(౧) పచ్చుప్పన్నవారో

(క) అనులోమపుగ్గలో

౧౦౪. (క) యస్స రూపక్ఖన్ధో నిరుజ్ఝతి తస్స వేదనాక్ఖన్ధో నిరుజ్ఝతీతి?

అసఞ్ఞసత్తా చవన్తానం తేసం రూపక్ఖన్ధో నిరుజ్ఝతి, నో చ తేసం వేదనాక్ఖన్ధో నిరుజ్ఝతి. పఞ్చవోకారా చవన్తానం తేసం రూపక్ఖన్ధో చ నిరుజ్ఝతి వేదనాక్ఖన్ధో చ నిరుజ్ఝతి.

(ఖ) యస్స వా పన వేదనాక్ఖన్ధో నిరుజ్ఝతి తస్స రూపక్ఖన్ధో నిరుజ్ఝతీతి?

అరూపా చవన్తానం తేసం వేదనాక్ఖన్ధో నిరుజ్ఝతి, నో చ తేసం రూపక్ఖన్ధో నిరుజ్ఝతి. పఞ్చవోకారా చవన్తానం తేసం వేదనాక్ఖన్ధో చ నిరుజ్ఝతి రూపక్ఖన్ధో చ నిరుజ్ఝతి.

(ఖ) అనులోమఓకాసో

౧౦౫. (క) యత్థ రూపక్ఖన్ధో నిరుజ్ఝతి తత్థ వేదనాక్ఖన్ధో నిరుజ్ఝతీతి?

అసఞ్ఞసత్తే తత్థ రూపక్ఖన్ధో నిరుజ్ఝతి, నో చ తత్థ వేదనాక్ఖన్ధో నిరుజ్ఝతి. పఞ్చవోకారే తత్థ రూపక్ఖన్ధో చ నిరుజ్ఝతి వేదనాక్ఖన్ధో చ నిరుజ్ఝతి.

(ఖ) యత్థ వా పన వేదనాక్ఖన్ధో నిరుజ్ఝతి తత్థ రూపక్ఖన్ధో నిరుజ్ఝతీతి?

అరూపే తత్థ వేదనాక్ఖన్ధో నిరుజ్ఝతి, నో చ తత్థ రూపక్ఖన్ధో నిరుజ్ఝతి. పఞ్చవోకారే తత్థ వేదనాక్ఖన్ధో చ నిరుజ్ఝతి రూపక్ఖన్ధో చ నిరుజ్ఝతి.

(గ) అనులోమపుగ్గలోకాసా

౧౦౬. (క) యస్స యత్థ రూపక్ఖన్ధో నిరుజ్ఝతి తస్స తత్థ వేదనాక్ఖన్ధో నిరుజ్ఝతీతి?

అసఞ్ఞసత్తా చవన్తానం తేసం తత్థ రూపక్ఖన్ధో నిరుజ్ఝతి, నో చ తేసం తత్థ వేదనాక్ఖన్ధో నిరుజ్ఝతి. పఞ్చవోకారా చవన్తానం తేసం తత్థ రూపక్ఖన్ధో చ నిరుజ్ఝతి వేదనాక్ఖన్ధో చ నిరుజ్ఝతి.

(ఖ) యస్స వా పన యత్థ వేదనాక్ఖన్ధో నిరుజ్ఝతి తస్స తత్థ రూపక్ఖన్ధో నిరుజ్ఝతీతి?

అరూపా చవన్తానం తేసం తత్థ వేదనాక్ఖన్ధో నిరుజ్ఝతి, నో చ తేసం తత్థ రూపక్ఖన్ధో నిరుజ్ఝతి. పఞ్చవోకారా చవన్తానం తేసం తత్థ వేదనాక్ఖన్ధో చ నిరుజ్ఝతి రూపక్ఖన్ధో చ నిరుజ్ఝతి.

(ఘ) పచ్చనీకపుగ్గలో

౧౦౭. (క) యస్స రూపక్ఖన్ధో న నిరుజ్ఝతి తస్స వేదనాక్ఖన్ధో న నిరుజ్ఝతీతి?

అరూపా చవన్తానం తేసం రూపక్ఖన్ధో న నిరుజ్ఝతి, నో చ తేసం వేదనాక్ఖన్ధో న నిరుజ్ఝతి. సబ్బేసం ఉపపజ్జన్తానం తేసం రూపక్ఖన్ధో చ న నిరుజ్ఝతి వేదనాక్ఖన్ధో చ న నిరుజ్ఝతి.

(ఖ) యస్స వా పన వేదనాక్ఖన్ధో న నిరుజ్ఝతి తస్స రూపక్ఖన్ధో న నిరుజ్ఝతీతి?

అసఞ్ఞసత్తా చవన్తానం తేసం వేదనాక్ఖన్ధో న నిరుజ్ఝతి, నో చ తేసం రూపక్ఖన్ధో న నిరుజ్ఝతి. సబ్బేసం ఉపపజ్జన్తానం తేసం వేదనాక్ఖన్ధో చ న నిరుజ్ఝతి రూపక్ఖన్ధో చ న నిరుజ్ఝతి.

(ఙ) పచ్చనీకఓకాసో

౧౦౮. (క) యత్థ రూపక్ఖన్ధో న నిరుజ్ఝతి తత్థ వేదనాక్ఖన్ధో న నిరుజ్ఝతీతి? నిరుజ్ఝతి.

(ఖ) యత్థ వా పన వేదనాక్ఖన్ధో న నిరుజ్ఝతి తత్థ రూపక్ఖన్ధో న నిరుజ్ఝతీతి? నిరుజ్ఝతి.

(చ) పచ్చనీకపుగ్గలోకాసా

౧౦౯. (క) యస్స యత్థ రూపక్ఖన్ధో న నిరుజ్ఝతి తస్స తత్థ వేదనాక్ఖన్ధో న నిరుజ్ఝతీతి?

అరూపా చవన్తానం తేసం తత్థ రూపక్ఖన్ధో న నిరుజ్ఝతి, నో చ తేసం తత్థ వేదనాక్ఖన్ధో న నిరుజ్ఝతి. సబ్బేసం ఉపపజ్జన్తానం తేసం తత్థ రూపక్ఖన్ధో చ న నిరుజ్ఝతి వేదనాక్ఖన్ధో చ న నిరుజ్ఝతి.

(ఖ) యస్స వా పన యత్థ వేదనాక్ఖన్ధో న నిరుజ్ఝతి తస్స తత్థ రూపక్ఖన్ధో న నిరుజ్ఝతీతి?

అసఞ్ఞసత్తా చవన్తానం తేసం తత్థ వేదనాక్ఖన్ధో న నిరుజ్ఝతి, నో చ తేసం తత్థ రూపక్ఖన్ధో న నిరుజ్ఝతి. సబ్బేసం ఉపపజ్జన్తానం తేసం తత్థ వేదనాక్ఖన్ధో చ న నిరుజ్ఝతి రూపక్ఖన్ధో చ న నిరుజ్ఝతి.