(౬) అతీతానాగతవారో
(క) అనులోమపుగ్గలో
౧౪౩. (క) యస్స రూపక్ఖన్ధో నిరుజ్ఝిత్థ తస్స వేదనాక్ఖన్ధో నిరుజ్ఝిస్సతీతి?
పరినిబ్బన్తానం తేసం రూపక్ఖన్ధో నిరుజ్ఝిత్థ, నో చ తేసం వేదనాక్ఖన్ధో నిరుజ్ఝిస్సతి. ఇతరేసం తేసం రూపక్ఖన్ధో చ నిరుజ్ఝిత్థ వేదనాక్ఖన్ధో చ నిరుజ్ఝిస్సతి.
(ఖ) యస్స వా పన వేదనాక్ఖన్ధో నిరుజ్ఝిస్సతి తస్స రూపక్ఖన్ధో నిరుజ్ఝిత్థాతి? ఆమన్తా.
౧౪౪. (క) యస్స వేదనాక్ఖన్ధో నిరుజ్ఝిత్థ తస్స సఞ్ఞాక్ఖన్ధో నిరుజ్ఝిస్సతీతి?
పరినిబ్బన్తానం తేసం వేదనాక్ఖన్ధో నిరుజ్ఝిత్థ, నో చ తేసం సఞ్ఞాక్ఖన్ధో నిరుజ్ఝిస్సతి. ఇతరేసం తేసం వేదనాక్ఖన్ధో చ నిరుజ్ఝిత్థ సఞ్ఞాక్ఖన్ధో చ నిరుజ్ఝిస్సతి.
(ఖ) యస్స వా పన సఞ్ఞాక్ఖన్ధో నిరుజ్ఝిస్సతి తస్స వేదనాక్ఖన్ధో నిరుజ్ఝిత్థాతి? ఆమన్తా.
(ఖ) అనులోమఓకాసో
౧౪౫. యత్థ రూపక్ఖన్ధో నిరుజ్ఝిత్థ…పే….
(గ) అనులోమపుగ్గలోకాసా
౧౪౬. (క) యస్స యత్థ రూపక్ఖన్ధో నిరుజ్ఝిత్థ తస్స తత్థ వేదనాక్ఖన్ధో నిరుజ్ఝిస్సతీతి?
పఞ్చవోకారే పరినిబ్బన్తానం అసఞ్ఞసత్తానం తేసం తత్థ రూపక్ఖన్ధో నిరుజ్ఝిత్థ, నో చ తేసం తత్థ వేదనాక్ఖన్ధో నిరుజ్ఝిస్సతి. ఇతరేసం పఞ్చవోకారానం తేసం తత్థ రూపక్ఖన్ధో చ నిరుజ్ఝిత్థ వేదనాక్ఖన్ధో చ నిరుజ్ఝిస్సతి.
(ఖ) యస్స వా పన యత్థ వేదనాక్ఖన్ధో నిరుజ్ఝిస్సతి తస్స తత్థ రూపక్ఖన్ధో నిరుజ్ఝిత్థాతి?
సుద్ధావాసం ఉపపజ్జన్తానం అరూపానం తేసం తత్థ వేదనాక్ఖన్ధో నిరుజ్ఝిస్సతి, నో చ తేసం తత్థ రూపక్ఖన్ధో నిరుజ్ఝిత్థ. ఇతరేసం పఞ్చవోకారానం తేసం తత్థ వేదనాక్ఖన్ధో చ నిరుజ్ఝిస్సతి రూపక్ఖన్ధో చ నిరుజ్ఝిత్థ.
౧౪౭. (క) యస్స యత్థ వేదనాక్ఖన్ధో నిరుజ్ఝిత్థ తస్స తత్థ సఞ్ఞాక్ఖన్ధో నిరుజ్ఝిస్సతీతి?
పరినిబ్బన్తానం తేసం తత్థ వేదనాక్ఖన్ధో నిరుజ్ఝిత్థ, నో చ తేసం తత్థ సఞ్ఞాక్ఖన్ధో నిరుజ్ఝిస్సతి. ఇతరేసం చతువోకారానం పఞ్చవోకారానం తేసం తత్థ వేదనాక్ఖన్ధో చ నిరుజ్ఝిత్థ సఞ్ఞాక్ఖన్ధో చ నిరుజ్ఝిస్సతి.
(ఖ) యస్స వా పన యత్థ సఞ్ఞాక్ఖన్ధో నిరుజ్ఝిస్సతి తస్స తత్థ వేదనాక్ఖన్ధో నిరుజ్ఝిత్థాతి?
సుద్ధావాసం ఉపపజ్జన్తానం తేసం తత్థ సఞ్ఞాక్ఖన్ధో నిరుజ్ఝిస్సతి, నో చ తేసం తత్థ వేదనాక్ఖన్ధో నిరుజ్ఝిత్థ. ఇతరేసం చతువోకారానం పఞ్చవోకారానం తేసం తత్థ సఞ్ఞాక్ఖన్ధో చ నిరుజ్ఝిస్సతి వేదనాక్ఖన్ధో చ నిరుజ్ఝిత్థ.
(ఘ) పచ్చనీకపుగ్గలో
౧౪౮. (క) యస్స రూపక్ఖన్ధో న నిరుజ్ఝిత్థ తస్స వేదనాక్ఖన్ధో న నిరుజ్ఝిస్సతీతి? నత్థి.
(ఖ) యస్స వా పన వేదనాక్ఖన్ధో న నిరుజ్ఝిస్సతి తస్స రూపక్ఖన్ధో న నిరుజ్ఝిత్థాతి? నిరుజ్ఝిత్థ.
౧౪౯. (క) యస్స వేదనాక్ఖన్ధో న నిరుజ్ఝిత్థ తస్స సఞ్ఞాక్ఖన్ధో న నిరుజ్ఝిస్సతీతి? నత్థి.
(ఖ) యస్స వా పన సఞ్ఞాక్ఖన్ధో న నిరుజ్ఝిస్సతి తస్స వేదనాక్ఖన్ధో న నిరుజ్ఝిత్థాతి? నిరుజ్ఝిత్థ.
(ఙ) పచ్చనీకఓకాసో
౧౫౦. యత్థ రూపక్ఖన్ధో న నిరుజ్ఝిత్థ…పే….
(చ) పచ్చనీకపుగ్గలోకాసా
౧౫౧. (క) యస్స యత్థ రూపక్ఖన్ధో న నిరుజ్ఝిత్థ తస్స తత్థ వేదనాక్ఖన్ధో న నిరుజ్ఝిస్సతీతి?
సుద్ధావాసం ఉపపజ్జన్తానం అరూపానం తేసం తత్థ రూపక్ఖన్ధో న నిరుజ్ఝిత్థ, నో చ తేసం తత్థ వేదనాక్ఖన్ధో న నిరుజ్ఝిస్సతి. సుద్ధావాసే పరినిబ్బన్తానం అరూపే పరినిబ్బన్తానం తేసం తత్థ రూపక్ఖన్ధో చ న నిరుజ్ఝిత్థ, వేదనాక్ఖన్ధో చ న నిరుజ్ఝిస్సతి.
(ఖ) యస్స వా పన యత్థ వేదనాక్ఖన్ధో న నిరుజ్ఝిస్సతి తస్స తత్థ రూపక్ఖన్ధో న నిరుజ్ఝిత్థాతి?
పఞ్చవోకారే పరినిబ్బన్తానం అసఞ్ఞసత్తానం తేసం తత్థ వేదనాక్ఖన్ధో న నిరుజ్ఝిస్సతి, నో చ తేసం తత్థ రూపక్ఖన్ధో న నిరుజ్ఝిత్థ. సుద్ధావాసే పరినిబ్బన్తానం అరూపే పరినిబ్బన్తానం తేసం తత్థ వేదనాక్ఖన్ధో చ న నిరుజ్ఝిస్సతి రూపక్ఖన్ధో చ న నిరుజ్ఝిత్థ.
౧౫౨. (క) యస్స యత్థ వేదనాక్ఖన్ధో న నిరుజ్ఝిత్థ తస్స తత్థ సఞ్ఞాక్ఖన్ధో న నిరుజ్ఝిస్సతీతి?
సుద్ధావాసం ఉపపజ్జన్తానం తేసం తత్థ వేదనాక్ఖన్ధో న నిరుజ్ఝిత్థ, నో చ తేసం తత్థ సఞ్ఞాక్ఖన్ధో న నిరుజ్ఝిస్సతి. సుద్ధావాసే పరినిబ్బన్తానం అసఞ్ఞసత్తానం తేసం తత్థ వేదనాక్ఖన్ధో చ న నిరుజ్ఝిత్థ సఞ్ఞాక్ఖన్ధో చ న నిరుజ్ఝిస్సతి.
(ఖ) యస్స వా పన యత్థ సఞ్ఞాక్ఖన్ధో న నిరుజ్ఝిస్సతి తస్స తత్థ వేదనాక్ఖన్ధో న నిరుజ్ఝిత్థాతి?
పరినిబ్బన్తానం తేసం తత్థ సఞ్ఞాక్ఖన్ధో న నిరుజ్ఝిస్సతి, నో చ తేసం తత్థ వేదనాక్ఖన్ధో న నిరుజ్ఝిత్థ. సుద్ధావాసే పరినిబ్బన్తానం అసఞ్ఞసత్తానం తేసం తత్థ సఞ్ఞాక్ఖన్ధో చ న నిరుజ్ఝిస్సతి వేదనాక్ఖన్ధో చ న నిరుజ్ఝిత్థ.
నిరోధవారో.