౧౪. సిక్ఖాపదవిభఙ్గో

౧. అభిధమ్మభాజనీయం

౭౦౩. పఞ్చ సిక్ఖాపదాని – పాణాతిపాతా వేరమణీ సిక్ఖాపదం, అదిన్నాదానా వేరమణీ సిక్ఖాపదం, కామేసుమిచ్ఛాచారా వేరమణీ సిక్ఖాపదం, ముసావాదా వేరమణీ సిక్ఖాపదం, సురామేరయమజ్జపమాదట్ఠానా వేరమణీ సిక్ఖాపదం.

౭౦౪. తత్థ కతమం పాణాతిపాతా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం పాణాతిపాతా విరమన్తస్స, యా తస్మిం సమయే పాణాతిపాతా ఆరతి విరతి పటివిరతి వేరమణీ అకిరియా అకరణం అనజ్ఝాపత్తి వేలాఅనతిక్కమో సేతుఘాతో – ఇదం వుచ్చతి ‘‘పాణాతిపాతా వేరమణీ సిక్ఖాపదం’’. అవసేసా ధమ్మా వేరమణియా సమ్పయుత్తా.

తత్థ కతమం పాణాతిపాతా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం పాణాతిపాతా విరమన్తస్స, యా తస్మిం సమయే చేతనా సఞ్చేతనా సఞ్చేతయితత్తం – ఇదం వుచ్చతి ‘‘పాణాతిపాతా వేరమణీ సిక్ఖాపదం’’. అవసేసా ధమ్మా చేతనాయ సమ్పయుత్తా.

తత్థ కతమం పాణాతిపాతా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం పాణాతిపాతా విరమన్తస్స, యో తస్మిం సమయే ఫస్సో…పే… పగ్గాహో అవిక్ఖేపో – ఇదం వుచ్చతి ‘‘పాణాతిపాతా వేరమణీ సిక్ఖాపదం’’.

౭౦౫. తత్థ కతమం పాణాతిపాతా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి ఉపేక్ఖాసహగతం ఞాణవిప్పయుత్తం ససఙ్ఖారేన పాణాతిపాతా విరమన్తస్స, యా తస్మిం సమయే చేతనా సఞ్చేతనా సఞ్చేతయితత్తం – ఇదం వుచ్చతి ‘‘పాణాతిపాతా వేరమణీ సిక్ఖాపదం’’. అవసేసా ధమ్మా చేతనాయ సమ్పయుత్తా.

తత్థ కతమం పాణాతిపాతా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి ఉపేక్ఖాసహగతం ఞాణవిప్పయుత్తం ససఙ్ఖారేన పాణాతిపాతా విరమన్తస్స ఫస్సో…పే… పగ్గాహో అవిక్ఖేపో – ఇదం వుచ్చతి ‘‘పాణాతిపాతా వేరమణీ సిక్ఖాపదం’’.

౭౦౬. తత్థ కతమం అదిన్నాదానా వేరమణీ సిక్ఖాపదం…పే… కామేసుమిచ్ఛాచారా వేరమణీ సిక్ఖాపదం…పే… ముసావాదా వేరమణీ సిక్ఖాపదం…పే… సురామేరయమజ్జపమాదట్ఠానా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం సురామేరయమజ్జపమాదట్ఠానా విరమన్తస్స, యా తస్మిం సమయే సురామేరయమజ్జపమాదట్ఠానా ఆరతి విరతి పటివిరతి వేరమణీ అకిరియా అకరణం అనజ్ఝాపత్తి వేలాఅనతిక్కమో సేతుఘాతో – ఇదం వుచ్చతి ‘‘సురామేరయమజ్జపమాదట్ఠానా వేరమణీ సిక్ఖాపదం’’. అవసేసా ధమ్మా వేరమణియా సమ్పయుత్తా.

తత్థ కతమం సురామేరయమజ్జపమాదట్ఠానా వేరమణీ సిక్ఖాపదం, యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం సురామేరయమజ్జపమాదట్ఠానా విరమన్తస్స, యా తస్మిం సమయే చేతనా సఞ్చేతనా సఞ్చేతయితత్తం – ఇదం వుచ్చతి ‘‘సురామేరయమజ్జపమాదట్ఠానా వేరమణీ సిక్ఖాపదం’’. అవసేసా ధమ్మా చేతనాయ సమ్పయుత్తా.

తత్థ కతమం సురామేరయమజ్జపమాదట్ఠానా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం సురామేరయమజ్జపమాదట్ఠానా విరమన్తస్స, యో తస్మిం సమయే ఫస్సో…పే… పగ్గాహో అవిక్ఖేపో – ఇదం వుచ్చతి ‘‘సురామేరయమజ్జపమాదట్ఠానా వేరమణీ సిక్ఖాపదం’’.

తత్థ కతమం సురామేరయమజ్జపమాదట్ఠానా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం ససఙ్ఖారేన…పే… సోమనస్ససహగతం ఞాణవిప్పయుత్తం…పే… సోమనస్ససహగతం ఞాణవిప్పయుత్తం ససఙ్ఖారేన…పే… ఉపేక్ఖాసహగతం ఞాణసమ్పయుత్తం…పే… ఉపేక్ఖాసహగతం ఞాణసమ్పయుత్తం ససఙ్ఖారేన…పే… ఉపేక్ఖాసహగతం ఞాణవిప్పయుత్తం…పే… ఉపేక్ఖాసహగతం ఞాణవిప్పయుత్తం ససఙ్ఖారేన సురామేరయమజ్జపమాదట్ఠానా విరమన్తస్స, యా తస్మిం సమయే సురామేరయమజ్జపమాదట్ఠానా ఆరతి విరతి పటివిరతి వేరమణీ అకిరియా అకరణం అనజ్ఝాపత్తి వేలాఅనతిక్కమో సేతుఘాతో – ఇదం వుచ్చతి ‘‘సురామేరయమజ్జపమాదట్ఠానా వేరమణీ సిక్ఖాపదం’’. అవసేసా ధమ్మా వేరమణియా సమ్పయుత్తా.

౭౦౭. తత్థ కతమం సురామేరయమజ్జపమాదట్ఠానా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి ఉపేక్ఖాసహగతం ఞాణవిప్పయుత్తం ససఙ్ఖారేన సురామేరయమజ్జపమాదట్ఠానా విరమన్తస్స, యా తస్మిం సమయే చేతనా సఞ్చేతనా సఞ్చేతయితత్తం – ఇదం వుచ్చతి ‘‘సురామేరయమజ్జపమాదట్ఠానా వేరమణీ సిక్ఖాపదం’’. అవసేసా ధమ్మా చేతనాయ సమ్పయుత్తా.

తత్థ కతమం సురామేరయమజ్జపమాదట్ఠానా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి ఉపేక్ఖాసహగతం ఞాణవిప్పయుత్తం ససఙ్ఖారేన సురామేరయమజ్జపమాదట్ఠానా విరమన్తస్స, యో తస్మిం సమయే ఫస్సో…పే… పగ్గాహో అవిక్ఖేపో – ఇదం వుచ్చతి ‘‘సురామేరయమజ్జపమాదట్ఠానా వేరమణీ సిక్ఖాపదం’’.

౭౦౮. పఞ్చ సిక్ఖాపదాని – పాణాతిపాతా వేరమణీ సిక్ఖాపదం, అదిన్నాదానా వేరమణీ సిక్ఖాపదం, కామేసుమిచ్ఛాచారా వేరమణీ సిక్ఖాపదం, ముసావాదా వేరమణీ సిక్ఖాపదం, సురామేరయమజ్జపమాదట్ఠానా వేరమణీ సిక్ఖాపదం.

౭౦౯. తత్థ కతమం పాణాతిపాతా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం హీనం… మజ్ఝిమం… పణీతం… ఛన్దాధిపతేయ్యం… వీరియాధిపతేయ్యం… చిత్తాధిపతేయ్యం… వీమంసాధిపతేయ్యం… ఛన్దాధిపతేయ్యం హీనం… మజ్ఝిమం… పణీతం… వీరియాధిపతేయ్యం హీనం… మజ్ఝిమం… పణీతం… చిత్తాధిపతేయ్యం హీనం… మజ్ఝిమం… పణీతం… వీమంసాధిపతేయ్యం హీనం… మజ్ఝిమం… పణీతం పాణాతిపాతా విరమన్తస్స, యా తస్మిం సమయే పాణాతిపాతా ఆరతి విరతి పటివిరతి వేరమణీ అకిరియా అకరణం అనజ్ఝాపత్తి వేలాఅనతిక్కమో సేతుఘాతో – ఇదం వుచ్చతి ‘‘పాణాతిపాతా వేరమణీ సిక్ఖాపదం’’. అవసేసా ధమ్మా వేరమణియా సమ్పయుత్తా.

తత్థ కతమం పాణాతిపాతా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం హీనం… మజ్ఝిమం… పణీతం… ఛన్దాధిపతేయ్యం… వీరియాధిపతేయ్యం… చిత్తాధిపతేయ్యం… వీమంసాధిపతేయ్యం… ఛన్దాధిపతేయ్యం హీనం… మజ్ఝిమం… పణీతం… వీరియాధిపతేయ్యం హీనం… మజ్ఝిమం… పణీతం… చిత్తాధిపతేయ్యం హీనం… మజ్ఝిమం… పణీతం… వీమంసాధిపతేయ్యం హీనం… మజ్ఝిమం… పణీతం పాణాతిపాతా విరమన్తస్స, యా తస్మిం సమయే చేతనా సఞ్చేతనా సఞ్చేతయితత్తం – ఇదం వుచ్చతి ‘‘పాణాతిపాతా వేరమణీ సిక్ఖాపదం’’. అవసేసా ధమ్మా చేతనాయ సమ్పయుత్తా.

తత్థ కతమం పాణాతిపాతా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం హీనం… మజ్ఝిమం… పణీతం… ఛన్దాధిపతేయ్యం… వీరియాధిపతేయ్యం… చిత్తాధిపతేయ్యం… వీమంసాధిపతేయ్యం… ఛన్దాధిపతేయ్యం హీనం… మజ్ఝిమం… పణీతం… వీరియాధిపతేయ్యం హీనం… మజ్ఝిమం… పణీతం… చిత్తాధిపతేయ్యం హీనం… మజ్ఝిమం… పణీతం… వీమంసాధిపతేయ్యం హీనం… మజ్ఝిమం … పణీతం పాణాతిపాతా విరమన్తస్స, యో తస్మిం సమయే ఫస్సో…పే… పగ్గాహో అవిక్ఖేపో – ఇదం వుచ్చతి ‘‘పాణాతిపాతా వేరమణీ సిక్ఖాపదం’’.

తత్థ కతమం పాణాతిపాతా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం ససఙ్ఖారేన…పే… సోమనస్ససహగతం ఞాణవిప్పయుత్తం…పే… సోమనస్ససహగతం ఞాణవిప్పయుత్తం ససఙ్ఖారేన…పే… ఉపేక్ఖాసహగతం ఞాణసమ్పయుత్తం…పే… ఉపేక్ఖాసహగతం ఞాణసమ్పయుత్తం ససఙ్ఖారేన…పే… ఉపేక్ఖాసహగతం ఞాణవిప్పయుత్తం…పే… ఉపేక్ఖాసహగతం ఞాణవిప్పయుత్తం ససఙ్ఖారేన హీనం… మజ్ఝిమం… పణీతం… ఛన్దాధిపతేయ్యం… వీరియాధిపతేయ్యం… చిత్తాధిపతేయ్యం… ఛన్దాధిపతేయ్యం హీనం… మజ్ఝిమం… పణీతం… వీరియాధిపతేయ్యం హీనం… మజ్ఝిమం… పణీతం… చిత్తాధిపతేయ్యం హీనం… మజ్ఝిమం… పణీతం పాణాతిపాతా విరమన్తస్స, యా తస్మిం సమయే పాణాతిపాతా ఆరతి విరతి పటివిరతి వేరమణీ అకిరియా అకరణం అనజ్ఝాపత్తి వేలాఅనతిక్కమో సేతుఘాతో – ఇదం వుచ్చతి ‘‘పాణాతిపాతా వేరమణీ సిక్ఖాపదం’’. అవసేసా ధమ్మా వేరమణియా సమ్పయుత్తా…పే… అవసేసా ధమ్మా చేతనాయ సమ్పయుత్తా…పే… ఫస్సో…పే… పగ్గాహో అవిక్ఖేపో – ఇదం వుచ్చతి ‘‘పాణాతిపాతా వేరమణీ సిక్ఖాపదం’’.

౭౧౦. తత్థ కతమం అదిన్నాదానా వేరమణీ సిక్ఖాపదం…పే… కామేసుమిచ్ఛాచారా వేరమణీ సిక్ఖాపదం…పే… ముసావాదా వేరమణీ సిక్ఖాపదం…పే… సురామేరయమజ్జపమాదట్ఠానా వేరమణీ సిక్ఖాపదం? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం హీనం… మజ్ఝిమం… పణీతం… ఛన్దాధిపతేయ్యం… వీరియాధిపతేయ్యం … చిత్తాధిపతేయ్యం… వీమంసాధిపతేయ్యం… ఛన్దాధిపతేయ్యం హీనం… మజ్ఝిమం… పణీతం… వీరియాధిపతేయ్యం హీనం… మజ్ఝిమం… పణీతం… చిత్తాధిపతేయ్యం హీనం… మజ్ఝిమం… పణీతం… వీమంసాధిపతేయ్యం హీనం… మజ్ఝిమం… పణీతం సురామేరయమజ్జపమాదట్ఠానా విరమన్తస్స, యా తస్మిం సమయే సురామేరయమజ్జపమాదట్ఠానా ఆరతి విరతి పటివిరతి వేరమణీ అకిరియా అకరణం అనజ్ఝాపత్తి వేలాఅనతిక్కమో సేతుఘాతో – ఇదం వుచ్చతి ‘‘సురామేరయమజ్జపమాదట్ఠానా వేరమణీ సిక్ఖాపదం’’. అవసేసా ధమ్మా వేరమణియా సమ్పయుత్తా …పే… అవసేసా ధమ్మా చేతనాయ సమ్పయుత్తా…పే… ఫస్సో…పే… పగ్గాహో అవిక్ఖేపో – ఇదం వుచ్చతి ‘‘సురామేరయమజ్జపమాదట్ఠానా వేరమణీ సిక్ఖాపదం’’.

౭౧౧. తత్థ కతమం సురామేరయమజ్జపమాదట్ఠానా వేరమణీ సిక్ఖాపదం? యస్మిం సమయే కామావచరే కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం ససఙ్ఖారేన…పే… సోమనస్ససహగతం ఞాణవిప్పయుత్తం…పే… సోమనస్ససహగతం ఞాణవిప్పయుత్తం ససఙ్ఖారేన…పే… ఉపేక్ఖాసహగతం ఞాణసమ్పయుత్తం…పే… ఉపేక్ఖాసహగతం ఞాణసమ్పయుత్తం ససఙ్ఖారేన…పే… ఉపేక్ఖాసహగతం ఞాణవిప్పయుత్తం…పే… ఉపేక్ఖాసహగతం ఞాణవిప్పయుత్తం ససఙ్ఖారేన హీనం… మజ్ఝిమం… పణీతం… ఛన్దాధిపతేయ్యం… వీరియాధిపతేయ్యం… చిత్తాధిపతేయ్యం… ఛన్దాధిపతేయ్యం హీనం… మజ్ఝిమం… పణీతం… వీరియాధిపతేయ్యం హీనం… మజ్ఝిమం… పణీతం… చిత్తాధిపతేయ్యం హీనం… మజ్ఝిమం పణీతం సురామేరయమజ్జపమాదట్ఠానా విరమన్తస్స, యా తస్మిం సమయే సురామేరయమజ్జపమాదట్ఠానా ఆరతి విరతి పటివిరతి వేరమణీ అకిరియా అకరణం అనజ్ఝాపత్తి వేలాఅనతిక్కమో సేతుఘాతో – ఇదం వుచ్చతి ‘‘సురామేరయమజ్జపమాదట్ఠానా వేరమణీ సిక్ఖాపదం’’. అవసేసా ధమ్మా వేరమణియా సమ్పయుత్తా…పే… అవసేసా ధమ్మా చేతనాయ సమ్పయుత్తా…పే… ఫస్సో…పే… పగ్గాహో అవిక్ఖేపో – ఇదం వుచ్చతి ‘‘సురామేరయమజ్జపమాదట్ఠానా వేరమణీ సిక్ఖాపదం’’.

౭౧౨. కతమే ధమ్మా సిక్ఖా? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం రూపారమ్మణం వా…పే… ధమ్మారమ్మణం వా యం యం వా పనారబ్భ, తస్మిం సమయే ఫస్సో హోతి…పే… అవిక్ఖేపో హోతి. ఇమే ధమ్మా సిక్ఖా.

కతమే ధమ్మా సిక్ఖా? యస్మిం సమయే కామావచరం కుసలం చిత్తం ఉప్పన్నం హోతి సోమనస్ససహగతం ఞాణసమ్పయుత్తం ససఙ్ఖారేన…పే… సోమనస్ససహగతం ఞాణవిప్పయుత్తం…పే… సోమనస్ససహగతం ఞాణవిప్పయుత్తం ససఙ్ఖారేన…పే… ఉపేక్ఖాసహగతం ఞాణసమ్పయుత్తం…పే… ఉపేక్ఖాసహగతం ఞాణసమ్పయుత్తం ససఙ్ఖారేన…పే… ఉపేక్ఖాసహగతం ఞాణవిప్పయుత్తం…పే… ఉపేక్ఖాసహగతం ఞాణవిప్పయుత్తం ససఙ్ఖారేన రూపారమ్మణం వా…పే… ధమ్మారమ్మణం వా యం యం వా పనారబ్భ, తస్మిం సమయే ఫస్సో హోతి…పే… అవిక్ఖేపో హోతి. ఇమే ధమ్మా సిక్ఖా.

౭౧౩. కతమే ధమ్మా సిక్ఖా? యస్మిం సమయే రూపూపపత్తియా మగ్గం భావేతి…పే… అరూపూపపత్తియా మగ్గం భావేతి…పే… లోకుత్తరం ఝానం భావేతి నియ్యానికం అపచయగామిం దిట్ఠిగతానం పహానాయ పఠమాయ భూమియా పత్తియా వివిచ్చేవ కామేహి…పే… పఠమం ఝానం ఉపసమ్పజ్జ విహరతి దుక్ఖపటిపదం దన్ధాభిఞ్ఞం, తస్మిం సమయే ఫస్సో హోతి…పే… అవిక్ఖేపో హోతి. ఇమే ధమ్మా సిక్ఖా.

అభిధమ్మభాజనీయం.

౨. పఞ్హాపుచ్ఛకం

౭౧౪. పఞ్చ సిక్ఖాపదాని – పాణాతిపాతా వేరమణీ సిక్ఖాపదం, అదిన్నాదానా వేరమణీ సిక్ఖాపదం, కామేసుమిచ్ఛాచారా వేరమణీ సిక్ఖాపదం, ముసావాదా వేరమణీ సిక్ఖాపదం, సురామేరయమజ్జపమాదట్ఠానా వేరమణీ సిక్ఖాపదం.

౭౧౫. పఞ్చన్నం సిక్ఖాపదానం కతి కుసలా, కతి అకుసలా, కతి అబ్యాకతా…పే… కతి సరణా, కతి అరణా?

౧. తికం

౭౧౬. కుసలాయేవ. సియా సుఖాయ వేదనాయ సమ్పయుత్తా, సియా అదుక్ఖమసుఖాయ వేదనాయ సమ్పయుత్తా, విపాకధమ్మధమ్మా, అనుపాదిన్నుపాదానియా, అసంకిలిట్ఠసంకిలేసికా, సవితక్కసవిచారా, సియా పీతిసహగతా, సియా సుఖసహగతా, సియా ఉపేక్ఖాసహగతా.

నేవ దస్సనేన న భావనాయ పహాతబ్బా, నేవ దస్సనేన న భావనాయ పహాతబ్బహేతుకా, ఆచయగామినో, నేవసేక్ఖనాసేక్ఖా, పరిత్తా, పరిత్తారమ్మణా, మజ్ఝిమా, అనియతా, న వత్తబ్బా మగ్గారమ్మణాతిపి, మగ్గహేతుకాతిపి, మగ్గాధిపతినోతిపి. సియా ఉప్పన్నా, సియా అనుప్పన్నా, న వత్తబ్బా ఉప్పాదినోతి, సియా అతీతా, సియా అనాగతా, సియా పచ్చుప్పన్నా, పచ్చుప్పన్నారమ్మణా, సియా అజ్ఝత్తా, సియా బహిద్ధా, సియా అజ్ఝత్తబహిద్ధా, బహిద్ధారమ్మణా, అనిదస్సనఅప్పటిఘా.

౨. దుకం

౭౧౭. న హేతూ సహేతుకా, హేతుసమ్పయుత్తా. న వత్తబ్బా ‘‘హేతూ చేవ సహేతుకా చా’’తి, సహేతుకా చేవ న చ హేతూ, న వత్తబ్బా ‘‘హేతూ చేవ హేతుసమ్పయుత్తా చా’’తి, హేతుసమ్పయుత్తా చేవ న చ హేతూ, న హేతు సహేతూకా, సప్పచ్చయా, సఙ్ఖతా, అనిదస్సనా, అప్పటిఘా, అరూపా, లోకియా, కేనచి విఞ్ఞేయ్యా, కేనచి న విఞ్ఞేయ్యా.

నో ఆసవా, సాసవా, ఆసవవిప్పయుత్తా, న వత్తబ్బా ‘‘ఆసవా చేవ సాసవా చా’’తి, సాసవా చేవ నో చ ఆసవా, న వత్తబ్బా ‘‘ఆసవా చేవ ఆసవసమ్పయుత్తా చా’’తిపి, ‘‘ఆసవసమ్పయుత్తా చేవ నో చ ఆసవా’’తిపి. ఆసవవిప్పయుత్తా సాసవా, నో సంయోజనా…పే… నో గన్థా…పే… నో ఓఘా…పే… నో యోగా…పే… నో నీవరణా…పే… నో పరామాసా…పే… సారమ్మణా, నో చిత్తా, చేతసికా, చిత్తసమ్పయుత్తా, చిత్తసంసట్ఠా, చిత్తసముట్ఠానా, చిత్తసహభునో, చిత్తానుపరివత్తినో, చిత్తసంసట్ఠసముట్ఠానా, చిత్తసంసట్ఠసముట్ఠానసహభునో, చిత్తసంసట్ఠసముట్ఠానానుపరివత్తినో, బాహిరా, నో ఉపాదా, అనుపాదిన్నా, నో ఉపాదానా…పే… నో కిలేసా.

న దస్సనేన పహాతబ్బా, న భావనాయపహాతబ్బా, న దస్సనేన పహాతబ్బహేతుకా, న భావనాయ పహాతబ్బహేతుకా, సవితక్కా, సవిచారా, సియా సప్పీతికా, సియా అప్పీతికా, సియా పీతిసహగతా, సియా న పీతిసహగతా, సియా సుఖసహగతా, సియా న సుఖసహగతా, సియా ఉపేక్ఖాసహగతా, సియా న ఉపేక్ఖాసహగతా, కామావచరా, న రూపావచరా, న అరూపావచరా, పరియాపన్నా, అనియ్యానికా, అనియతా, సఉత్తరా, అరణాతి.

పఞ్హాపుచ్ఛకం.

సిక్ఖాపదవిభఙ్గో నిట్ఠితో.