్చ నుప్పజ్జతి చక్ఖాయతనఞ్చ నుప్పజ్జతి.
(క) యత్థ చక్ఖాయతనం నుప్పజ్జతి తత్థ రూపాయతనం నుప్పజ్జతీతి?
అసఞ్ఞసత్తే తత్థ చక్ఖాయతనం నుప్పజ్జతి, నో చ తత్థ రూపాయతనం నుప్పజ్జతి. అరూపే తత్థ చక్ఖాయతనఞ్చ నుప్పజ్జతి రూపాయతనఞ్చ నుప్పజ్జతి.
(ఖ) యత్థ వా పన రూపాయతనం నుప్పజ్జతి తత్థ చక్ఖాయతనం నుప్పజ్జతీతి? ఆమన్తా.
(క) యత్థ చక్ఖాయతనం నుప్పజ్జతి తత్థ మనాయతనం నుప్పజ్జతీతి?
అరూపే తత్థ చక్ఖాయతనం నుప్పజ్జతి, నో చ తత్థ మనాయతనం నుప్పజ్జతి. అసఞ్ఞసత్తే తత్థ చక్ఖాయతనఞ్చ నుప్పజ్జతి మనాయతనఞ్చ నుప్పజ్జతి.
(ఖ) యత్థ వా పన మనాయతనం నుప్పజ్జతి తత్థ చక్ఖాయతనం నుప్పజ్జతీతి? ఆమన్తా.
(క) యత్థ చక్ఖాయతనం నుప్పజ్జతి తత్థ ధమ్మాయతనం నుప్పజ్జతీతి? ఉప్పజ్జతి.
(ఖ) యత్థ వా పన ధమ్మాయతనం నుప్పజ్జతి తత్థ చక్ఖాయతనం నుప్పజ్జతీతి? నత్థి. (చక్ఖాయతనమూలకం)
౩౩. (క) యత్థ ఘానాయతనం నుప్పజ్జతి తత్థ రూపాయతనం నుప్పజ్జతీతి?
రూపావచరే తత్థ ఘానాయతనం నుప్పజ్జతి, నో చ తత్థ రూపాయతనం నుప్పజ్జతి. అరూపే తత్థ ఘానాయతనఞ్చ నుప్పజ్జతి రూపాయతనఞ్చ నుప్పజ్జతి.
(ఖ) యత్థ వా పన రూపాయతనం నుప్పజ్జతి తత్థ ఘానాయతనం నుప్పజ్జతీతి? ఆమన్తా.
(క) యత్థ ఘానాయతనం నుప్పజ్జతి తత్థ మనాయతనం నుప్పజ్జతీతి?
రూపావచరే అరూపావచరే తత్థ ఘానాయతనం నుప్పజ్జతి, నో చ తత్థ మనాయతనం నుప్పజ్జతి. అసఞ్ఞసత్తే తత్థ ఘానాయతనఞ్చ నుప్పజ్జతి మనాయతనఞ్చ నుప్పజ్జతి.
(ఖ) యత్థ వా పన మనాయతనం నుప్పజ్జతి తత్థ ఘానాయతనం నుప్పజ్జతీతి? ఆమన్తా.
(క) యత్థ ఘానాయతనం నుప్పజ్జతి తత్థ ధమ్మాయతనం నుప్పజ్జతీతి? ఉప్పజ్జతి.
(ఖ) యత్థ వా పన ధమ్మాయతనం నుప్పజ్జతి తత్థ ఘానాయతనం నుప్పజ్జతీతి? నత్థి. (ఘానాయతనమూలకం)
౩౪. (క) యత్థ రూపాయతనం నుప్పజ్జతి తత్థ మనాయతనం నుప్పజ్జతీతి? ఉప్పజ్జతి.
(ఖ) యత్థ వా పన మనాయతనం నుప్పజ్జతి తత్థ రూపాయతనం నుప్పజ్జతీతి? ఉప్పజ్జతి.
(క) యత్థ రూపాయతనం నుప్పజ్జతి తత్థ ధమ్మాయతనం నుప్పజ్జతీతి? ఉప్పజ్జతి.
(ఖ) యత్థ వా పన ధమ్మాయతనం నుప్పజ్జతి తత్థ రూపాయతనం నుప్పజ్జతీతి? నత్థి. (రూపాయతనమూలకం)
౩౫. (క) యత్థ మనాయతనం నుప్పజ్జతి తత్థ ధమ్మాయతనం నుప్పజ్జతీతి? ఉప్పజ్జతి.
(ఖ) యత్థ వా పన ధమ్మాయతనం నుప్పజ్జతి తత్థ మనాయతనం నుప్పజ్జతీతి? నత్థి. (మనాయతనమూలకం)
(చ) పచ్చనీకపుగ్గలోకాసా
౩౬. (క) యస్స యత్థ చక్ఖాయతనం నుప్పజ్జతి తస్స తత్థ సోతాయతనం నుప్పజ్జతీతి?
అచక్ఖుకానం ససోతకానం ఉపపజ్జన్తానం తేసం తత్థ చక్ఖాయతనం నుప్పజ్జతి, నో చ తేసం తత్థ సోతాయతనం నుప్పజ్జతి. సబ్బేసం చవన్తానం అచక్ఖుకానం అసోతకానం ఉపపజ్జన్తానం తేసం తత్థ చక్ఖాయతనఞ్చ నుప్పజ్జతి సోతాయతనఞ్చ నుప్పజ్జతి.
(ఖ) యస్స వా పన యత్థ సోతాయతనం నుప్పజ్జతి తస్స తత్థ చక్ఖాయతనం నుప్పజ్జతీతి?
అసోతకానం సచక్ఖుకానం ఉపపజ్జన్తానం తేసం తత్థ సోతాయతనం నుప్పజ్జతి, నో చ తేసం తత్థ చక్ఖాయతనం నుప్పజ్జతి. సబ్బేసం చవన్తానం అసోతకానం అచక్ఖుకానం ఉపపజ్జన్తానం తేసం తత్థ సోతాయతనఞ్చ నుప్పజ్జతి చక్ఖాయతనఞ్చ నుప్పజ్జతి…పే….
౩౭. (క) యస్స యత్థ మనాయతనం నుప్పజ్జతి తస్స తత్థ ధమ్మాయతనం నుప్పజ్జతీతి?
అచిత్తకానం ఉపపజ్జన్తానం తేసం తత్థ మనాయతనం నుప్పజ్జతి, నో చ తేసం తత్థ ధమ్మాయతనం నుప్పజ్జతి. సబ్బేసం చవన్తానం తేసం తత్థ మనాయతనఞ్చ నుప్పజ్జతి ధమ్మాయతనఞ్చ నుప్పజ్జతి.