౬. అతీతానాగతవారో

౨౧౧. (క) యో రూపక్ఖన్ధం పరిజానిత్థ సో వేదనాక్ఖన్ధం పరిజానిస్సతీతి? నో.

(ఖ) యో వా పన వేదనాక్ఖన్ధం పరిజానిస్సతి సో రూపక్ఖన్ధం పరిజానిత్థాతి? నో.

(క) యో రూపక్ఖన్ధం న పరిజానిత్థ సో వేదనాక్ఖన్ధం న పరిజానిస్సతీతి?

యే మగ్గం పటిలభిస్సన్తి తే రూపక్ఖన్ధం న పరిజానిత్థ, నో చ వేదనాక్ఖన్ధం న పరిజానిస్సన్తి. అగ్గమగ్గసమఙ్గీ యే చ పుథుజ్జనా మగ్గం న పటిలభిస్సన్తి తే రూపక్ఖన్ధఞ్చ న పరిజానిత్థ వేదనాక్ఖన్ధఞ్చ న పరిజానిస్సన్తి.

(ఖ) యో వా పన వేదనాక్ఖన్ధం న పరిజానిస్సతి సో రూపక్ఖన్ధం న పరిజానిత్థాతి?

అరహా వేదనాక్ఖన్ధం న పరిజానిస్సతి, నో చ రూపక్ఖన్ధం న పరిజానిత్థ. అగ్గమగ్గసమఙ్గీ యే చ పుథుజ్జనా మగ్గం న పటిలభిస్సన్తి తే వేదనాక్ఖన్ధఞ్చ న పరిజానిస్సన్తి రూపక్ఖన్ధఞ్చ న పరిజానిత్థ.

పరిఞ్ఞావారో.

ఖన్ధయమకపాళి నిట్ఠితా.

నమో తస్స భగవతో అరహతో సమ్మాసమ్బుద్ధస్స